ໃນວັນຈັນທີ່ຈະມາເຖິງນີ້ ຊຶ່ງຈະເປັນວັນ "Memorial Day" ຊຶ່ງເປັນວັນລະລຶກເຖິງ
ດວງວິນຍານຂອງເຫຼົ່າບັນດາຜູ້ກ້າທີ່ໄດ້ເສຍສະລະເພື່ອປົກປ້ອງສະຫະລັດແລະ
ປະຊາກອນໃຫ້ຢູ່ເຢັນເປັນສຸກ ທາງລາຍການສຽງເພງຈາກແດນໄກຂອງ VOA ຈຶ່ງຈະມາຈັດເພງອະເມຣິກັນ ທີ່ມີຄວາມໝາຍສໍາຄັນ ເພື່ອສະດຸດີ, ສັນລະເສີນແລະ
ຂອບໃຈ ໃນທຸກໆບົດບາດ ແລະຄວາມເສຍສະລະຂອງພວກເຂົາເຈົ້າເຫຼົ່ານັ້ນ
ຂໍເຊີນເຂົ້າສູ່ລາຍງານໄດ້ນະບັດນີ້.
ສະບາຍດີ ຄ່ຳຄືນນີ້ ກໍເປັນອີກນຶ່ງມື້ ທີ່ທາງລາຍການສຽງເພງຈາກແດນໄກ ຂອງ
VOA ໃຫ້ຄວາມສຳຄັນ ໃນວັນພິເສດຂອງສະຫະລັດ. ວັນ Memorial Day
ເປັນວັນລຳລຶກເຖິງຄຸນງາມຄວາມດີຂອງເຫຼົ່າທະຫານ ຊຶ່ງຈະແມ່ນວັນຈັນມື້ອື່ນນີ້
ແລະວັນສໍາຄັນນີ້ໄດ້ຈັດໃຫ້ເປັນວັນຢຸດລັດຖະການ ປະຈຳທຸກປີ ເປັນວັນຍິ່ງໃຫຍ່
ຊຶ່ງກໍຈະມີການສະຫຼອງຕ່າງໆທີ່ສໍາຄັນຕາມຫົວເມືອງນ້ອຍໃຫຍ່ ໃນທົ່ວສະຫະລັດ
ຊຶ່ງຍາດພີ່ນ້ອງເພື່ອນຝູງ ຄົນຮັກ ຜູ້ທີ່ຈົງຮັກພັກດີ, ແລະຮູ້ບຸນຄຸນ ຕ່າງກໍຈະເອົາ
ທຸງຊາດອະເມຣິກັນ, ດອກໄມ້ແລະຂອງທີ່ລະລຶກ ໄປໄຫວ້ຄຳນັບຂຸມຝັງສົບຂອງ
ວິລະບຸລຸດເຫຼົ່ານີ້ ແລະວັນນະສອນ ຢາກນຳເອົາເພງທີ່ເໝາະສົມທີ່ສຸດ ໃນຄວາມ
ເສຍສະລະທັງໝົດຂອງບັນດາທະຫານເຫຼົ່ານັ້ນ ແມ່ນກະທັງຊີວິດຂອງພວກເພິ່ນ
ມາຝາກໃຫ້ເປັນຂອງຂວັນແກ່ທ່ານຜູ້ຟັງ ເພງທີ່ມີຄວາມໝາຍດີ ຊຶ່ງຊື່ແລະຄວາມ
ໝາຍຂອງເພງນີ້ " Some Gave All" ທີ່ຂັບຮ້ອງ ໂດຍ Billy Ray Cyrus.
ຂໍເຊີນໄປຟັງພ້ອມໆກັນເລີຍ.
ສ່ວນເພງ “Arlington” ທີ່ຂັບຮ້ອງໂດຍ Trace Adkins ນັ້ນແມ່ນເພງເສົ້າຊຶ່ງນັກ
ປະພັນເພງໄດ້ກ່າວເຖິງຄວາມຮູ້ສຶກຂອງທະຫານທີ່ວ່າ ພວກເຂົາເຈົ້າອາດຈະບໍ່ໄດ້
ວາງແຜນໃນບັ້ນສຸດທ້າຍຂອງຊີວິດໄວ້ ທີ່ວ່າຈະຝັງຮ່າງຕົວເອງໄວ້ຢູ່ສະຖານທີ່ໃດ
ແຕ່ຄຳວ່າ “Arlington” ມັນມີຄວາມໝາຍອັນຍິ່ງໃຫຍ່ກວ່າ ເພາະວ່າ ກວ່າຈະໄດ້
ນຳສົບເຂົ້າຝັ່ງໄວ້ໃນສຸສານແຫ່ງຊາດນັ້ນ ຈະຕ້ອງເປັນການເສຍຊີວິດໃນສະໜາມລົບ
ຊຶ່ງມັນຍິ່ງໃຫຍ່ແທ້ໆ ເພາະໄດ້ປະຕິບັດພາລະໜ້າທີ່ເພື່ອຊາດແທ້ໆ ເພາະວ່າ
ຊາດຕ້ອງມາກ່ອນ...ໃນຄວາມເປັນຊາຍຊາດທະຫານ ຕ້ອງມີພາລະໜ້າທີ່ເປັນ
ທະຫານປົກປ້ອງປະເທດໃຫ້ເຖິງທີ່ສຸດ ເນື້ອໃນຂອງເພງ ກໍແມ່ນວ່າ ຮ່າງກາຍທີ່ໄຮ້
ວິນຍານຂອງຂ້າພະເຈົ້າ ຈຶ່ງໄດ້ຖືກນຳມາຍັງສະຖານທີ່ແຫ່ນີ້ ທີ່ເອີ້ນວ່າ Arlington
ຊຶ່ງເປັນສຸສານແຫ່ງຊາດ...ຟັງແລ້ວນ້ຳຕາຊຶມ...
ວັນນະສອນ ພ້ອມດ້ວຍຄະນະ VOA ຂໍສົ່ງແຮງໃຈແລະຂໍກ່າວຄໍາວ່າ ຂອບໃຈແລະ
ຮູ້ບຸນຄຸນ ມາຍັງບັນດາທະຫານທັງຍິງແລະຊາຍ ຜູ້ທີ່ກໍາລັງດໍາເນີນແລະສືບຕໍ່ໃນ
ສະໝໍລະພູມສູ້ລົບຢູ່ໃນຂະນະນີ້. ຂໍໃຫ້ສິ່ງສັກສິດຢູ່ໃນສາກົນລະໂລກນີ້ ຈົ່ງໄດ້ປົກ
ປ້ອງແລະຄຸ້ມຄອງພວກທ່ານ ຈຶ່ງຂໍມອບເພງທີ່ມີຄວາມໝາຍນີ້ ໃຫ້ແກ່ພວກທະຫານ
ຫັງຫຼາຍທັງປວງ ພວກຊຶ່ງໄດ້ມອບທຸກສິ່ງຢ່າງໃຫ້ປະເທດຊາດບ້ານເມືອງ ແລະເພງ
ທີ່ມີຄວາມໝາຍດີອີກເພງນຶ່ງແມ່ນເພງ “Unknown Soldier” ທີ່ຂັບຮ້ອງໂດຍ
Jeff Moor ຊຶ່ງເປັນທີ່ມາຂອງຂຸມຝັ່ງສົບ ນິລະນາມ ທີ່ສຸສານແຫ່ງຊາດ Arlington
ຊຶ່ງປະທານາທິບໍດີສະຫະລັດຈະຕ້ອງນຳເອົາພວກມາໄປຄຳນັບ ເພາະເປັນຂີດໝາຍ
ຂອງການໃຫ້ກຽດແລະຮູ້ບຸນຄຸນ ເພື່ອສັນລະເສີນ ສະດຸດີ ລະລຶກເຖິງ ແລະຂອບໃຈ
ສຳລັບຢາດເລືອດ ເຫື່ອແຮງງານ, ຄວາມມີນໍ້າໃຈ ຂອງພວກເພິ່ນທີ່ເສຍສະລະ ທັງຫຼາຍ
ທັງປວງ ຮວມທັງພວກທີ່ມີຊື່ສຽງລຽງນາມ ແລະພວກວິລະບຸລຸດນິລະນາມທີ່ເປັນຮົ້ວ
ປ້ອງກັນຊາດ ທີ່ນໍາເອົາສັນຕິສຸກ ແລະເສລິພາບມາ ສູ່ປະຊາຊົນ ແລະຜືນແຜ່ນດິນນີ້
ອາເມຣິກາ.
