ສະບາຍດີ ແລະວັນນະສອນກໍດີໃຈທີ່ໄດ້ກັບມາພົບແຟນໆເພງໃນລາຍການສຽງເພງ ຈາກແດນໄກຂອງ VOA ໃນທຸກໆແລງວັນອາທິດໃນໄລຍະຫຼັງໆນີ້ ໄດ້ມີຜູ້ຟັງຂຽນມາຂໍຟັງເພງຜ່ານທາງ Social Media Network ເຊັ່ນ Facebook ເກືອບວ່າທັງໝົດເລີຍ ດີແລ້ວລະຈະໄດ້ທັນໃຈທັນເຫດການ ຂໍ້ຄວາມຕໍ່ໄປນີ້ມາຈາກນ້ອງ Sunth Dgl ຊຶ່ງເປັນນາມແຝງທີ່ໃຊ້ໃນ Facebook ຊຶ່ງເອື້ອຍວັນນະສອນ ຄິດວ່າ ໜ້າຈະອ່ານວ່າ ສັ້ນ ຂໍຟັງເພງຂອງເຜົ່າກຶມມຸ ຊຶ່ງເອື້ອຍວັນນະສອນ ມີຄວາມຍິນດີ ແລະຕ້ອງຂໍບອກວ່າ ພໍເຂົ້າໃຈຖ້ອຍຄຳ ບາງຄຳບາງຕອນທີ່ເປັນພາສາລາວ…ຊຶ່ງເພງນີ້ຊ່າງປະຈວບເໝາະແລະເຂົ້າກັບສະຖານະການເຫຼືອເກີນ…ທີ່ເວົ້າເຖິງຂະບວນການຄ້າມະນຸດ ທີ່ເກີດຂຶ້ນໃນທົ່ວໂລກ…ຊຶ່ງເພງນີ້ ໄດ້ຮັບການສະໜັບສະໜຸນໂດຍອົງການ UNICEF ທີ່ບັນລະຍາຍເຖິງຄວາມຫ່ວງຫາອາທອນ ຕໍ່ພວກແມ່ຍິງແລະເດັກສາວທັງຫຼາຍທີ່ຫຼົງເຊື່ອ ຜຼົງຜິດ…ຕົກໄປເປັນເຫຍື່ອຂອງຂະບວນ ການຄ້າມະນຸດ ເພງນີ້ຂັບຮ້ອງໂດຍ ຄຳຜຸຍ ມາໄລຄຳ ແລະປະພັນໂດຍ ບຸນຍັງແລະຂໍໃຫ້ ເພງນີ້ເປັນອຸທາຫອນ ສອນສັ່ງພວກນ້ອງໆທັງຫຼາຍ ໃຫ້ໝັ້ນພຽນພະຍາຍາມປະຕິບັດຕົວເປັນຄົນດີໃນສັງຄົມລາວ ຕໍ່ໆໄປ ຢ່າໄດ້ເສຍຮູ້ແລະໃຫ້ຄົນອື່ນເອົາປຽບ. ຂໍເຊີນໄປຟັງພ້ອມໆກັນເລີຍ ໃນບົດເພງ…ເອີ້ນນາງກັບຄືນ.
ສ່ວນເພງ “ລືມໄລບ້ານປ່າ” ນີ້ຈັດໃຫ້ຕາມຄຳຂໍຂອງຜູ້ຟັງ ນ້ອງອືຢ່າງ ໜໍຕູ້ ນັກສຶກສາຈາກສປປ ລາວ ຊຶ່ງປະຈຸບັນນີ້ກຳລັງສຶກສາຢູ່ທີ່ປະເທດຝຣັ່ງ ຂຽນມາທັກທາຍ ສບາຍດີນັກຂ່າວ VOA ນ້ອງບອກມາວ່າ ຕັ້ງແຕ່ນ້ອຍມາ ກໍໄດ້ຍິນຄຳວ່າ VOA ແລ້ວ ເພາະວ່າລຸງຂອງນ້ອງຮັບຟັງມາຕະຫຼອດ ແລະທຸກມື້ນີ້ ກໍຍັງຕິດຕາມຮັບຟັງ ຢູ່ສະເໜີມາ ເພງ ລືມໄລບ້ານປ່າ ນີ້ ເປັນເພງເກົ່າແລະໂດ່ງດັງໃນອະດີດ ແຕ່ຄັ້ງນີ້ເປັນຂອງສິນ ລະປິນ ອະວຸໂສ ຊຶ່ງປະຈຸບັນນີ້ ຮັບຕຳແໜ່ງເປັນ ລັດຖະມົນຕີຖະແຫຼງຂ່າວ ວັດທະນະ ທຳແລະທ່ອງທ່ຽວ ທ່ານ ບົວເງິນ ຊາພູວົງ ແລະວັນນະສອນຫວັງວ່າ ເພງນີ້ຄົງຈະເຮັດໃຫ້ນ້ອງ ອືຢ່າງ ແລະຫຼາຍໆທ່ານຜູ້ຟັງທີ່ຢູ່ຫ່າງໄກຈາກພູມລຳເນົາແລະບ້ານເກີດເມືອງນອນ ໄດ້ຟັງໄປ ເຄີ້ມໄປ ຫາຍຄິດເຖິງບ້ານ. ແລະກໍຫວັງຢ່າງຍິ່ງຄົງຈະເຫັນນ້ອງອືຢ່າງ ຂຽນເຂົ້າມາຫາທາງເຮົາອີກ.
ວັນນະສອນ ຂໍອໍາລາທ່ານດ້ວຍເພງນີ້ “ນ້ຳຖ້ວມເມືອງແບງ” ຊຶ່ງເປັນເພງທີ່ສະຖ້ອນເຖິງເຫດການຫາຍະນະທີ່ກະທົບຕໍ່ເມືອງແບງ ເປັນກຶມມຸ ແລະທຳນອງເພງລາວ ຈາກນ້ຳສຽງ ຂອງສິນລະປິນສຽງດີ ສຸພັນ ສຶມອົມ ຂໍໃຫ້ທ່ານຜູ້ຟັງທີ່ເປັນຊາວກຶມມຸ ພ້ອມທັງນ້ອງສັ້ນ ຂຽນຂໍ້ຄວາມແລະສົ່ງເພງກຶມມຸ ມ່ວນໆ ມາໃຫ້ເອື້ອຍໄດ້ເປີດແລະແບ່ງປັນໃຫ້ທ່ານຜູ້ຟັງ ໃນທົ່ວໂລກ ໄດ້ຮັບຟັງກັນ. ນອນຫຼັບຝັນດີ ແລະພົບກັນໃໝ່ໃນປີໜ້າ.
