ຕຳຫຼວດ ໃນເມືອງ Chattanooga ທາງພາກໃຕ້ ຂອງລັດ Tennessee ໄດ້ຈັບກຸມ ຄົນຂັບລົດເມຂອງໂຮງຮຽນໄວ້ຫຼັງຈາກໄດ້ເກີດອຸປະຕິເຫດ ທີ່ເຮັດໃຫ້ມີເດັກນ້ອຍ ເສຍຊີວິດ ຢ່າງໜ້ອຍ 6 ຄົນ.
ບັນດາເຈົ້າໜ້າທີ່ ກ່າວວ່າ ລົດເມດັ່ງກ່າວ ບັນທຸກນັກຮຽນ 35 ຄົນ ຈາກໂຮງຮຽນ ປະຖົມແຫ່ງໜຶ່ງ ເມື່ອມັນເສຍຫຼັກປີ້ນຂວ້ຳແລະພຸ່ງເຂົ້າ ຕຳຕົ້ນໄມ້.
ຄົນຂັບລົດເມດັ່ງກ່າວ ຖືກກ່າວຫາ ໃນຖານຄາດຕະກຳດ້ວຍລົດຍົນ, ຂາດຄວາມ
ລະມັດລະວັງ ເຮັດໃຫ້ຄົນອື່ນຕົກຢູ່ໃນອັນຕະລາຍ ແລະ ຂັບລົດດ້ວຍຄວາມບໍ່
ຮອບຄອບ.
ຜູ້ບັນຊາການຕຳຫຼວດເມືອງ Chattanooga ທ່ານ Fred Fletcher ກ່າວວ່າ ບໍ່ມີ ລົດຄັນອື່ນໃດ ກ່ຽວພັນໃນອຸປະຕິເຫດຄັ້ງນີ້ ແລະ ວ່າ ບັນດານັກສືບສວນສອບສວນ ໄດ້ພິຈາລະນາເບິ່ງຄວາມໄວ ຊຶ່ງອາດຈະເປັນສາເຫດ ທີ່ເປັນໄປໄດ້ສູງ.
ທ່ານ Fletcher ກ່າວຢູ່ທີ່ກອງປະຊຸມຖະແຫລງຂ່າວ ວ່າ “ພວກເຮົາຂໍສົ່ງກຳລັງໃຈ ພ້ອມກັນກັບ ກຳລັງໃຈຂອງປະຊາຊົນທັງໝົດເຫຼົ່ານີ້ ທີ່ຢູ່ດ້ານຫຼັງຂ້າພະເຈົ້າ ໄປໃຫ້ແກ່ໝົດທຸກຄົນຜູ້ທີ່ພົວພັນກັບເຫດການນີ້ ພວກເຮົາຮັບປະກັນວ່າ ພວກເຮົາ ຈະເຮັດທຸກສິ່ງທຸກຢ່າງ ທີ່ພວກເຮົາສາມາດເຮັດໄດ້.”
ບັນດາເຈົ້າໜ້າທີ່ ກ່າວວ່າ ພວກເດັກນ້ອຍ 23 ຄົນ ໄດ້ຖືກນຳສົ່ງໄປຍັງໂຮງໝໍແຫ່ງ
ຕ່າງໆ. ໄອຍະການເມືອງ Hamilton ທ່ານ Neal Pinkston ໄດ້ກ່າວຕໍ່ສື່ມວນຊົນ
ວ່າ ເດັກນ້ອຍ 5 ຄົນ ໄດ້ເສຍຊີວິດ ຢູ່ທີ່ຈຸດເກີດເຫດ ແລະ ຜູ້ໜຶ່ງເສຍຊີວິດຢູ່ທີ່ໂຮງໝໍ.
