ສະບາຍດີທຸກໆທ່ານ ໃນທ້າຍສັບປະດາແລ້ວນີ້ ວັນນະສອນໄດ້ມີ
ໂອກາດຮ່ວມງານລ້ຽງສັງສັນຂອງປະຊາຄົມລາວ-ອາເມຣິກັນ ທີ່
ໄດ້ຈັດງານລ້ຽງສະຫຼອງສາຍພົວພັນລະຫວ່າງລາວ ກັບສະຫະລັດ
ອາເມຣິກາ ພ້ອມທັງລ້ຽງໃຫ້ກຽດແກ່ ທ່ານເອກອັກຄະລັດຖະທູດ
ສປປ ລາວ ປະຈຳ ວໍຊິງຕັນດີຊີ ທີ່ໃກ້ຈະພົ້ນຈາກໜ້າທີ່ໄປ ຊຶ່ງໃນ
ງານລ້ຽງສັງສັນ ກໍໄດ້ມີວົງດົນຕີ ຫຼວງພະບາງ ແລະສິນລະປິນທັງ
ໃນສະຫະລັດ ແລະການາດາ ກໍຄື ວິໄລຈັນ ສເວຊວົງ ຂອບໃຈ
ສະຫວັນ ເຂົ້າຮ່ວມສ້າງຄວາມມ່ວນຊື່ນໃນງານວັນນັ້ນ ຊຶ່ງຄ່ຳຄືນນີ້
ວັນນະສອນ ຈຶ່ງຂໍນໍາສະເໜີເພງຊຸດໃໝ່ຂອງສິນລະປິນສາວລາວ
ຈາກການາດາ ວິໄລຈັນ ສເວຊວົງ ຜູ້ທີ່ມີຄວາມສາມາດ ຊຶ່ງໄດ້
ອອກຜົນງານເພງຮ່ວມກັບຫຼາຍໆສິນລະປິນ ຮວມທັງຄະນະ
ສາຍສັມພັນ ອາຈານ ພົມມະ ພິມມະສອນ ແລະສິນລະປິນ
ທ່ານອື່ນໆ ຈົນປະຈຸບັນນີ້ ໄດ້ອອກຜົນງານເພງຊຸດໃໝ່ ທີ່ເປັນ
ຜົນງານທີ່ຕົວເອງຂັບຮ້ອງທັງໝົດເລີຍ ເປັນເພງໃໝ່ທີ່ປະພັນໂດຍ
ເຈົ້າ ຄຳຜາຍ ກຸນລະວຸດ. ເອົາບໍ່ຕ້ອງລໍຊ້າແລ້ວລະ ຮີບໄປຟັງ
ພ້ອມໆກັນເລີຍ ໃນບົດເພງ ຂອບໃຈສະຫວັນ…
ວ່າຈັ່ງໃດລະ ເພງທີ່ຫຼິ້ນໃຫ້ຟັງຜ່ານໄປນັ້ນ ຄົງຈະຖືກໃຈທ່ານຜູ້ຟັງບໍ່ຫຼາຍກໍໜ້ອຍ ວັນນະ
ສອນ ກໍຄົງຕ້ອງຂໍຂອບໃຈສະຫວັນທີ່ໄດ້ປະທານ ສຽງຫວານໆໃສໆຂອງສິນລະປິນ ທ່ານນີ້ມາໃຫ້ພວກເຮົາໄດ້ຮັບຟັງກັນ… ນອກຈາກເພງລາວແລ້ວ ວິໄລຈັນ ຍັງສາມາດ
ຮ້ອງເພງຈີນ ຫວຽດນາມ ໄທ ຝຣັ່ງ ອັງກິດ ໄດ້ອີກ ຊຶ່ງວິໄລຈັນ ບອກກັບ VOA ວ່າ ຜົນງານຊຸດນີ້ເປັນເພງໃໝ່ໝົດ ທີ່ຮ້ອງຄົນດຽວ…ເອົາມາຟັງເພງ "ສັນຍາກ່ອນຈາກ" ຕື່ມອີກເພງນຶ່ງໃນຈັ່ງຫວະລຳວົງ …ແລະຫວັງວ່າເພງນີ້ ຄົງຈະເຮັດທ່ານຜູ້ຟັງ ຟັງໄປ
ຟ້ອນລຳວົງໄປນຳ…
VOA ຂໍຝາກສິນລະປິນສາວໃນຕ່າງແດນ ວິໄລຈັນ ສເວຊວົງ ໄວ້ໃນອ້ອມແຂນຂອງ
ທ່ານຜູ້ຟັງ ອີກຕື່ມຄົນນຶ່ງ. ຈັ່ງໃດກໍໄດ້ຟັງເພງຂອງວິໄລຈັນ ທັງສອງເພງໄປແລ້ວ ວັນນະສອນຂໍອຳລາ ທ່ານດ້ວຍເພງຫວານຂອງວິໄລຈັນ ຕື່ມອີກເພງນຶ່ງ…ຊຶ່ງເພງນີ້ເປັນຜົນງານເພງເກົ່າທີ່ເຈົ້າ ຄຳຜາຍ ກຸນລະວຸດ ໄດ້ແຕ່ງໄວ້ ແລະຄະນະ ແມ່ຂອງຂຽວ ກໍໄດ້
ບັນທຶກເປັນແຜ່ນສຽງໃຫ້ພວກເຮົາໄດ້ຮັບຟັງກັນ ຫຼາຍໆທົດສວັດຜ່ານມາແລ້ວ …ແລະຂໍໃຫ້ທຸກໆທ່ານນອນຫຼັບຝັນດີ ແລະຝັນເຫັນລະອອງຫິມະ…ເພື່ອຕຽມໃຈ ຕ້ອນຮັບກັບ
ອາກາດໜາວທີ່ກຳລັງຢ່າງກ້າວເຂົ້າມາ…ພ້ອມໆໄປກັບສຽງເພງນີ້…“ຫິມະຕົກ” ນອນຫລັບຝັນຫວານ ແລະພົບກັນໃໝ່ ໃນສັບປະດາໜ້າ.
