ສະບາຍດີແລະຍິນດີທ່ານຜູ້ຟັງເຂົ້າສູ່ລາຍການສຽງເພງຈາກແດນ
ໄກຂອງ VOA ມື້ນີ້ມາແປກໃໝ່ ຂໍຈັດເພງລາວ-ມົ້ງ ທີ່ເປັນຈັງຫວະ
ຕັ່ງຫວາຍ ລຳລາວຂະໜານແທ້ ແຕ່ໃສ່ເນື້ອຮ້ອງທຳນອງພາສາມົ້ງ
ທີ່ຂັບຮ້ອງໂດຍນັກຮ້ອງສຽງດີ ມີພະລັງ ໄມ ເຊຍ ມົວ ຂໍຈັດມອບ
ພິເສດແກ່ປະຊາຄົມລາວມົ້ງ-ອາເມຣິກັນ ໃນລັດ Minnesota
ທີ່ວັນນະສອນ ໄດ້ມີໂອກາດໄປພົບປະສັງສັນ ແລະຮຽນຮູ້ຊຶ່ງກັນ
ແລະກັນ ໃນອາທິດທີ່ແລ້ວນີ້. ວັນນະສອນຕ້ອງຂໍໂທດດ້ວຍ ທີ່ອ່ານ
ພາສາມົ້ງບໍ່ອອກແລະບໍ່ເຂົ້າໃຈ ເພາະສະນັ້ນ ຖ້າຜູ້ໃດຮູ້ຄວາມໝາຍຂອງເພງນີ້ ກະລຸນນາ
ຂຽນເຂົ້າມາອະທິບາຍໃຫ້ຟັງແດ່ ທີ່ laoservice@voanews.com ຂໍໃຫ້ມ່ວນຊື່ນ
ກັນທົ່ວຖ້ວນໜ້າທຸກໆທ່ານເລີຍ.
ວັນນະ ສອນທັງດີໃຈແລະຕ້ອງຂໍຂອບໃຈທຸກໆຈມ, ທຸກໆ email ທີ່ຂຽນເຂົ້າມາຫາ
ທາງລາຍການ VOA ຢ່າງມາກມາຍກາຍກອງ ແລະໃນປະຈຸບັນນີ້ ພໍທາງສັງຄົມ
ສື່ສານໃນທົ່ວໂລກນີ້ ບໍ່ວ່າຈະເປັນ facebook, twitter Instagram ແລະ app ອື່ນໆ
ຕ່າງໆນາໆ ຊຶ່ງກໍໄດ້ເປີດອອກໃນວົງກວ້າງ ແລະເຮັດໃຫ້ການສື່ສານຫາກັນໄດ້ຢ່າງ
ງ່າຍດາຍ ລວດເລວ ທັນໃຈ ເຖິງວ່າ ພວກເຮົາຕ່າງກໍໄດ້ກະຈາຍກັນຢູ່ໃນທົ່ວໂລກ
ກໍຕາມຊຶ່ງຂໍ້ຄວາມທີ່ຂຽນມາທາງ facebook ຈາກ ຣັດຕະນາ ຫຼານສາວຄົນງາມ
ຂອງຍາລຸງ ບົວຫອມ ດຳລົງ ຜູ້ຟັງທີ່ຄອຍຕິດຕາມມານານກ່ວາ 50 ປີ ແລ້ວຂໍຟັງເພງ “ຢ່າຫ້າມຫົວໃຈ” ຊຶ່ງ ເອື້ອຍວັນນະສອນ ກໍຂໍສັນລະເສີນຍາລຸງທີ່ຄອຍເປັນກຳລັງໃຈ
ແລະຕິດຕາມ VOA ມາຕະຫຼອດກ່ອນວັນນະສອນເກີດດ້ວຍຊ້ຳ ຄົງເປັນສະໄໝທີ່ລິ
ເລີ້ມໃໝ່ໆ ໃນປີ 1962 ພຸ້ນລະ. ເພງ “ຢ່າຫ້າມຫົວໃຈ” ເປັນເພງດັງໃນອະດີດ ທີ່ມີ
ຫຼາຍໆຄົນນຳມາຂັບຮ້ອງ ແຕ່ສະບັບນີ້ ເປັນຂອງນັກຮ້ອງສາວສຽງໃສ ຂະນິດຖາ ສຸພາມິດ.
ສ່ວນ ຜູ້ຟັງ ເຈົ້າອິນທະສອນ ກຸນລະວຸດ ຜູ້ຟັງຊາວຫຼວງພະບາງ ຂຽນ facebook
ມາທວງເອື້ອຍວັນນະສອນວ່າ ບໍ່ໄດ້ຟັງເພງທີ່ຂໍມາເລີຍ ເອື້ອຍກະຕ້ອງຂໍອະໄພນຳຫຼາຍໆ ເພາະຍັງບໍ່ທັນໄດ້ຈັດໃຫ້ ກໍຕ້ອງທະຍອຍຕອບ ຕາມທີ່ຂຽນເຂົ້າມາ ເອົາຄັ້ງນີ້ໄດ້ຟັງແນ່ນອນ ຈັດໃຫ້ຕາມຄຳຂໍ ເປັນເພງຂອງ ຕ້ອມ ເຣນໂບ "ຈ.ມ. ສະບັບສຸດທ້າຍ" ເພາະເອື້ອຍວັນນະສອນ ບໍ່ຢາກເປັນ ຈົດໝາຍສະບັບສຸດທ້າຍ ເພາະສະນັ້ນເອື້ອຍຈຶ່ງຂໍຈັດເພງນີ້ໃຫ້ແທນ “ພາບແຫ່ງຄວາມຫຼັງ” ເປັນເພງຂອງສິນລະປິນທີ່ນ້ອງໂປດແນ່ນອນຂໍໃຫ້ທຸກໆທ່ານນອນຫຼັບຝັນຫວານ.
