ເມືອງ ໄມດູກູຣີ ຂອງ ໄນຈີເຣຍ ຖືກໂຈມຕີ ດ້ວຍລະເບີດ ຫຼາຍລູກ

ບັນດາ​ຜູ້​ເຫັນ​ເຫດການ​ໃນ​ພາກ​ເໜືອ​ຂອງ ​ໄນ​ຈີ​ເຣຍ ກ່າວ​ວ່າ ລະ​ເບີດ​ໄດ້​ແຕກ​ຢ່າງ​ໜ້ອຍ 4 ລູກ​ໃນ​ວັນ​ອາທິດ​ວານ​ນີ້​ ທີ່​ນະຄອນ Maiduguri, ​ເມືອງ​ຫຼວງ​ຂອງລັດ Borno ​ເຊິ່ງ​ເປັນ​ບ່ອນ​ທີ່​ພວກ​ຫົວ​ຮຸນ​ແຮງ ​ໂບ​ໂກ ຮາຣາມ ຍັງ​ເຄື່ອນ​ໄຫວ​ຢູ່.

ຍັງບໍ່ທັນ​ມີລາຍ​ງານ​ເທື່ອກ່ຽວ​ກັບ​ຜູ້​ເສຍ​ຊີວິດ​ ​ຫຼືຮັບບາດ​ເຈັບ​ຈາກເຫດການ​ລະ​ເບີດ​ດັ່ງກ່າວ.

ຜູ້​ເຫັນ​ເຫດການ​ຫຼາຍ​ຄົນ​ໄດ້​ກ່າວ​ວ່າ ລະ​ເບີດ​ 2 ລູກ​ໄດ້​ແຕກ​ໃນ​ເວລາ​ໜຶ່ງ​ນາທີ​ຫ່າງ​ກັນ ທີ່​
ວັດອິສລາມໃນໃຈກາງເມືອງ ໃນຂະນະທີ່ປະຊາຊົນກຳລັງເຂົ້າຮ່ວມໃນການສວດມົນຄັ້ງສຸດທ້າຍຂອງພວກເຂົາ ສຳລັບມື້ນັ້ນ.

ມີ​ລາຍ​ງານການ​ລະ​ເບີດຄັ້ງ​ອື່ນໆ​ ວ່າ​ເກີດ​ຂຶ້ນ​ຢູ່​ຕະຫຼາດ​ໃນ​ນະຄອນ Maiduguri.

ບໍ່​ມີ​ກຸ່ມ​ໃດ​ອອກ​ມາ​ອ້າງເອົາຄວາມ​ຮັບ​ຜິດ​ຊອບ​ສຳລັບ​ການ​ໂ​ຈມ​ຕີ​ດັ່ງກ່າວ, ​ແຕ່​ວ່າ​ພວກ ​
ໂບໂກ ຮາຣາມ ໄດ້ໃຊ້ລະເບີດຊ້ຳແລ້ວຊ້ຳອີກຕັ້ງແຕ່ພວກເຂົາໄດ້ເລີ່ມປະຕິບັດການຕໍ່
ຕ້ານລັດຖະບານໃນປີ 2009 ເປັນຕົ້ນມາ.

ພວກ ​ໂບ​ໂກ ຮາ​ຣາມ ​ເຊິ່ງ​ເມື່ອບໍ່​ດົນ​ມາ​ນີ້ ​ໄດ້​ປະຕິຍານ​ຕົນ​ຕໍ່ກຸ່ມ​ຫົວ​ຮຸນ​ແຮງ​ ລັດ​ອິສລາມ, ​ແລະ ​ໄດ້​ຂ້າ​ປະຊາຊົນ ​ໄນ​ຈີ​ເຣຍ ຫຼາຍ​ກວ່າ 10,000 ຄົນ ​ໃນ​ການ​ຕໍ່ສູ້​ເພື່ອ​ວາງ​ກົດສາສະ
ໜາອິສລາມ ໃນພາກເໜືອຂອງ ໄນຈີເຣຍ.