ສະບາຍດີທຸກໆທ່ານ ແລະຍິນດີຕ້ອນຮັບທ່ານຜູ້ຟັງເຂົ້າສູ່
ລາຍການສຽງເພງຈາກ ແດນໄກຂອງ VOA ຊຶ່ງມື້ນີ້ ມາຈັດເພງໃຫ້ນ້ອງ ນຸກ ແສງຄຳຢອງ ຈາກບ້ານໂຊກຄຳ ວຽງຈັນ ທີ່ວັນນະສອນ ຕິດຄ້າງໄວ້ອາທິດແລ້ວ ຫວັງວ່ານ້ອງ Knouk
ຄົງຈະບໍ່ວ່າກັນ ນ້ອງຂໍຟັງເພງ ຊຳເໜືອແດນງາມ ຊຶ່ງເອື້ອຍວັນນະສອນ ຂໍຈັດສະບັບທີ່
ໄກສີ ວັງເວີນຂອງ ເປັນຄົນຂັບຮ້ອງ ເພາະວ່າເພງນີ້ ໄດ້ມີຫຼາຍສິນລະປິນ ນຳມາຂັບຮ້ອງແລະວ່າ ຖ້າທ່ານຜູ້ຟັງທ່ານໃດ ຢາກຟັງເພງຫຍັງເປັນພິເສດ ກໍສາມາດຂຽນເຂົ້າມາຫາທາງລາຍການ ໄດ້ທີ່ lao@voanews.com…ເພາະວ່າຈະໄດ້ຈັດໃຫ້ຖືກໃຈ…
ສ່ວນຂໍ້ຄວາມຕໍ່ໄປນີ້ ມາຈາກທ່ານ ທ່ານ ສົມເພັດ ອັກຄະວົງ ປະທານສະມາຄົມຊ່ວຍເຫຼືອ
ເດັກນ້ອຍພິການ (ສຊດພ), ຊຶ່ງທ່ານສົມເພັດກແມ່ນຜູ້ໜຶ່ງທີ່ຕິດຕາມລາຍການວິທະຍຸ VOA ພາກພາສາລາວ ເປັນປະຈຳ ພ້ອມທັງເຂົ້າໄປອ່ານຂ່າວຕ່າງໆຂອງ VOA ທາງ Face Book ທັງໃສ່ນ້ຳອ້ອຍນ້ຳຕານ ຍ້ອງມາວ່າ “ມັກສຳນຽງສຽງຫຼວງພຣະບາງ ເພາະເປັນສຽງທີ່
ຫວານອ່ອນໂຍນຟັງແລ້ວແມ່ນມີຄວາມປະທັບໃຈວ່າຊັ້ນ…ພ້ອມນີ້ທ່ານສົມເພັດ ຍັງຂໍປະຊາ
ສຳພັນກ່ຽວກັບໂຄງການດັ່ງກ່າວວ່າ ຖ້າຫາກວ່າປະຊາຄົມລາວໃນທົ່ວໂລກ ມີປະສົງຢາກຈະສົມທົບອຸບປະກອນການຮຽນການສຶກສາ ໃຫ້ແກ່ພວກເດັກນ້ອຍພິການເຫຼົ່ານີ້ ກໍຖືວ່າເປັນກຸສົນຜົນບຸນຢ່າງມະຫາສານ ເພາະເດັກນ້ອຍເຫຼົ່ານີ້ ຈະໄດ້ຮ່ຳຮຽນແລະຍິ່ງໄປກວ່ານັ້ນ ກໍຄືການມີຄວາມຮູ້ສຶກທີ່ດີ ທີ່ວ່າ ຍັງມີເພື່ອນມະນຸດດ້ວຍກັນ ໃຫ້ຄວາມຮັກແລະຫ່ວງໃຍເຖິງພວກເຂົາເຫຼົ່ານີ້. ທ່ານສົມເພັດ ຂໍຟັງເພງ ມະຍຸຣີ ຂອງອາຈານ ວໍຣະເດດ ດິດທະວົງ …ວັນນະສອນ ຈຶ່ງຂໍຈັດເພງນີ້ມອບໃຫ້ແທນຄຳຂອບໃຈ ທີ່ທ່ານສົມເພັດຍ້ອງມາ.
ສ່ວນເພງສຸດທ້າຍນີ້ ຂໍຈັດເພງທີ່ມີຄວາມໝາຍດີ ທີ່ມີຊື່ວ່າ ລົ້ນຟ້າເຫຼືອແຜ່ນດິນ ທີ່ສິນລະ
ປິນ ລາວ-ອາເມຣິກັນ ເປັນຄົນແຕ່ງແລະຂັບຮ້ອງໂດຍ ຕິກ ນໍຣະສິງ ຊຶ່ງໄດ້ບັນລະຍາຍເຖິງຄຸນງາມຄວາມດີຂອງບໍ່ແມ່ຜູ້ບັງເກີດເກົ້າທີ່ໃຫ້ກຳເນີດຂອງລູກທັງຫຼາຍ ເອື້ອຍວັນນະສອນ ສາມາດເວົ້າໄດ້ເຕັມປາດເຕັມຄຳວ່າ ເຖິງແມ່ນວ່າພວກເຮົາບໍ່ສາມາດເລືອກເກີດໄດ້ ແຕ່ພວກເຮົາກໍສາມາດທີ່ຈະເລືອກກະທຳໃນສິ່ງທີ່ດີແລະຊອບທຳໄດ້ ຂໍສົ່ງກຳລັງໃຈໄປໃຫ້ພວກນ້ອງໆຈົ່ງຕັ້ງໃຈ ແລະອົດທົນ ຍອມຮັບໃນສິ່ງທີ່ເຮົາເປັນແລະເຮັດໃຫ້ເຖິງທີ່ສຸດ ສູ້ທົນທີ່ສຸດ ແລະຫວັງວ່າເພງນີ້ ຄົງຈະຊ່ອຍໃຫ້ພວກນ້ອງໆຍິ້ມໄດ້ອີກນຶ່ງມື້ ແລະຫວັງຢ່າງຍິ່ງວ່າ ຄົງຈະໄດ້ມີໂອກາດພົບພໍ້ແລະປະສານງານຮ່ວມກັນເຈົ້າ.
ຂໍໃຫ້ທຸກໆທ່ານນອນຫຼັບຝັນດີ
ຖ້າທ່ານໃດສົນໃຈ ຢາກຊ່ອຍເຫຼືອທັງເຮືອແຮງແລະປັດໃຈ ສິ່ງຂອງຢ່າງໃດກໍຕາມ
ໃຫ້ແກ່ສະມາຄົມເດັກນ້ອຍພິການ ຫຼື Aid Children With Disability Association
ກະລຸນຕິດຕໍ່ສອບຖາມ ທ່ານ ສົມເພັດ ອັກຄະວົງໄດ້ ທີ່
www.facebook.com/somphet.akhavong.3