ສະບາຍດີທ່ານຜູ້ຟັງທີ່ເຄົາລົບ ອາກາດໃນ Washington DC
ດີຫຼາຍແລ້ວ ແຕ່ເຊົ້າໆກໍຍັງໜາວຢູ່ ເພາະວ່າຍ່າງເຂົ້າລະດູບານ
ໃໝ່ແລ່ວ ອີກປະມານ 2 ອາທິດຂ້າງໜ້ານີ້ ຜູ້ຄົນຈາກທົ່ວທຸກມຸມ
ໂລກ ກໍຈະໄດ້ພາກັນຫຼັ່ງໄຫຼເຂົ້າມາຊົມດອກຊາກຸຣະ ໃນນະຄອນ
ຫຼວງວໍຊີງຕັນ ດີຊີ ຊຶ່ງເປັນສັນຍາລັກຂອງສາຍພົວພັນຂອງຍີ່ປຸ່ນ
ກັບ ສະຫະລັດ ທີ່ມີນານກວ່າ 50 ປີ ແລ້ວ ຖ້າທ່ານຜູ້ຟັງຢາກມາ
ຊົມມາເບິ່ງ ກໍໃຫ້ມາປະມານສັບປະດາທີ 2 ຂອງເດືອນເມສາ ເພາະ
ດອກຊາກຸຣະ ກໍຈະບານສະພັ້ງ ຂາວປົນຊົມພູອ່ອນໆ ຈົນບໍ່ເຫັນ
ຮອດໃບພຸ້ນລະ ງາມຫຼາຍແທ້ໂອ໊...ຕ້ອງມາເຫັນໃຫ້ໄດ້ເດີ...ເອົາ
ເຂົ້າມາຟັງເພງນຳກັນກ່ອນ ເປັນເພງໃນຊຸດໃໝ່ຂອງສອງສິນລະ
ປິນຈາກປະເທດຝຣັ່ງ ທັງຄູນ ສັກດາແລະ ດາຣັດ ຈັນທະເສນ ທີ່
ຫາກໍຈັດພິທີເປີດຕົວເພງຊຸດໃໝ່ຫວ່າງໄວໆມານີ້ ທີ່ປະເທດຝຣັ່ງ.
ວັນນະສອນຂໍເລີ້ມດ້ວຍເພງ “ຄືນທີ່ລໍຄອຍ” ທີ່ຂັບຮ້ອງໂດຍ ສິນລະປິນສາວ ດາຣັດ ຈັນທະເສນ ຈັດໃຫ້ທ່ານຜູ້ຟັງ ນ້ອງ ເພັງສີສຸກ ນວນ ຜູ້ຟັງຈາກ ສປປ ລາວ ທີ່ເປັນແຟນຄລັບ ທາງ Facebook ແລະບອກມາວ່າຮັບຟັງ VOA ທຸກໆຄືນວ່າຊັ້ນ ເອົາຫວັງວ່ານ້ອງເພັງສີສຸກ ຄົງຈະສືບຕໍ່ຮັບຟັງ VOA ສະເໝີໄປ. ຂໍເຊີນໄປຮັບຟັງພ້ອມໆກັນເລີຍ.
ຈັ່ງໃດກໍໄດ້ແນະນຳຜົນງານເພງຂອງສິນລະປິນສາວໄປແລ້ວ ວັນນະສອນ ຂໍນຳສະເໜີ
ເພງຂອງສິນລະປິນຊາຍ ແລະວ່າຫຼາຍໆທ່ານຄົງຈະຄຸ້ນເຄີຍ ກັບສິນລະປິນທ່ານນີ້ແດ່ແລ້ວ ເພາະໄດ້ຄ້ຳວອນຢູ່ໃນວົງການເພງ ໃນປະຊາຄົມລາວທີ່ປະເທດຝຣັ່ງ ມາເນີນນານ ກໍບໍ່ຕ້ອງອະທິບາຍໃຫ້ຍຶດຍາວ ໄປຟັງເພງ “ສາຣະພາບຮັກ” ຂອງ ຄູນ ສັກດາ ພ້ອມໆກັນເລີຍ
ວັນນະສອນຕ້ອງຂໍຂອບໃຈທີ່ທ່ານຜູ້ຟັງໄດ້ຝາກທັງ email ແລະຂໍ້ຄວາມໄວ້ທັງ VOA website ແລະ Facebook ທີ່ວ່າ ມັກຕິດຕາມຮັບຟັງລາຍການຂອງ VOA ວ່າຊັ້ນ ແລະຫັວງວ່າ ຄົງຈະໄດ້ເຫັນທ່ານຜູ້ຟັງຂຽນເຂົ້າມາຫາອີກ ເພງ ຟັງນະທີ່ຮັກ ທີ່ຂັບຮ້ອງໂດຍ ສຸດທະລິດ ກັນຍາວົງ ນີ້ ຂໍຈັດມອບໃຫ້ທ່ານແສງສະຫວັດ ຣາຊາສັກ ທີ່ຂຽນເຂົ້າມາຂໍຟັງຕັ້ງນານແລ້ວ ແຕ່ກໍຕ້ອງລໍຕາມຄິວ ຫວັງວ່າທ່ານແສງສະຫວັດ ຄົງຈະບໍ່ນ້ອຍໃຈ ເບື່ອຟັງ VOA ເສຍລະ. ເພງ ຟັງນະທີ່ຮັກ ນີ້ ຕົ້ນສະບັບເປັນຂອງສິນລະປິນຮຸ້ນອາວຸໂສ ບຸນທົງ ວົງສາສີ ວັນນະສອນວ່າເພງນີ້ ຄົງພາໃຫ້ຫຼາຍໆທ່ານຄິດເຖິງຄວາມເກົ່າຄວາມຫຼັງ.
ຂໍຈົ່ງນອນຫຼັບຝັນດີ ແລະພົບກັນໃໝ່ໃນສັບປະດາໜ້າ.
