ສບາຍດີແລະກັບມາພົບກັນເຊັ່ນເຄີຍໃນຣາຍການສຽງເພງຈາກແດນໄກ ຄ່ຳຄືນນີ້ ວັນນະ
ສອນຕັ້ງໃຈທີ່ຈະມາເປີດເພງລາວມ່ວນໆທີ່ມີຄວາມໝາຍດີ ກ່ຽວກັບວັນແມ່ຍິງສາກົນ ວັນທີ 8 ມີນາ ຜ່ານມານີ້ ເພງນີ້ເໝາະສົມທັງຊື່ເພງແລະຄວາມໝາຍ ຂໍມອບເປັນກຳລັງໃຈໃຫ້ແກ່ແມ່ຍິງລາວທຸກໆທ່ານໃນສາກົນລະໂລກນີ້ ວັນນະສອນພ້ອມດ້ວຍຄະນະວິທະຍຸ VOA
ຂໍອວຍພອນໃຫ້ບັນດາແມ່ຍິງທັງຫຼາຍຈົ່ງມີແຕ່ຄວາມຈະເລີນກ້າວໜ້າແລະສວມບົດບາດແມ່ຍິງໃຫ້ຖືກຕ້ອງ ຂໍໃຫ້ມີກຳລັງໃຈຕໍ່ສູ້ໃນທຸກໆສະຖານະການ ບໍ່ຕ້ອງຫວັ່ນໄຫວກັບສຽງນິນທາອື່ນໆ ຂໍໃຫ້ມີຄວາມຕັ້ງໃຈ ອົດທົນແລະຢືນຢັດຢູ່ບົນພື້ນຖານຂອງຄວາມເປັນຈິງ ດວ້ຍຄວາມສະງ່າງາມແລະພູມໃຈ ບໍ່ໄດ້ດ້ອຍໄປກວ່າເພດໃດໆທັງນັ້ນ ເອົາຂໍເຊີນໄປຟັງເພງ ນາງຟ້າ ຂອງວົງເມດູເຊຍ ພ້ອມໆກັນເລີຍ ວ່າຈະເໝາະສົມກັບກັບຊື່ຂອງເພງນີ້ບໍ່……
ສ່ວນເພງຕໍ່ໄປນີ້ ຂໍຈັດມອບໃຫ້ທ່ານຕາມຄຳຂໍຂອງ Samone Sky ທີ່ຂຽນເຂົ້າມາໃນໜ້າ FB ຂອງ VOA ຂໍຟັງເພງພະຄຸນແມ່ ຂອງວົງ Unicon ວັນນະສອນວ່າເພງ ພະຄຸນແມ່ ກໍເປັນອີກເພງນຶ່ງທີ່ໄດ້ອະທິບາຍເຖິງຄຸ່ນຄ່າແລະຄຸນງາມຄວາມດີ ຂອງແມ່ຍິງໃນທຸກໆ
ບົດບາດ ຊຶ່ງບາງຄັ້ງກໍຮັບພາລະຢ່າງໃຫຍ່ຫຼວງ ແບບລົ້ນເກົ້າເຫຼືອແຜ່ນດິນ. ຂໍເຊີນຮັບ
ຟັງໄດ້...
ສ່ວນເພງສຸດທ້າຍນີ້ ວັນນະສອນ ຂໍຈັດມອບເປັນກຳລັງໃຈໃຫ້ແກ່ບັນດາແມ່ຍິງລາວ ໂດຍສະເພາະພວກທີ່ຮັບພາລະເປັນທັງແມ່ພິມຂອງຊາດ ເປັນທັງແມ່ ແລະພັນລະຍາ ທີ່ດີຕໍ່ຄອບຄົວ ແລະເປັນທັງຄູບາອາຈານ ສິດສອນ ໃຫ້ຄວາມຮູ້ ຄວາມສາມາດ ຕໍ່ພວກ
ເດັກນ້ອຍທັງຫຼາຍ ຂໍຂອບໃຈສຳຫຼັບຄວາມບາກບັ່ນອົດທົນໃນພາລະໜ້າທີ່ທີ່ໄດ້ຮັບມາ
ຂໍສັນລະເສີນແລະຂໍເປັນກຳລັງໃຈໃຫ້ສືບຕໍ່ ໃນບົດບາດນີ້ ຕໍ່ໆໄປ... ຈຶ່ງຂໍມອບເພງນີ້
ໃຫ້ແກ່ແມ່ຍິງລາວທຸກໆທ່ານເລີຍ ໃນບົດເພງ ດວງຈຳປາ ທີ່ຂັບຮ້ອງໂດຍ ນ້ອຍ ແສງສຸຣິຍາ.
