ການສູ້ລົບເພື່ອຍາດແຍ່ງເອົາຫົວເມືອງ ທີ່ມີພົນລະເມືອງຫຼາຍເປັນອັນດັບສອງຂອງ
ອີຣັກແມ່ນຢູ່ໃນຂັ້ນສຸດທ້າຍແລ້ວ ໂດຍທີ່ພວກນັກລົບຂອງກຸ່ມລັດອິສລາມ ຍັງເຫຼືອ
ຢູ່ບໍ່ຮອດ 1,000 ຄົນ ໃນ 3 ຄຸ້ມ ຂອງພາກຕາເວັນຕົກເມືອງໂມຊູລ ອີງຕາມເຈົ້າໜ້າ
ທີ່ກອງທັບສະຫະລັດ.
ໃນການຖະແຫຼງຜ່ານທາງ Skype ຈາກນະຄອນຫຼວງແບກແດັດ ນາຍພົນຈັດຕະວາ
Rick Uribe ຮອງຜູ້ບັນຊາການກຳລັງແນວໂຮມ ພາຍໃຕ້ການນຳພາຂອງສະຫະລັດ
ໃນອີຣັກ ກ່າວວ່າ “ລະດັບຂອງຄວາມໝົດຫວັງ” ໃນໝູ່ພວກນັກລົບລັດອິສລາມແມ່ນ
ເພີ່ມທະວີຂຶ້ນ.
ນາຍພົນ Uribe ກ່າວຕື່ມວ່າ “ພວກເຂົາຮູ້ວ່າພວກເຂົາຈະເສຍໄຊຢູ່ແລ້ວດັ່ງນັ້ນເປົ້າ
ໝາຍຂອງພວກເຂົາກໍຄື ສ້າງຄວາມເສຍຫາຍ ໃຫ້ຫຼາຍທີ່ສຸດ ບໍ່ພຽງແຕ່ ຕໍ່ກຳລັງທະ
ຫານຂອງອີຣັກເທົ່ານັ້ນ ແຕ່ຕໍ່ພວກເຄາະຮ້າຍທີ່ບໍ່ມີຄວາມຜິດແລະຜູ້ໃດກໍຕາມທີ່ຍັງ
ເຫລືອຢູ່ໃນເມືອງດັ່ງກ່າວ.”
ທ່ານ Uribe ກ່າວຕໍ່ວີໂອເອວ່າ ພວກຫົວຮຸນແຮງລັດອິສລາມ ທີ່ຍັງເຫລືອຢູ່ ບໍ່ຮອດ
1,000 ຄົນ ແມ່ນ “ເປັນນັກລົບ ທີ່ທົນທານທີ່ສຸດ ທີ່ຍັງເຫຼືອຢູ່” ແລະໄດ້ໃຊ້ເວລາໃນ
ເມືອງດັ່ງກ່າວເພື່ອສ້າງບ່ອນເກັບອາວຸດ ກັບດັກ ແລະລະບົບອຸໂມງ.
ອີງຕາມນາຍພົນ Uribe ແລ້ວ ພວກນັກລົບລັດອິສລາມ ຍັງສືບຕໍ່ຈັບໂຕປະກັນ ໃນ
ຄວາມພະຍາຍາມ ເພື່ອໃຊ້ເປັນເຫຍື່ອລໍ້ ໃຫ້ກຳລັງແນວໂຮມ ໂຈມຕີພົນລະເຮືອນ.
ທ່ານເວົ້າວ່າ ນອກນັ້ນພວກເຂົາຍັງໄດ້ທຳລາຍພື້ນຖານໂຄງລ່າງໃຫ້ຫຼາຍເທົ່າທີ່ຈະ
ຫຼາຍໄດ້ ເພື່ອໃຫ້ເປັນການຍາກຕື່ມຂຶ້ນໃນການທີ່ຈະເຮັດໃຫ້ພາກຕາເວັນຕົກຂອງ
ເມືອງໂມຊູລ ກັບຄືນເຂົ້າສູ່ສະພາບປົກກະຕິໄດ້ ຫຼັງຈາກພວກເຂົາປະລາໄຊແລ້ວ.
ສ່ວນໂຄສົກ ຂອງແນວໂຮມ ຕໍ່ຕ້ານກຸ່ມລັດອິສລາມ ພັນເອກ Ryan Dillon ກ່າວຕໍ່
ພວກນັກຂ່າວໃນວັນພະຫັດຜ່ານມານີ້ວ່າ “ອາວຸດທີ່ເປັນທາງເລືອກໃນເມືອງໂມຊູລ”
ຍັງສືບຕໍ່ແມ່ນລະເບີດລົດ.
ພັນເອກ Dillon ກ່າວຕໍ່ພວກນັກຂ່າວ ທີ່ທຳນຽບຫ້າແຈ ໃນລະຫວ່າງການຖະແຫຼງ
ຂ່າວທາງໂທລະສັບ ຈາກນະຄອນແບກແດັດວ່າ “ຍ້ອນການໂຈມຕີ ດ້ວຍລະເບີດ
ລົດຢູ່ໃນໃຈ ລັດຖະບານອີຣັກ ຈຶ່ງໄດ້ສັ່ງໃຫ້ພົນລະເຮືອນ ບໍ່ໃຫ້ໃຊ້ລົດ ຫຼືວ່າລົດຈັກ
ເພື່ອຫລີີກລ່ຽງຈາກການເຂົ້າໃຈຜິດວ່າ ເຂົາເຈົ້າເປັນພວກຫົວຮຸນແຮງ.”
ຫລັງຈາກໄດ້ຮ້ອງຂໍໃຫ້ປະຊາຊົນຢູ່ແຕ່ໃນເຮືອນ ກ່ອນການສູ້ລົບກັນທີ່ເມືອງໂມຊູລ
ກຳລັງຮັກສາຄວາມສະຫງົບຂອງອີຣັກ ບັດນີ້ໄດ້ຮຽກຮ້ອງໃຫ້ພົນລະເຮືອນຍົກຍ້າຍ
ອອກໜີຈາກເຂດເມືອງເກົ່າເພື່ອຈະຫລຸດຜ່ອນການບາດເຈັບລົ້ມຕາຍທີ່ບໍ່ໄດ້ຕັ້ງໃຈ.
