ໃນຄ່ຳຄືນນີ້ທາງລາຍການສຽງເພງຈາກແດນໄກຂອງ VOA ຈະມາກ່ອມທ່ານຜູ້ຟັງ
ດ້ວຍເພງສາກົນມ່ວນໆ ເປັນເພງສຸດຍອດອະມະຕະ ທີ່ຍັງໂດ່ງດັງແລະຍັງເປັນທີ່ຊື່ນ
ຊອບຂອງນັກຟັງເພງຫຼາຍໆທ່ານ ບໍ່ເຊື່ອກໍລອງເຂົ້າໄປຟັງພ້ອມໆກັນເລີຍ.
ສະບາຍດີທຸກໆທ່ານ ກັບມາຟັງເພງມ່ວນໆກັບວັນນະສອນອີກໃນລາຍການສຽງເພງ
ຈາກແດນໄກຂອງ VOA ໃນວັນທີ 31 ທ້າຍເດືອນມີນາມື້ນີ້ ວັນນະສອນ ຈະພາທ່ານ
ຜູ້ຟັງ ຢ້ອນກັບຄືນໄປຟັງເພງດັງໃນອະດີດ ທີ່ວັນນະສອນຄິດວ່າ ຫຼາຍໆທ່ານຄົງຄິດ
ຮອດເພງພວກນີ້ ຂໍເລີ້ມດ້ວຍເພງ ສຸດຍອດອະມະຕະ ໃນບົດເພງ All I Have To
Do Is Dream ຂອງ Everly Brothers ຊຶ່ງວັນນະສອນ ຄິດວ່າ ພໍໄດ້ຮັບຟັງເພງ
ນີ້ແລ້ວ ຄົງພາໃຫ້ທ່ານຜູ້ຟັງຄິດເຖິງອະດີດ ເປັນແນ່ແທ້. ມາເລີຍມາຟັງເພງເພື່ອຫວນ
ຄືນອະດີດພ້ອມໆກັນເລີຍ.
ສ່ວນເພງທີ 2 ເປັນເພງສຸດຍອດອະມະຕະ ອີກເພງນຶ່ງ ເປັນເພງທີ່ມາໂດ່ງດັງຍິ່ງຂຶ້ນ
ຫຼັງຈາກທີ່ ໄດ້ມາສ້າງເປັນພາບພະຍົນແລ້ວ ທີ່ໄດ້ນັກຮ້ອງຜີວຄ້ຳ ເຊັ່ນ Whitney
Houston ນຳເອົາເພງ I Will Always Love You ທີ່ຕົ້ນສະບັບເປັນຂອງລາຊີນີ
ລູກທົ່ງ Dolly Parton ມາຂັບຮ້ອງແລະປະກອບສ່ວນເຂົ້າໃນຮູບເງົາ ເລື້ອງ Body
Guard ເຮັດໃຫ້ເພງນີ້ດັງເປັນບັ້ງພຸແຕກເລີຍ...ເອົາຂໍມອບໃຫ້ແຟນໆ ທີ່ມັກຮັກ
Whitney Houston ທັງຫຼາຍ.
ເພງແນວ classic ເຊັ່ນ Somewhere Out There ທີ່ຂັບຮ້ອງໂດຍ James Ingram
& Linda Ronstadt ນີ້ ກໍເປັນເພງແນວ classic ເພງປະກອບຮູບເງົາກາຕູນ ໜູແມວ
ທີ່ມີຊື່ວ່າ An American Tail - There Are No Cats in America ທີ່ເລົ່າເລື້ອງ
ລາວຂອງໝູນ້ອຍທີ່ໄດ້ອົບພະຍົບເຂົ້າມາຍັງສະຫະລັດ ແລະໜູຕົວນີ້ກໍເຊື່ອວ່າ ໃນສະຫະ
ລັດອາເມຣິກາ ນັ້ນແມ່ນບໍ່ມີແມວ ຕາມທີ່ຜູ້ຄົນບອກໄວ້…ແຕ່ກັບມີເລື້ອງວຸ້ນໆ ອຸບປະສັກ
ອື່ນໆອີກມາກມາຍ ຫຼາຍກວ່າ ແມວທີ່ເປັນສັດຕູຂອງໜູນັ້ນ ພ້ອມທັງໂອກາດທີ່ໄດ້ຮັບ
ໃນປະເທດໃໝ່ ປຽບດັ່ງພວກຜູ້ຄົນທີ່ຫຼັ່ງໄຫຼອົບພະຍົບເຂົ້າມາໃນສະຫະລັດ ຕັ້ງແຕ່
ສະໄໝໃດໆ ຈົນເທົ່າເຖິງທຸກວັນນີ້ ຊຶ່ງພວກເຂົາເຫຼົ່ານັ້ນ ກໍມີທັງການຮຽນຮູ້ຫຼາກຫຼາຍ
ປະສົບການ ທັງຄວາມລຳບາກ ຄວາມປະຈົນໄພ ປັບຕົວໃຫ້ເຂົ້າກັບສະພາບການຝຶກ
ຫັດພາສາໃໝ່ ມີທັງສິດເສລີພາບ ແລະໂອກາດ ການສຶກສາແລະອະນາຄົດ ຕ່າງໆນາໆ.
ເອົາຂໍໃຫ້ຟັງເພງນີ້ໄປກ່ອນ ແລ້ວຄ່ອຍໆຈິນຕະນາການໄປເຫັນພາບຂອງໜູຕົວນ້ອຍ
ທີ່ເດີນທາງມາຈາກຢູໂຣບ ສູ່ສະຫະລັດອາເມຣິກາ ເພື່ອສຳພັດດ້ວຍຕົວເອງ. ຂໍໃຫ້ນອນ
ຫລັບຝັນດີແລະພົບກັນໃໝ່ໃນສັບປະດາໜ້າ.
