ສະບາຍດີ ແລະຍິນດີຕ້ອນຮັບທ່ານຜູ້ຟັງເຂົ້າສູ່ລາຍການສຽງເພງຈາກແດນໄກຂອງ VOA ຄ່ຳຄືນມື້ນີ້ ວັນນະສອນ ຂໍຈັດເພງ ຫອມກິ່ນຈຳປາ ທີ່ຂັບຮ້ອງໂດຍ ລີກ ອຸດົມໄຊ ເພື່ອຈັດໃຫ້ແຟນລາຍການຈາກຍີ່ປຸ່ນ ທີ່ຂຽນເຂົ້າມາຂໍຟັງຜ່ານທາງ Facebook ເພງນີ້ເປັນເພງນຶ່ງທີ່ມີຄວາມໝາຍດີ ແລະວັນນະສອນ ເຊື່ອແນ່ວ່າຫຼາຍໆທ່ານຄົງຈະຢາກກັບໄປດົມກິ່ນດອກຈຳປາ ທີ່ມາຕຸພູມບ້ານເກີດເປັນແນ່ແທ້ ດັ່ງທີ່ເນື້ອໃນຂອງເພງນີ້... ຂໍເຊີນໄປຟັງພ້ອມໆກັນເລີຍ...
ສ່ວນເພງ ຫຼວງພຣະບາງເມື່ອຍາມແລງ ທີ່ຂັບຮ້ອງໂດຍ ມາລີຈັນສຸກ ນີ້ ຈັດໃຫ້ທ່ານຜູ້ຟັງທັງຫຼາຍທີ່ຂຽນຂໍ້ຄວາມໄວ້ ໃນ website ທີ່ຄອຍຕິດຕາມ VOA ສະເໝີມາ ພ້ອມທັງຂຽນຂໍ້ຄວາມຕິຊົມ ຝາກໄວ້ ໃນ Facebook Live ໃນຂະນະທີ່ພວກເຮົາ ຈັດທຳລາຍການອອກອາກາດ ສົດໃນທຸກໆວັນອັງຄານແລະວັນພຸດ. ທາງທີມງານພວກເຮົາ ທຸກໆຄົນພະຍາຍາມນຳສິ່ງໃໝ່ໆ ແລະຂ່າວຮອບໂລກຫຼ້າສຸດ ມາສະເໜີທ່ານ ຈຶ່ງຂໍຂອບໃຈແລະ ຂໍຈັດເພງ ຫຼວງພຣະບາງເມື່ອຍາມແລງ ມອບໃຫ້ ແລະຢ່າລືມຂຽນເຂົ້າມາຫຼາຍໆ ມີຫຍັງກໍບອກ ເພາະເຮົາເປັນຄອບຄົວດຽວກັນແລ້ວ.
ຂໍສົ່ງທ່ານຜູ້ຟັງເຂົ້ານອນ ດ້ວຍເພງ ຮ້ອງເພງ ຂອງວົງ ໜຸ່ມລາວ ຊຶ່ງປະຈຸບັນ ໄດ້ປ່ຽນຊື່ມາເປັນວົງ ຈິດປັນຍາ ຕາມນາມສະກຸນ ທີ່ມີ 3 ອ້າຍນ້ອງຕະກຸນ ຈິດປັນຍາ ເປັນຜູ້ຮ້ອງແລະຫຼິ້ນດົນຕີ ແລະແຕ່ງເພງນໍາ. ຖ້າທ່ານຜູ້ຟັງມັກ ເພງສິນລະປິນທ່ານໃດເປັນພິເສດ ກໍຂໍໃຫ້ຂຽນມາບອກຈະໄດ້ຈັດໃຫ້ທ່ານຜູ້ຟັງ ໄດ້ຟັງໃຫ້ຊື່ນໃຈ.