ສະບາຍດີແລະຍິນດີ ຕ້ອນຮັບທຸກໆທ່ານເຂົ້າສູ່ບັນຍາກາດສະບາຍໆ ຟັງເພງລາວ
ຕາມຄໍາຂໍທີ່ມ່ວນໆໃນຄໍ່າຄືນວັນອາທິດນີ້ ຊຶ່ງຂໍ້ຄວາມທຳອິດນີ້ ຈາກນ້ອງ ຕຸ່ຍ ເລົາ
ທີ່ຂຽນເຂົ້າມາທາງ Facebook ຂໍຟັງເພງ ຄວາມໃນໃຈ ຂອງ ຕ້ອມ ເຣນໂບ
ແລະນ້ອງຕຸ່ຍ ຍັງບອກມາອີກວ່າ ຕິດຕາມຮັບຟັງລາຍການ VOA ມາຕະຫຼອດ
ສະນັ້ນເອື້ອຍວັນນະສອນ ຈຶ່ງຂໍຈັດເພງ ຄົນທີ່ຫວັງດີ ທີ່ເປັນເພງລາວ ໃຫ້ຕາມທີ່
ນ້ອງຂໍຟັງມາ ແທນຄຳຂອບໃຈພ້ອມດຽວກັນນີ້ ກໍຂໍມອບໃຫ້ແຟນລາຍການທຸກໆ
ທ່ານທີ່ມັກຮັກຜົນງານເພງຂອງ ຕ້ອມ ເຣນໂບ. ຂໍເຊີນໄປຟັງເພງ ຄົນທີ່ຫວັງດີ
ພ້ອມໆກັນເລີຍແລະ
ສ່ວນເພງທີ່ສອງນີ້ ຈັດໃຫ້ ຜູ້ຟັງທີ່ຂຽນເຂົ້າມາຂໍຟັງເພງ ຫອມກິ່ນຈຳປາ ຂອງລີກ
ອຸດົມໄຊ ຕ້ອງຂໍອະໄພນຳຫຼາຍໆ ທີ່ຂຽນຊື່ຜູ້ຂໍໄວ້ ແຕ່ຫາບໍ່ພໍ້ ເພາະບາງຄັ້ງ ການຂຽນ
ຂໍຟັງເພງໃນໜ້າ Facebook ສ່ວນຕົວ ແລະມັນກໍມີຂໍ້ຄົນຂຽນເຂົ້າມາເລື້ອຍໆ
ຈົນທັບຖົມອັນເກົ່າໄປ ຈົນຫາບໍ່ພໍ້…ທາງທີ່ດີ ເທື່ອໜ້າກໍຂໍໃຫ້ຂຽນຂໍຄວາມໄວ້ໃນ
ໜ້າ ລາຍການດົນຕີ ທາງ Facebook ຂອງ VOA ຈະເປັນການດີກວ່າ ເພາະວ່າ
ຈະກັບເຂົ້າໄປຫາໄດ້ງ່າຍກວ່າ ເມື່ອໃດກໍໄດ້. ເອົາຂໍໃຫ້ເພງ ຫອມກິ່ນຈຳປາ ນີ້
ຄົງຈະເຮັດໃຫ້ຫຼາຍໆທ່ານຜູ້ຟັງຄິດເຖິງບ້ານແລະຢາກກັບໄປດົມກິ່ນດອກຈຳປາ
ອີກໃນບ້ານເກົ່າເມືອງຫຼັງພຸ້ນ.
ສ່ວນເພງສຸດທ້າຍນີ້ ຂໍຈັດໃຫ້ບັນດານ້ອງໆໄວລຸ້ນມັກຮັກໃນເພງປ໊ອປ ເພາະສະນັ້ນ
ວັນນະສອນ ຈຶ່ງຂໍມອບເພງທີ່ມາແຮງຢູ່ໃນຂະນະນີ້ ຂໍເຊີນໄປພິສູດ ພ້ອມໆກັນເລີຍ
ແລະວ່າ ພໍໄດ້ຍິນເພງນີ້ແລ້ວ ເອື້ອຍວັນນະສອນວ່າ ຄົງຈະຮ້ອງເປັນສຽງດຽວກັນ
ວ່າ…ອໍ… ກໍເພງ Despacito ທີ່ນຳມາ Remix ໃໝ່ ທີ່ຂັບຮ້ອງໂດຍ Luis Fonsi
& Daddy Yankee Feat Justin Biebe ຂໍໃຫ້ມ່ວນໆກັບເພງນີ້ ກໍແລ້ວກັນ
ແລະຄັ້ງຕໍ່ໄປ ທາງເຮົາຈະຄ່ອຍທະຍອຍຈັດເພງສາກົນມາຫຼິ້ນໃຫ້ທ່ານຜູ້ຟັງ ໄດ້ຮັບ
ຟັງເພງ ເພື່ອເອົາໃຈຄົນທີ່ມັກຮັກເພງສາກົນ ແຖມພວກນ້ອງໆທີ່ສົນໃຈຮຽນພາສາ
ອັງກິດ ແລະອອກສຳນຽງພາສາອັງກິດ ກໍຈະໄດ້ຮຽນຮ້ອງຕາມ ແລະຝຶກຫັດອອກ
ສຳນຽງພາສາອັງກິດໃຫ້ຖືກຕ້ອງ…ຫັດຟັງເອົາໄວ້ ແລ້ວມັນກໍຈະເຂົ້າຫູ ຟັງສຳນຽງ
ໄດ້ງ່າຍຂຶ້ນ ແລະໃນທີ່ສຸດ ກໍຈະເວົ້າພາສາອັງກິດໄດ້…ບໍ່ເຊື່ອກໍລອງຫັດຕາມເບິ່ງ.
ພົບກັນໃໝ່ ໃນສັບປະດາໜ້າ.
