ໃນຄ່ຳຄືນນີ້ ວັນນະສອນຈະມາກ່ອມທ່ານຜູ້ຟັງດ້ວຍເພງສາກົນມ່ວນໆຫຍັງແດ່ ຂໍເຊີນ
ທຸກໆທ່ານເຂົ້າໄປພິສູດພ້ອມໆກັນເລີຍ ໃນລາຍການສຽງເພງຈາກແດນໄກຂອງ VOA.
ສະບາຍດີທຸກໆທ່ານ ກັບມາຟັງເພງມ່ວນໆກັບວັນນະສອນ ອີກເຊັ່ນເຄີຍໃນລາຍການ
ສຽງເພງຈາກແດນໄກຂອງ VOA ແລະສັບປະດານີ້ ທາງເຮົາຈະພາທ່ານຜູ້ຟັງໄປຟັງ
ເພງຂອງສິນລະປິນທີ່ໄດ້ສ້າງຊື່ສຽງແບບວ່າດັງກ້ອງໂລກ...ຊຶ່ງຊ່າງເໝາະກັບຄຳພັງເພີຍ
ທີ່ວ່າ Don’t Judge the Book by Its Cover ຢ່າຕັດສິນຄົນ ດ້ວຍພາບລັກຂ້າງນອກ
ຂອງຜູ້ຄົນ ເພາະວ່າສິນລະປິນທ່ານນີ້ ແມ່ນເປັນຜູ້ຍິງໄວກາງຄົນ ຮຸບຮ່າງອວບ ສູງໃຫຍ່
ບໍ່ໜ້າເຊື່ອວ່າຮູບຮ່າງທີ່ຖືວ່າຂີ້ຮ້າຍນີ້ຈະມີພະລັງສຽງທີ່ສຸດຍອດ ທີ່ເຮັດໃຫ້ຄະນະກຳມະການການປະກວດ ເວທີ Britains Got Talent 2009 ພາກັນຕົກຕະລຶງໄປເລີຍ
ເພາະຄະນະກຳມະການຖາມວ່າ ເປັນຫຍັງຈຶ່ງເຂົ້າມາແຂ່ງຂັນ ໃນຕອນອາຍຸປານນີ້
ແລ້ວ? ພໍ Susan Boyle ໄດ້ພິປາກຮ້ອງເພງ I Dreamed A Dream ທຸກຄົນ
ໃນຫ້ອງນັ້ນ ກໍພາກັນຕະລຶງກັບນ້ຳສຽງຂອງຜູ້ກ່ຽວ ແລະພາກັນຢືນຂຶ້ນຕົບມືໃຫ້ກຽດ
ຜູ້ກ່ຽວ ໄດ້ຮັບ 3 ຜ່ານຈາກຄະນະກຳມະການ ແລະເຮັດໃຫ້ສິນລະປິນທ່ານນີ້ ມີຊື່ສຽງ
ດັງກ້ອງໂລກໄປເລີຍ. ຂໍເຊີນໄປພິສູດພ້ອມໆກັນໃນບົດເພງ I Dreamed A Dream.
ຜົນສະຫຼຸບ ກໍຄື ຄົນເຮົາເລີ້ມຕົນໄດ້ທຸກເມື່ອແລະຈະບໍ່ສາຍເກີນໄປ ໃນການເລີ້ມຕົ້ນໃໝ່.
ສ່ວນເພງ What About Us ທີ່ຂັບຮ້ອງໂດຍ Pink ນີ້ ຂ້ອນຂ້າງຈະຄຶກຄັກ ແລະມີການ
ໂຕ້ຖຽງກັນ ເພາະຊື່ຂອງເພງນີ້ເອງ…ຄືຄວາມໝາຍກໍແບບວ່າແລ້ວພວກເຮົາເດ່???
ຊຶ່ງມັນອາດຈະມີຄວາມໝາຍຫຼາກຫຼາຍແລ້ວແຕ່ວ່າຜູ້ຟັງຈະນຳໄປຕີຄວາມ ຊຶ່ງອາດ
ຈະໝາຍເຖິງ ການເມືອງກໍໄປທາງ ພວກຜູ້ຄົນກໍໄປທາງ ຈຶ່ງມີຄຳຖາມທີ່ວ່າ What
About Us ຫຼືວ່າ ແລ້ວພວກເຮົາເດ່? ລອງໄປຟັງກັນເບິ່ງວ່າ ຈະເນື້ອຮ້ອງທຳນອງ
ຈະໜັກແໜ້ນແບບດັ່ງກ່າວຫຼືບໍ່.
ສ່ວນເພງສຸດທ້າຍນີ້ ກໍໜ້າຮັກໄປອີກແບບທີ່ວ່າ ຄົນເຮົາຕ້ອງການຄວາມພິເສດ ແປກໄປ
ຈາກຄົນອື່ນໆ ທີ່ເຮົາເອີ້ນວ່າ unique ບໍ່ຄືໃຜ ແລະບໍ່ມີຜູ້ໃດຄື...ທີ່ວ່າ ເດີນທາງໃນເສັ້ນ
ທີ່ບໍ່ຄ່ອຍມີຄົນເດີນທາງ ດັ່ງຊື່ຂອງເພງນີ້ Road Less Traveled ທີ່ຂັບຮ້ອງໂດຍ
Lauren Alaina. ສັບປະດາໜ້າວັນນະສອນຈະມາຈັດເພງລາວ ເພື່ອສະຫຼອງສົງການປີໃໝ່2562 ຮ່ວມກັນ ຫ້າມພາດລະ. ຂໍໃຫ້ນອນຫລັບຝັນຫວານ ແລະພົບກັນໃໝ່ໃນ
ສັບປະດາໜ້າ.
