ສະບາຍດີ ແລະວັນນະສອນກໍດີໃຈທີ່ໄດ້ກັບມາພົບແຟນໆເພງ ໃນລາຍການສຽງເພງຈາກແດນໄກຂອງ VOA ໃນທຸກໆແລງວັນອາທິດ. ຄ່ຳຄືນນີ້ ວັນນະສອນ ມາຈັດເພງທີ່ມີຄວາມໝາຍດີເພງນຶ່ງທີ່ຂັບຮ້ອງໂດຍສິນລະປິນລາວ ອາເມຣິກັນ ຈາກລັດ Washington ທາງຝັ່ງຕາເວັນອອກສຽງເໜືອ ທ່ານສີສຸມັກ ທອງອຸໄລ ກໍແມ່ນຜູ້ນຶ່ງທີ່ມີບົດບາດໃນປະຊາຄົມລາວ ອາເມຣິກັນ ແລະເພງຂອງທ່ານສີສຸມັກ ທອງອຸໄລ ນີ້ຄົງຈະເຮັດໃຫ້ ຫຼາຍໆທ່ານ ຄິດຮອດບ້ານເກີດ ດັ່ງເນື້ອຄວາມແລະຊື່ຂອງເພງນີ້... ກໍຕ້ອງຂໍຂອບໃຈນຳທ່ານສີສຸໝັກ ທີ່ເປັນຜູ້ນຶ່ງທີ່ຄອຍເປັນກຳລັງໃຈແລະຕິດຕາມ VOA ຢ່າງສະເໝີຕົ້ນ ສະເໝີປາຍ ແລະກໍຍິ່ງດີໃຈທີ່ໄດ້ໃຫຍ່ເຫັນທ່ານສີສຸມັກ ຕິດຕາມພວກເຮົາທາງ Facebook Live.
ບໍ່ຮູ້ວ່າ ຈະກ່າວຄຳວ່າ “ຂອບໃຈ” ຫຼາຍຊ່ຳໃດ ຈຶ່ງຈະພໍກັບຄວາມຮູ້ສຶກດີໆ ຕໍ່ແຟນລາຍ ການ ທີ່ຄອຍຕິດຕາມພວກເຮົາຕະຫຼອດມາ ໂດຍສະເພາະບັນດາທ່ານທີ່ຕິດຕາມພວກເຮົາ ທາງ Facebook Live ຜູ້ຟັງຫຼາຍໆທ່ານ ບໍ່ວ່າຈາກ ສປປ ລາວ ປະເທດໄທ ແລະ ຍີ່ປຸ່ນ ກໍສົ່ງຂໍ້ເຂົ້າມາ ໃນຂະນະທີ່ພວກເຮົາອອກລາຍການຂ່າວທາງ Facebook Live ແລະບອກມາວ່າ ຟັງລາຍການວິທະຍຸ ຂອງພວກເຮົາ ຕອນອອກອາກາດສົດໆນັ້ນ ວັນນະສອນຈຶ່ງຂໍຖືໂອກາດນີ້ຈັດເພງຂອງສິນລະປິນ ລາວ ໃນຍີ່ປຸ່ນ ພາວັນດີ ມີໄຊ ໃຫ້ຟັງເພາະເພງນີ້ ໄດ້ບົງບອກເຖິງຄວາມງົດງາມ ຂອງອະລິຍະທຳ ວັດທະນະທຳຂອງພູມລຳເນົາ ແລະຄົນເຊື້ອຊາດລາວ...ຂໍເຊີນມ່ວນໆກັບເພງນີ້ ຄົນເຊື້ອຊາດລາວ.
ສ່ວນເພງສຸດທ້າຍນີ້ ຂໍຈັດໃຫ້ເປັນພິເສດ ເພື່ອລະລຶກເຖິງຄວາມໜ້າຮັກ ແລະສະເໜີຕົ້ນສະເໝີປາຍຂອງ ຍາລຸງບົວ ດຳຣົງ ຜູ້ຟັງທີ່ຢູ່ຄຽງຄູ່ກັບພວກເຮົາຕັ້ງແຕ່ຕອນ VOA ເປີດສະຖານີຄັ້ງທຳອິດ ປີ 1962 ຈົນເຖິງວາລະສຸດທ້າຍຂອງຊີວິດ ແລະເພື່ອສະດຸດີ ແລະລະລຶກເຖິງຄວາມມີນ້ຳໃຈແລະເອົາໃຈໃສ່ຂຽນຈົດໝາຍມາຫາທາງເຮົາ ຢູ່ບໍ່ຂາດ ວັນນະສອນ ຈຶ່ງຂອງຈັດເພງນີ້ ລ້ຳລາ ແລະສົ່ງດວງວິນຍານຂອງຍາລຸງໃຫ້ໄປຮອດ ໄປເຖິງສວງສະຫວັນຊັ້ນດາວວະດຶງດ້ວຍເຖີດ... ໃນບົດເພງ ລາກ່ອນຈາກ ຂອງ ມາລາວັນ ດວງພູມີ.
ຂໍໃຫ້ທຸກໆທ່ານນອນຫຼັບຝັນດີ.
