ເຫດລະເບີດຫຼາຍຄັ້ງ ໄດ້ສັງຫານຫລາຍກວ່າ 100 ຄົນ ໃນເມືອງຝັ່ງທະເລຂອງ ຊີເຣຍ ໃນວັນຈັນມື້ນີ້ ຊຶ່ງຕາມປົກກະຕິແລ້ວເປັນເມືອງທີ່ງຽບສະຫງົບນັ້ນ ອີງຕາມ ລາຍງານຂອງໂທລະພາບລັດຖະບານ ແລະກຸ່ມສິິ້ງຊອມສິດທິມະນຸດໃນຊີເຣຍ.
ເຫດລະເບີດໄດ້ແຕກຂຶ້ນຢູ່ໃນເມືອງ Jableh ແລະເມືອງ Tartus ຊຶ່ງເປັນທີ່ໝັ້ນຂອງລັດຖະບານ ແລະມາຮອດປັດຈຸບັນນີ້ ຍັງສາມາດຫລົບຫລີກຄວາມຮຸນແຮງໃນສົງຄາມ ກາງເມືອງທີ່ດຳເນີນມາເປັນເວລາ 5 ປີ ຂອງຊີເຣຍໄດ້.
ເຫດລະເບີດສີ່ຄັ້ງ ຮວມທັງການໂຈມຕີສະຫຼະຊີບຢ່າງໜ້ອຍຄັ້ງນຶ່ງມີຂຶ້ນຢູ່ເມືອງ Jableh ພ້ອມທັງທາງເຂົ້າສຸກເສີນຂອງໂຮງໝໍໃນເມືອງດັ່ງກ່າວນຳດ້ວຍ. ການ ໂຈມຕີດ້ວຍຈະຫຼວດໃສ່ຄິວລົດເມ ເຮັດໃຫ້ມີຜູ້ເສຍຊີວິດຢ່າງໜ້ອຍ 53 ຄົນ ອີງ ຕາມກຸ່ມສິ້ງຊອມສິດທິມະນຸດໃນຊີເຣຍ.
ເຫດລະເບີດອີກສາມຄັ້ງ ຢ່າງນ້ອຍບັ້ນນຶ່ງແມ່ນເປັນການໂຈມຕີສະຫຼະຊີບ ມີຂຶ້ນຢູ່ເມືອງ Tartus ຫ່າງຈາກເມືອງ Jableh ໄປທາງກ້ຳໃຕ້ ປະມານ 60 ກິໂລແມັດ ໃນອັນທີ່ຫົວໜ້າ ຂອງກຸ່ມສິ້ງຊອມສິດທິມະນຸດໃນຊີເຣຍທ່ານ Rami Abdel Rahman ເອີ້ນວ່າ ເປັນການ ໂຈມຕີທີ່ ບໍ່ເຄີຍເຫັນມາກ່ອນ
ອີກຄັ້ງນຶ່ງ ພວກກໍ່ການຮ້າຍ ໄດ້ແນເປົ້າໝາຍໃສ່ຄິວລົດເມ ທີ່ແອອັດໄປດ້ວຍຜູ້ຄົນ ອີງຕາມ ລາຍງານຂອງອົງການຂ່າວ SANA. ສ່ວນລາຍງານໂທລະພາບ ແຈ້ງວ່າ ຢ່າງໜ້ອຍຜູ້ໂຈມຕີດ້ວຍລະເບີດສະຫລະຊີບຄົນນຶ່ງໄດ້ບີບຄະນວນລະ ເບີດໃຫ້ແຕກຂຶ້ນ ຢູ່ໃກ້ໆສະ ຖານີລົດເມ ແລະຕິດຕາມດ້ວຍການໂຈມຕີໂດຍລົດລະເບີດ ໃນອີກບໍ່ເທົ່າໃດນາທີຕໍ່ມາ ມີອີກ 48 ຄົນ ໄດ້ເສຍຊີວິດໃນການໂຈມຕີດ້ວຍລົດລະເບີດ ອີງຕາມທ່ານ Rahman.
ອົງການຂ່າວ ທີ່ເປັນເຄືອຂ່າຍ ຂອງກຸ່ມລັດອິສລາມ ໄດ້ອ້າງວ່າເປັນຜົນງານຂອງ ພວກ ຫົວ ຮຸນແຮງລັດອິສລາມ ໃນການໂຈມຕີດັ່ງກ່າວ.
