ພັນລະຍາໝ້າຍ Lonnie Ali ແລະອະດີດປະທານາທິບໍດີ Bill Clinton ແມ່ນ ຮວມຢູ່ໃນບັນດາແຂກຜູ້ມີກຽດ ທີ່ໄດ້ຂຶ້ນໄປກ່າວສະດຸດີ ໃຫ້ແກ່ທ່ານ Muhammad Ali ນັກມວຍ ທີ່ມີຊື່ສຽງໂດ່ງດັງ ໃນພິທີສົ່ງສະການ ທີ່ຈັດຂຶ້ນຢູ່ທີ່ຕຶກສະໜາມກິລາເມືອງ Louisville ລັດ Kentucky ໃນວັນສຸກວານນີ້ ຂະນະທີ່ມີຜູ້ເຂົ້າຮ່ວມປະມານ 15,000 ຄົນ.
ພິທີສົ່ງສະການໄດ້ຈັດຂຶ້ນຫລັງຈາກຂະບວນແຫ່ສົບຂອງທ່ານ Ali ໄປຜ່ານໄປຕາມຖະ ໜົນຫົນທາງສາຍຕ່າງໆ ໃນເມືອງທີ່ເປັນບ້ານເກີດຂອງທ່ານ ບ່ອນທີ່ບັນດາແຟນໆໄດ້ ພາກັນຢືນລຽນແຖວຢ່າງແໜ້ນໜາຢູ່ຕາມແຄມທາງເພື່ອກ່າວອຳລາດ້ວຍຄວາມປິຕິຍິນ ດີແລະດ້ວຍນ້ຳຕາ.
ພັນລະຍາໝ້າຍຂອງທ່ານ Ali ນາງ Lonnie ໄດ້ກ່າວເຖິງຄວາມຮັກຂອງທ່ານ Ali ໃນສາສະໜາອິສລາມ ແລະຄຳສັ່ງສອນ ທີ່ບໍ່ໃຊ້ຄວາມຮຸນແຮງ ຂອງສາສະໜາດັ່ງກ່າວ. ນາງກ່າວວ່າ ທ່ານຕ້ອງການຢາກໃຫ້ໃຊ້ພິທີສົ່ງສະການຂອງທ່ານເພື່ອຊຸກຍູ້ອຸດົມການຂອງທ່ານ ໂດຍເວົ້າວ່າ ທ່ານຕ້ອງການຢາກໃຫ້ພວກເຮົາ ເຕືອນຜູ້ຄົນທີ່ໄດ້ຮັບຄວາມ ທຸກທໍລະມານວ່າ ທ່ານໄດ້ປະສົບພົບເຫັນມາແລ້ວ ໂສມໜ້າຂອງຄວາມບໍ່ຍຸຕິທຳ ແຕ່ ທ່ານກໍບໍ່ເຄີຍໂກດແຄ້ນພໍທີ່ຈະຢຸດເຊົາຫຼືພົວພັນກັບການກໍ່ຄວາມຮຸນແຮງໃດໆ.
ນາງໄດ້ກ່າວເຖິງຄວາມມັກໃນການເດີນທາງແລະຜູ້ຄົນທຳມະດາສາມັນໂດຍເວົ້າວ່າ ໃນຂະນະທີ່ທ່ານໄດ້ເດີນທາງໄປໃສມາໃສ ແບບສະບາຍໆ ໃນທົ່ວໂລກ ພວກທີ່ຮັ່ງມີ ແລະຜູ້ມີອິດທິພົນກໍໄດ້ເຂົ້າມາໃກ້ຊິດທ່ານແຕ່ທ່ານກັບຫັນໄປຫາພວກທີ່ທຸກຍາກແລະພວກທີ່ຖືກຫລົງລືມ.
ສ່ວນອະດີດປະທານາທິບໍດີ Bill Clinton ກ່າວເຖິງທີ່ມາຂອງທ່ານ Ali ແລະການຫັນ ປ່ຽນຂອງທ່ານກາຍເປັນ ທະຫານສາກົນ ເພື່ອຄວາມເປັນມະນຸດຊາດຮ່ວມກັນ ຂອງ ພວກເຮົາ.
ທ່ານ Clinton ໄດ້ກ່າວເຖິງ ທ່ານ Ali ໄດ້ຕໍ່ສູ້ດ້ວຍຄວາມຫຍຸ້ງຍາກສ່ຳໃດ ກັບໂຣກ ພາກກິນຊັ່ນ ທີ່ທ່ານໄດ້ເປັນມາຫລາຍສິບປີກ່ອນທີ່ຈະເຖິງແກ່ກຳໃນສັບປະດາແລ້ວ ຮວມອາຍຸໄດ້ 74 ປີ ແຕ່ອະດີດ ປະທານາທິບໍດີ Bill Clinton ກໍໄດ້ກ່າວຊົມເຊີຍມູນ ເຊື້ອຂອງທ່ານ Ali.
