ທ່ານຜູ້ຟັງທີ່ເຄົາຣົບ ລາຍການສຽງເພງຈາກແດນໄກ ຂອງວີໂອເອ ໃນແລງວັນອາທິດມື້ນີ້
ວັນນະສອນ ຈະມາຈັດເພງລາວ ມາສະເໜີທ່ານ ກະລຸນາເຂົ້າສູ່ລາຍການຂອງເຮົາ
ແລະວ່າໄດ້ນະບັດນີ້
ສະບາຍດີທຸກໆທ່ານ ແລະຍິນດີຕ້ອນຮັບທ່ານຜູ້ຟັງເຂົ້າສູ່ລາຍການສຽງເພງຈາກແດນໄກຂອງ VOA ໃນທຸກໆວັນອາທິດ ຄໍ່າຄືນນີ້ ແມ່ນຖືວ່າພິເສດສຸດ ເພາະວ່າທາງເຮົາຫາ ກໍໄດ້ຮັບເພງພິເສດນີ້ຈາກທາງທີມງານຂອງນ້ອງໂຈໂຈ ມິຣາໂກ ມື້ນີ້ ແລະຕັ້ງໃຈຈະມາກ່ອມທ່ານຜູ້ຟັງ ທີ່ມັກຮັກໃນດົນຕີແລະສຽງເພງລາວ ນີ້ແມ່ນເພງນຶ່ງທີ່ຖືວ່າມາແຮງສຸດຢູ່ໃນຂະນະນີ້ ມີຍອດ Like ໃນ Youtube ເປັນແສນເປັນລ້ານໄປແລ້ວຊຶ່ງເພງນີ້ ມີຄວາມພິເສດເພາະມັນເປັນເພງກະສັບສາຍສຳພັນຂອງປະເທດລາວໄທ ບໍ່ວ່າທາງພາສາ ວັດທະນະທຳ ແລະປະເພນີຂອງຜູ້ຄົນສອງຝາກຝັ່ງແມ່ນ້ຳຂອງ…ເພງນິລັນດອນ ແຕ່ງໂດຍຊະວັນວິດ ຍິ່ງຍົດເສນີ ແລະໄດ້ນຳເອົາ ທັງສອງສິນລະປິນຕ່າຍ ອໍຣະໄທ ຈາກປະເທດໄທ ແລະໂຈໂຈ ມິຣາໂກ ສິນລະປິນ R&B ຄຸນນະພາບ ຈາກ
ສປປ ລາວ ມາຮ້ອງຄູ່ກັນ ແລະສາມາດແຍກຮ້ອງດຽວໄດ້ ຊຶ່ງສະບັບນີ້ ວັນນະສອນ ຂໍເເນະນຳ
ທີ່ເປັນສະບັບຂອງນ້ອງໂຈໂຈ ມິຣາໂກ ແລະຖ້າທ່ານໃດສົນໃຈຢາກຊົມ music video ເພີ້ມຕື່ມ ກໍໃຫ້ໄປເບິ່ງໃນ Youtube ໄດ້ ຊຶ່ງມີນາງເອກເປັນນາງງາມລາວຈັກກະວານ ຫຼື Miss Lao Universe ປີ 2017 ຜູ້ທຳອິດ ມາເປັນນາງເອກ ແລະສ່ວນພະເອກ ກໍແມ່ນຈາກປະເທດໄທ ຫວັງວ່າ ເພງນີ້ຄົງຈະຖືໃຈທ່ານຜູ້ຟັງບໍ່ຫຼາຍກໍໜ້ອຍ ແລະໂອກາດໜ້າ ທາງເຮົາຈະນຳສະເໜີເພງຄູ່ໃຫ້ຟັງ ຂໍຂອບໃຈທາງທີມງານນ້ອງໂຈໆ ທີ່ສົ່ງເພງມາໃຫ້ ແລະທາງວີໂອເອ ຂໍເປັນກຳລັງໃຈ ໃຫ້ໂຈໆ ສ້າງຜົນງານດີໆໃຫ້ທຸກໆຄົນ ໃນທົ່ວໂລກ ໄດ້ຮັບຟັງເພງລາວ ມ່ວນໆອີກ ໃນອານາຄົດອັນໃກ້ນີ້. ນອກຈາກໂຈໂຈ ຈະເປັນສິນລະປິນຄຸນນະພາບແລ້ວ ໂຈໂຈ ຍັງເປັນຜູ້ກຳກັບຮູບເງົາໜຸ່ມໄຟແຮງອີກດ້ວຍ ແລະຂໍຝາກໂຈໂຈ ໄວ້ໃນດວງໃຈຂອງທ່ານຜູ້ຟັງ ອີກຕື່ມຄົນນຶ່ງ ໃນຖານະສິນລະປິນລາວ.
ສ່ວນເພງ ຟືນດົ້ນເກົ່າ ຂອງອຸດອນ ວົງສີ ນີ້ ຈັດໃຫ້ທ່ານຜູ້ຟັງ ຈາກຍີ່ປຸ່ນ ທີ່ຂຽນເຂົ້າມາເພື່ອມອບໃຫ້ອ້າຍເພັດ ແລະເອື້ອຍສູງ ທີ່ເມືອງຮະດະໂນ ທີ່ຍີ່ປຸ່ນ ແລະກໍຫວັງຢ່າງຍິ່ງວ່າ ທັງສອງທ່ານທີ່ກ່າວນາມມານັ້ນ ຄົງ ຈະດີໃຈ ທີ່ມີຄົນຈັດເພງມອບໃຫ້ ແລະກໍຢ່າລືມຂຽນເຂົ້າມາຫາທາງເຮົາອີກເດີ. ຂໍຂອບໃຈທີ່ຄອຍຕິດຕາມ.
ຂໍປິດທ້າຍລາຍການດ້ວຍເພງ ລົມໜາວທີ່ບ້ານເກີດ ທີ່ຂັບຮ້ອງໂດຍສິນລະປິນລາວ ຈາກລັສເວກັສ ສະຫະລັດ Charlie ສິດທິຊຸມພອນ ຊຶ່ງເພງ single ນີ້ ຫາກໍປ່ອຍອອກມາເມື່ອບໍ່ດົນມານີ້ ແລະສົ່ງໃຫ້ທາງເຮົາໄດ້ເປີດຕ້ອນຮັບລົມໜາວ ໃນຊ່ວງນີ້ ຊຶ່ງທາງລັສເວກັສ ກໍໄດ້ມີຫິມະຕົກເປັນປະຫວັດການ ຊຶ່ງຄັ້ງຫຼ້າສຸດ ທີ່ມີຫິມມະຕົກນັ້ນ ແມ່ນເມື່ອ ນຶ່ງທົດສະວັດ ຜ່ານມາແລ້ວ ເອົາຈັ່ງໃດ ກໍຂໍໃຫ້ຮັກສາສຸຂະພາບ ເພື່ອທີ່ທ່ານຈະໄດ້ມານັ່ງຟັງເພງຮ່ວມກັນ ແລະຫວັງວ່າ ເພງ ລົມໜາວທີ່ບ້ານເກີດ ນີ້ ຄົງຈະເຮັດໃຫ້ຫຼາຍໆທ່ານຫາຍເຫງົາແລະຢາກກັບໄປຊົບອາຍອຸ່ນ ຈາກຜູ້ໃດບາງຄົນ…ດັ່ງຄວາມໝາຍເນື້ອຫາຂອງເພງນີ້ ຂໍໃຫ້ທຸກໆທ່ານນອນຫຼັບຝັນຫວານ ແລະພົບກັນໃໝ່ ໃນສະບັບໜ້າ.
