ສະບາຍດີ ຟັງເພງລາວມາໄດ້ຫຼາຍໆສັບປະດາແລ້ວ ຄ່ຳຄືນນີ້
ວັນນະສອນ ຂໍຈັດເພງສາກົນທີ່ກຳລັງເປັນທີ່ນິຍົມຢູ່ໃນຂະນະນີ້
ໃຫ້ທ່ານຜູ້ຟັງໄດ້ຮັບຟັງກັນ ເພງ “See You Again” ເປັນເພງທີ່ໂດງດັງແລະຕິດອັນດັບ
ຕົ້ນໆ ຊຶ່ງວັນນະສອນ ວ່າ ສະໄມນີ້ວົງການເພງຊ່າງສ້າງສັນ ແລະມັກຈະມີນຳສະເໜີແນວແພງແປກໃໝ່ ອອກມາເລື້ອຍໆ ໃຫ້ພວກເຮົາໄດ້ຕິດຕາມຮັບຟັງ ຢ່າງມ່ວນຫູ ຂໍເລີ້ມຕົ້ນດ້ວຍເພງສາກົນທີ່ຕິດອັນດັບ ຢູ່ໃນTop 10 ຢູ່ໃນປະຈຸບັນນີ້ ເປັນເພງທີ່ຮ້ອງປະສົມປະສານລະຫວ່າງ ແນວເພງຫວານໆ ສຽງແພ່ວເບົາ ພ້ອມທັງການປະສົມປະສານ ກັບທຳນອງເພງແຣ໊ບ ທີ່ຂັບຮ້ອງໂດຍສິນລະປິນ Wiz Khalifa feat Charlie Puth ຫວັງວ່າເພງນີ້ ຄົງຈະເຮັດໃຫ້ທ່ານຜູ້ຟັງ ເປັນຄົນທັນສະໄໝແລະຕາມທັນເຫດການຢູ່ສະເໝີ. ຢ່າລໍຊ້າ ໄປຟັງພ້ອມໆກັນເລີຍ.
ຕ້ອງຂໍຂອບໃຈກັບທຸກຄຳຕິຊົມ ແລະຄວາມຄິດເຫັນໃດໆ ທີ່ຂຽນລົງໃນ Website ຂອງເຮົາ ແນ່ນອນ ຄວາມເປັນມະນຸດປຸຖຸຊົນທຳມະດາ ຍ່ອມຈະມີການຜິດພາດກັນ ເປັນທຳມະດາ ແຕ່ບໍ່ແມ່ນຂໍ້ອ້າງ ຫາກແຕ່ເວົ້າຕາມຄວາມຈິງ ວັນນະສອນ ຂໍຂອບພະຄຸນເປັນຢ່າງສູງ ທີ່ໄດ້ມີທ່ານຜູ້ຟັງຄອຍເອົາໃຈໃສ່ ແລະສົ່ງຄວາມເຫັນຂຽນເຂົ້າມາຫາທາງເຮົາ ວັນນະສອນ ຂໍນ້ອມກາບຮັບເອົາຄຳຕິຊົມແລະກໍຈະປັບປຸງແລະພັດທະນາໃຫ້ດີຍິ່ງໆຂຶ້ນໄປ. ຈຶ່ງຂໍຈັດເພງໃຫ້ຜູ້ຟັງທ່ານນີ້ ຜູ້ປະສົງບໍ່ອອກນາມ…ອີກຄັ້ງນຶ່ງ ຂໍຂອບໃຈ ດ້ວຍໃຈຈິງ…ຈຶ່ງຂໍຈັດເພງທີ່ຕິດອັນດັບ 2 ຂອງ Top 10 ຫວັງວ່າເພງນີ້ ຄົງຈະຖືກໃຈທ່ານຜູ້ຟັງ ເປັນຜົນງານເພງຂອງສາວນ້ອຍ ມະຫັດສະຈັນ ທີ່ເກັ່ງແລະໂດງດັງຜູ້ນຶ່ງຢູ່ໃນວົງການເພງສະຫະລັດ ຊຶ່ງໄດ້ຮັບ
ລາງວັນມາແລ້ວຢ່າງມາກມາຍກາຍກອງ ແລະຍັງໄດ້ແຕ່ງເພງ ຕັ້ງແຕ່ອາຍຸ12 ປີ ພຸ້ນແນ໊ະ ແລະເຂົາຄົນນັ້ນກໍຈະບໍ່ແມ່ນຄົນອື່ນຄົນໄກ ນອກຈາກສາວນ້ອຍ ມະຫັດສະຈັນຄົນນີ້ Taylor Swift ທີ່ປະຈຸບັນນີ້ ກໍຍິ່ງໂຕ ກໍຍິ່ງສວຍງາມ ເພງນີ້ຮ້ອງຄູ່ກັບ Kendrick Lamar ໃນບົດເພງ Bad Blood ເນື້ອຫາຂອງເພງນີ້ຈະເຂັ້ມຂຸ້ນ ຫຼື ເປັນເລືອດຮ້າຍ ດັ່ງຊື່ຂອງເພງນີ້…ກໍຂໍເຊີນໄປຮັບຟັງຮ່ວມກັນໄດ້ເລີຍ.
ເພງ “Cheerleader” ເປັນເພງຂອງສິນລະປິນໜ້າໃໝ່ ທີ່ມີຊື່ຈິງວ່າ Omar Samuel Pasley ແຕ່ໃຊ້ຊື່ OMI ຊຶ່ງເປັນຊື່ ທີ່ໃຊ້ໃນວົງການ ເປັນສິນລະປິນຊາວແຈມເມກາ ທີ່ຮ້ອງເພງນີ້ ໄດ້ປະທັບໃຈບັນດາສາວໆເປັນທີ່ສຸດ ທັງມິວສິກວີດີໂອ ທີ່ສຸດຈະເຊັກຊີ...ລອງໄປຟັງພ້ອມໆກັນເລີຍ ໃນບົດເພງ “Cheerleader.” ສັບປະດາໜ້າ ວັນນະສອນ ຈະນຳເພງລາວໃໝ່ໆ ມາຝາກທ່ານຜູ້ຟັງ. ພົບກັນໃໝ່ໃນສັບປະດາໜ້າ ນອນຫຼັບຝັນຫວານ.
