ໃນລາຍການສຽງເພງຈາກແດນໄກຂອງວີໂອເອ ໃນຄ່ຳຄືນວັນອາທິດມື້ນີ້ ວັນນະສອນ
ມີເພງອາເມຣິກັນມ່ວນໆ ມາຝາກທ່ານຜູ້ຟັງອີກ. ຂໍເຊີນເຂົ້າມາຮ່ວມໃນລາຍການ
ຂອງເຮົາ ພ້ອມໆກັນເລີຍ.
ສະບາຍດີທຸກໆທ່ານ ເພງທີ່ທ່ານຫາກໍໄດ້ຟັງຈົບລົງໄປນັ້ນ ແມ່ນເພງ Heaven
ຊຶ່ງເເປເປັນພາສາລາວ ວ່າ ສະຫວັນ ເປັນຊື່ຂອງເພງທີ່ Kane Brown ຂັບຮ້ອງ
ທີ່ມີເນື້ອໃນແບບວ່າ ແມ່ນໃຜໆ ກໍພາກັນຟ້າວຟັ່ງຢາກໄປສະຫວັນຢ່າງໄວໆ
ຊຶ່ງສະຫວັນ ທີ່ເວົ້າເຖິງນີ້ ມັນດີ ສວຍງາມໄປໝົດ ສ່ວນຂ້ອຍນັ້ນ ບໍ່ອາດປຽບທຽບກັບຄວາມຮູ້ສຶກຂອງຂ້ອຍຕອນທີ່ຂ້ອຍໄດ້ຢູ່ຄຽງຂ້າງເຈົ້າໄດ້ດອກ ຊຶ່ງຄວາມໝາຍ
ຂອງເນື້ອເພງນີ້ຄົງຈະເຮັດໃຫ້ຫຼາຍໆທ່ານຢາກຫັດຮ້ອງ ຫັດອອກສຽງ ຮຽນພາສາ
ຈາກເນື້ອເພງແລະຄວາມໝາຍຂອງເພງ Heaven ນີ້. ຂໍເຊີນເຂົ້າໄປສຳພັດບັນຍາ
ກາດຂອງສະຫວັນ ໃນຄວາມຮູ້ສຶກຂອງ Kane Brown ທີ່ໄດ້ຂັບຮ້ອງໄປ...ແລະເພງ
ມ່ວນໆ ຕໍ່ໄປນີ້ ຂອງກຸ່ມສິນລະປິນ - The Band Perry ທີ່ຈະມາສ້າງຄວາມສະໜຸກ
ສະໜານ ແບບ country rock ໃນບົດເພງ Live Forever ຂໍມອບໃຫ້ບັນດາທ່ານ
ຜູ້ຟັງທີ່ມີຫົວໃຈຣ໊ອກ ທີ່ມັກຮັກເພງແນວນີ້. ຈະລຸກຂຶ້ນມາຍືດແຂ່ງຍືດຂາ ເຕັ້ນແບບ
ເບົາໆກັບເພງນີ້ ກໍໄດ້ເດີ. ເອົາມາມ່ວນ ນຳກັນເລີຍ.
ວັນນະສອນ ຂໍສົ່ງທ່ານຜູ້ຟັງເຂົ້ານອນ ດ້ວຍເພງສະບາຍໆ ດ້ວຍສຽງຫວານໆ
ຂອງນັກຮ້ອງທີ່ເປັນຕຳນານ ທັງສອງທ່ານ Kenny Rogers ກັບ Dolly Parton
ໃນບົດເພງ You Can't Make Old Friends ເພງນີ້ ຄົງບໍ່ຕ້ອງອະທິບາຍຫຼາຍດອກ
...ເພາະວ່າ ເພື່ອນທີ່ດີ ບໍ່ໄດ້ສ້າງຂຶ້ນໄດ້ງ່າຍໆ ພຽງ 2-3 ມື້ ຫຼື 4-5 ປີ... ຄືວ່າ ມັນແມ່ນ
ທັງຊີວິດເລີຍ. ຖ້າປຽບທຽບ ກໍຄົງຈະແບບວ່າ ທ່ານຜູ້ຟັງ ກັບວິທະຍຸສຽງອາເມຣິກາ...
ຮັບຟັງກັນມາເປັນຫຼາຍໆສິບປີ ຄືພວກເຮົາເປັນເພື່ອນກັນ ຕະຫຼອດມາ ແລະກໍ...
ຈະຫຼອດໄປ. ຂໍໃຫ້ທຸກໆທ່ານຈົ່ງນອນຫລັບຝັນຫວານ ແລະພົບກັນໃໝ່ ໃນສັບປະດາໜ້າ.
