“ຖາມຂ່າວບ່າວວຽງຈັນ” ຜົນງານເພງຂອງສິນລະປິນສາວ ລູກຄໍພັນຊັ້ນ ດັ່ງທີ່ເຂົາວ່າ ແສງເດືອນ ຈັນທະວິໄຊ ຊຶ່ງຖືວ່າເປັນສິນລະປິນ ລູກທົ່ງໝໍລຳ ສຽງດີ ທີ່ຫາໄດ້ຍາກ
ໃນວົງການເພງໃນປະຈຸບັນນີ້ ບໍ່ຕ້ອງລໍຊ້າເລີຍ ຮີບໄປຟັງຂັບງື່ມປະຍຸກ ທີ່ວັນນະສອນ ຂໍມອບໃຫ້ແກ່ທ່ານຜູ້ຟັງທຸກໆທ່ານ ໂດຍສະເພາະບັນດາທ່ານທີ່ຂຽນທັງ email ແລະຂໍ້ຄວາມ ຝາກໄວ້ໃນ VOA website Facebook ແລະ Facebook – Live
ຕອນອອກອາກາດສົດໆ ແລະວັນນະສອນ ກໍເຊື່ອວ່າ ຖືກໃຈແຟນລາຍງານທຸກໆທ່ານ
ໃນບົດເພງ ຖາມຂ່າວບ່າວວຽງຈັນ ຂໍເຊີນໄປຟັງພ້ອມໆກັນເລີຍ.
ສ່ວນເພງ “ໄກເກີນຝັນ” ທີ່ຂັບຮ້ອງໂດຍ ວັນໄຊ ສົມສຸກ ແລະປະພັນໂດຍ ລືໄຊ ໄຊລືຊາ ນີ້ ວັນນະສອນ ຂໍຈັດໃຫ້ຕາມຄຳຂໍຂອງນ້ອງ ພອນ ກື້ ຜູ້ຟັງທີ່ຂຽນເຂົ້າມາຂໍຟັງ ຜ່ານທາງ FB ຂອງ VOA ແລະກໍຫວັງຢ່າງຍິ່ງວ່າ ນ້ອງພອນ ກື້ ຄົງຈະຕິດຕາມຮັບຟັງລາຍການ
ຂອງພວກເຮົາຢູ່ຕໍ່ໆໄປ ແລະມີຫຍັງດີໆຢູ່ໃສ ກໍຂໍໃຫ້ນ້ອງສົ່ງຂໍ້ຄວາມມາຫາທາງເຮົາດ້ວຍ.
ຂໍອຳລາທ່ານດ້ວຍຂັບລຳລາວທີ່ທຸກຄົນມັກ ເພາະຈະສັງເກດເຫັນວ່າ ພໍເພງນີ້ຂຶ້ນມາ
ຍາມໃດ ໃນທຸກໆງານສັງສັນ ກໍແມ່ນວ່າ ຜູ້ຄົນຫຼັ່ງໄຫຼອອກມາຢ້ອນກັນ… ເປັນທຳນອງ
ດັ່ງເດີມ ແຕ່ເນື້ອເພງຖືກແຕ່ງໄວ້ເພື່ອສັນລະເສີນຄູບາອາຈານ...ທີ່ຂັບໂດຍ ສາວລາວ
ເຜົ່າມົ້ງ...ກິ່ງແກ້ງ ກ່າວເຈີ່ປ່າວ ໃນບົດເພງ ຂັບທຸ່ມ ຊົມເຊີຍຄູ ຖ້າຟັງແຕ່ສຽງໂດຍບໍ່ໄດ້ຊາບນາມສະກຸນນ້ອງ ກິ່ງແກ້ວ ແລ້ວ ຫຼາຍໆທ່ານຄົງບໍ່ຕ້ອງສົງໄສ ໃນຄວາມເປັນສາວຫຼວງພະບາງ ເມືອງມໍລະດົກໂລກພຸ້ນ ຂໍໃຫ້ທ່ານຜູ້ຟັງມ່ວນຊື່ນ ໃນວັນທ້າຍສັບປະດາ
ກັບລາຍການສຽງເພງຈາກແດນໄກຂອງ VOA ຂໍໃຫ້ທຸກໆທ່ານ ນອນຫຼັບຝັນຫວານ.
