ສະບາຍດີທຸກໆທ່ານ ວັນນະສອນດີໃຈ ທີ່ໄດ້ກັບມາພົບແຟນໆເພງ ໃນລາຍການສຽງເພງ
ຈາກແດນໄກຂອງ VOA ໃນທຸກໆແລງວັນອາທິດ. ໃນໄລຍະຫຼັງໆນີ້ ບໍ່ເຫັນທ່ານຜູ້ຟັງ
ຂຽນເຂົ້າມາຖາມໄຖ່ສະບາຍດີກັນເລີຍ ແຕ່ເຖິງຢ່າງໃດກໍຕາມ ກໍຫວັງວ່າ ທ່ານຜູ້ຟັງກໍຍັງ
ຮັບຟັງເພງທີ່ວັນນະສອນ ຈັດໃຫ້ຢູ່ເໜາະ ມື້ນີ້ເຮົາຂໍເລີ່ມດ້ວຍເພງຂອງສິນລະປິນສຽງ
ຄຸນນະພາບ ສິດທິພອນ ສຸວັນນະສຸກ ທີ່ມີຜົນງານອອກມາໃຫ້ພວກເຮົາຮັບຟັງກັນ
ເລື້ອຍໆ ເພງປິດສະໜາໃຈ ຊ່າງເໝາະກັບບັນຍາກາດແບບນີ້...ທີ່ອາກາດຄ້ອນຂ້າງ
ໜາວເຢັນແບບນີ້…ຟັງເພງໄປ ຄິດຮອດຄົນຮັກໄປ.
ວັນນະສອນຕັ້ງໃຈວ່າຈະຝາກຄວາມຮັກ ຄວາມຄິດເຖິງ ແລະຄວາມຫ່ວງຫາອາທອນ
ມາກັບສຽງເພງນີ້…ຄື້ນຂອງຄວາມຄິດເຖິງ ເປັນຜົນງານສິນລະປິນສາວແຖວໜ້າຂອງ
ວົງການເພງລາວ ອາລຸນາ ຖາວອນສຸກ ແລະກໍຫວັງວ່າ ອາລຸນາ ຈະມີຜົນງານເພງ
ຊຸດໃໝ່ມາໃຫ້ພວກເຮົາ ໄດ້ຮັບຟັງກັນອີກ. ເອົາມາຟັງພ້ອມໆກັນເລີຍ.
ພ້ອມນີ້ ຂໍຝາກເພງ “ສະຫັວນແດນຮັກ” ທີ່ປະພັນໂດຍອາຈານ ສ. ແສງສິຣິວັນ ຊຶ່ງເພງ
ດັ່ງກ່າວເປັນທີ່ນິຍົມກັນຫຼາຍໃນໝູ່ສິນລະປິນ ທີ່ໄດ້ພາກັນນຳມາຂັບຮ້ອງ ສ່ວນສະບັບນີ້
ເປັນຂອງສິນລະປິນລາວ-ອາເມຣິກັນ ຈາກລັດ ເນວາດາ ຊາລີ ສິດທິຊຸມພອນ ຊຶ່ງຜູ້ກ່ຽວ
ກໍເປັນນຶ່ງສິນລະປິນ ຂອງວົງລາວເວກັສ ຄອຍສະໜັບສະໜຸນ ອູ້ມຊູປະຊາຄົມລາວ
ໃນນະຄອນລັສເວກັສ ທາງເຮົາຈຶ່ງຂໍສັນລະເສີນແລະໃຫ້ສືບທອດວັດທະນະທຳ
ການດົນຕີຂອງລາວໃຫ້ຄົງຢູ່ກັບລູກຫຼານລາວ ຕໍ່ໆໄປ. ເພງສະຫັວນແດນຮັກ ເປັນເພງ
ທີ່ມີຄວາມໝາຍ ກິນໃຈ ທັງເນື້ອຮ້ອງແລະທຳນອງ ບໍ່ວ່າຈະແມ່ນສິນລະປິນທ່ານໃດ
ນຳມາຂັບຮ້ອງກໍຕາມ ແຕ່ຄວາມຫວານຂອງເພງຍັງປະທັບໃຈແລະມ່ວນຊື່ນ ສະເໝີມາ
ຊຶ່ງຟັງຍາມໃດ ກໍເຄີບຕາມເພງໄປ ຢ່າລືມກັບມາຟັງເພງມ່ວນໆກັບພວກເຮົາອີກ ຂໍໃຫ້
ທຸກໆທ່ານຈົ່ງນອນຫຼັບຝັນດີ ພົບກັນໃໝ່ໃນສັບປະດາໜ້າ.
