ສຳລັບຄ່ຳຄືນວັນອາທິດມື້ນີ້ ທ່ານຈະໄດ້ຮັບຟັງເພງລາວ ສ່ວນວ່າຈະມີເພງມ່ວນໆໃດ
ແດ່ນັ້ນ ກະລຸນາ ເຂົ້າມາຟັງພ້ອມໆກັນເລີຍໃນລາຍການສຽງເພງຈາກແດນໄກຂອງ
ວີໂອເອ.
ສະບາຍດີທຸກໆທ່ານ ຄ່ຳຄືນນີ້ ວັນນະສອນ ຈະມາຈັດເພງລາວ ໃຫ້ທ່ານຜູ້ຟັງໄດ້ມ່ວນຊື່ນ
ນຳກັນ ໃນຈຳນວນດັ່ງກ່າວກໍມີເພງ ທີ່ວັນນະສອນ ຫາກໍໄດ້ຮັບມາ ຢ່າງສົດໆຮ້ອນໆເລີຍ
ຊຶ່ງເພງນີ້ ແມ່ນພິເສດສຸດ ກໍເພາະວ່າເປັນເພງທີ່ຈັດທຳຂຶ້ນມາສະເພາະ…ເປັນຜົນງານ
ບົດປະພັນຂອງທ່ານອຣຸນ ສຣີສວັສດິ໌ ແລະຮຽບຮຽງດົນຕີໂດຍ ທ່ານສຸຣິຍາ ສຣີສວັສດິ໌
ຊຶ່ງທັງສອງອ້າຍນ້ອງໄດ້ຮ້ອງປະສານສຽງໃສ່ອາລົມສຸດຂີດ ຈຶ່ງເຮັດໃຫ້ເພງນີ້ຟັງແລ້ວ
ປະທັບໃຈແລະໜ້າເສົ້າຄ້ອຍຕາມເນື້ອເພງໄປ ສິນລະປິນນ້ອງອ້າຍ ແມ່ນຖືວ່າ
ເປັນເສົາຄໍ້າຂອງວົງດົນຕີ ນ້ຳເຜິ້ງ ວົງດົນຕີໝຸ່ມ ສະມາຊິກຂອງຄອບຄົວສຣີສວັສດິ໌
ທີ່ເຄີຍໂດ່ງດັງໃນອະດີດ ເມື່ອ 3 ທົດສະຫວັດຜ່ານນາ ໃນເຂດ Bay Area ທາງພາກ
ເໜືອຂອງລັດຄາລີຟໍເນຍ ທີ່ຫຼາຍໆທ່ານຄຸ້ນເຄີຍ...ເພງອັດຕະປືທີ່ຮັກ ນີ້ ໄດ້ບັນຈົງ
ແຕ່ງຂຶ້ນມາເພື່ອເປັນກຳລັງໃຈ ໃຫ້ແດ່ພີ່ນ້ອງຊາວລາວ ທີ່ປະສົບໄພພິບັດ ເຫດຮ້າຍ
ເຂື່ອນແຕກທີ່ແຂວງອັຕະປຶ ພາກໃຕ້ຂອງລາວ ຊຶ່ງເຫດການໂສກນາດຕະກຳໄດ້ຜ່ານ
ເລີຍມາເປັນເດືອນກວ່າແລ້ວ ແຕ່ກໍເປັນເຄາະຊ້ຳກຳຊັດແທ້ໆ ຫຼັງຈາກທີ່ເຂື່ອນແຕກ
ແລ້ວ ຊໍ້າຍັງມີຝົນຕົກຢູ່ເລື້ອຍໆຈົນເຮັດໃຫ້ພວກທີ່ເຄາະຮ້າຍ ໄດ້ກັບມາພະຈົນກັບ
ໄພຖືກນ້ຳຖ້ວມອີກ ໃນສູນພັກພາອາໄສຊົ່ວຄາວນັ້ນ. ຈົນເທົ່າເຖິງປັດຈຸບັນນີ້ ໄດ້ມີ
ຫຼາຍໆອົງການ ຫຼາຍໆໜ່ວຍງານ ທັງຈາກຊາວລາວພາຍໃນແລະນອກ ຮວມທັງຊາວ
ຕ່າງຊາດ ບັນດາປະເທດເພື່ອນບ້ານນຳ ໄດ້ພາກັນຫຼັ່ງໄຫຼນຳເອົາປັດໄຈຕ່າງໆເຂົ້າໄປ
ຊ່ອຍເຫຼືອ ເພື່ອບັນເທົາທຸກເປັນການຊົ່ວຄາວ ຫວັງວ່າ ນ້ຳໃຈຈາກຊາວລາວແລະ
ຊາວຕ່າງຊາດ ຈາກທົ່ວທຸກມູມໂລກ ຈະພໍໄດ້ບັນເທົາແບ່ງປັນຄວາມຂົ່ມຂື່ນເຈັບ
ປວດ ໃນຊ່ວງທີ່ປະສົບກັບຄວາມທຸກໄຮ້ເຂັນໃຈ ບ້ານແຕກສະແຫຼກຂາດ ຍາດມິດ
ເພື່ອນຝູງ ພໍ່ແມ່ພີ່ນ້ອງໄດ້ສູນຫາຍຈົນກວ່າວ່າຈະ ໄດ້ຮັບການຊ່ອຍເຫຼືອເປັນການ
ຖາວອນຈາກບັນດາບໍລິສັດທີ່ກ່ຽວຂ້ອງແລະຮັບຜິດຊອບເຫຼົ່ານັ້ນ...ວັນນະສອນ
ຈຶ່ງຂໍສົ່ງຄວາມຮູ້ສຶກທີ່ດີໆ ມາກັບສຽງເພງອັດຕະປືທີ່ຮັກ ນີ້ເພາະຢ່າງນ້ອຍ ສຽງເພງ
ນີ້ກໍຈະເປັນກຳລັງໃຈ ໃຫ້ພີ່ນ້ອງເຮົາຕໍ່ສູ້ຕໍ່ໄປແລະໃຫ້ພີ່ນ້ອງລາວຮູ້ວ່າ
ຄົນລາວ ຍັງບໍ່ຖິ້ມກັນ......
ເພງມ່ວນໆ ຕໍ່ໄປນີ້ ຈະເປັນເພງ ຊຶ່ງຈະນຳເອົາຮອຍຍິ້ມ ຄວາມເບີກບານ ມ່ວນຊື່ນມາ
ສູ່ທ່ານຜູ້ຟັງ ເປັນເພງທີ່ປະພັນໂດຍເຈົ້າຄຳຜາຍ ກຸນຣະວຸດ ໃນບົດເພງ ກຸຫຼາບປາກເຊ
ຊຶ່ງກໍໄດ້ມີ ສິນລະປິນຫຼາຍທ່ານ ນຳມາຂັບຮ້ອງ ແລະປ່ຽນແປງຊື່ເປັນ ຫອມກຸຫຼາບ
ປາກເຊ ແລະຕ່າງໆນາໆ ແຕ່ວັນນະສອນ ໄດ້ສອບຖາມຈາກປາກເຈົ້າຄຳຜາຍ
ເຈົ້າຂອງ ຜູ້ປະພັນເພງແລ້ວ ແລະບອກມາວ່າ ກຸຫຼາບປາກເຊ ນັ້ນລະຖືກຕ້ອງທີ່ສຸດ
ແລ້ວ...ສະນັ້ນເພງຕໍ່ໄປນີ້ ຈຶ່ງຂໍໃຫ້ເປັນສຽງຂອງເຈົ້າຂອງບົດປະພັນ ທີ່ຂັບຮ້ອງໄວ້
ຕອນຍັງເປັນວົງດົນຕີ ແມ່ຂອງຂຽວ ຫຼື Mekong Vert ຢູ່ ທີ່ປະເທດຝຣັ່ງ ເມື່ອປີ
1989 ພຸ້ນ ເປັນຕາມັກທຳນອງດົນຕີ...ຟັງແລ້ວປະທັບໃຈ ແລະພາໃຫ້ເພີ້ຝັນ ຄິດເຖິງ
ເມືອງປາກເຊ. ແລະວ່າຊາວປາກເຊ ຊາວອັດຕະປື ທາງພາກໃຕ້ຂອງລາວ ຈົ່ງຮັກສາ
ແລະຄົງໄວ້ ຊຶ່ງຄວາມສວຍສົດງົດງາມຂອງທຳມະຊາດ ຫ້ວຍຮ່ອງ ພູຜາ ນ້ຳຕົກ ໄວ້
ໃຫ້ຄົນຮຸ້ນຫຼັງ ໄດ້ເຫັນໄດ້ຊົມ.
ກ່ອນຈາກກັນໄປໃນວັນນີ້ ວັນນະສອນ ຂໍສົ່ງຄວາມສຸກມາກັບເພງທີ່ກ່ຽວຂ້ອງກັບ
ພາກໃຕ້ຂອງລາວ ໃຫ້ທ່ານຜູ້ຟັງໄດ້ຮັບຟັງກັນ ເປັນຂັບລຳ ຈາກພາກໃຕ້ຂອງລາວ
ດັ່ງທີ່ພວກເຮົາຊາບກັນນັ້ນລະທີ່ວ່າ ປະເທດລາວອຸດົມສົມບູນ ໄປດ້ວຍສິນລະປະ
ວັດທະນະທຳ ຂັບລຳລາວພື້ນເມືອງ ຕັ້ງແຕ່ເໜືອຈົນເຖິງໃຕ້...ແລະລຳສີພັນດອນ
ນີ້ ກໍແມ່ນມູນມໍລະດົກອັນລ້ຳຄ່າຂອງລາວ...ຊຶ່ງຂັບລຳລາວນີ້ ໄດ້ອະທິບາຍເຖິງທີວ
ທັດທຳມະຊາດ ພູມລຳເນົາທາງພາກໃຕ້ຂອງລາວ ທີ່ອຸດົມຮັ່ງມີ ພ້ອມທັງວິຖີຊີວິດ
ຂອງຊາວບ້ານທາງແຖບໃຕ້...ລອງມາຟັງເນື້ອເພງຂອງທອງວອນ ຂັນນະຣາ ສິນ
ລະປິນຈາກອົສເຕຣເລຍ ກັນກ່ອນ ທີ່ຍັງຄົງຮັກສາເອກກະລັກຂອງຄົນທາງໃຕ້
ທີ່ໃຊ້ສຳນຽງຂະໜານແທ້ຂັບລຳ ແບບວ່າ ສີພັນລອນ ໂດຍບໍ່ປ່ຽນເປັນສີພັນດອນ
ທີ່ພວກເຮົາເວົ້າກັນ...ເອົາວັນນະສອນ ວ່າ ຂັບລຳລາວນີ້ ຈະເຮັດໃຫ້ຫຼາຍໆ
ທ່ານ ຄິດເຖິງພາກໃຕ້ຂອງລາວ ມາຕຸພູມບ້ານເກີດເປັນແນ່ແທ້. ຂໍໃຫ້ທ່ານຜູ້ຟັງ
ຈົ່ງນອນຫລັບຝັນດີ ແລະພົບກັນໃໝ່ ໃນສັບປະດາໜ້າ.
