ພວກເຈົ້າໜ້າທີ່ຣັດເຊຍປາກົດວ່າໄດ້ກັກຂັງ ນາຍພົນເຊີເກ ຊູໂຣວິກິນ ໃນຖານສົງໄສວ່າ ທ່ານພົວພັນກັບການກໍ່ກະບົດຂອງກຸ່ມແວກເນີໃນອາທິດແລ້ວນີ້ ອີງຕາມລາຍງານສື່ມວນຊົນ.
ລາຍລະອຽດທີ່ສະເພາະເຈາະຈົງພົວພັນກັບຖານະຂອງນາຍພົນຊູໂຣວິກິນ ຍັງບໍ່ເປັນທີ່ຈະແຈ້ງ ແຕ່ພວກເຈົ້າໜ້າທີ່ຂັ້ນສູງຂອງຣັດເຊຍແລະສະຫະລັດ ໄດ້ກ່າວວ່າ ນາຍພົນອະວຸໂສໄດ້ຖືກກັກຂັງອີງຕາມລາຍງານຂອງໜັງສືພິມ Financial Times ແລະ The New York Times ໃນວັນພະຫັດວານນີ້.
ຄຳຖາມຕ່າງໆກ່ຽວກັບວ່າ ນາຍພົນຊູໂຣວິກິນ ໄດ້ຢູ່ໃສນັ້ນຍັງບໍ່ທັນແນ່ນອນມາໄດ້ຫລາຍມື້ແລ້ວ ເພາະວ່າບໍ່ໄດ້ເຫັນນາຍພົນທ່ານນີ້ຢູ່ໃນທີ່ສາທາລະນະ ນັບແຕ່ວັນທີ 24 ມິຖຸນາ ເວລາກຸ່ມທະຫານຮັບຈ້າງແວກເນີ ໄດ້ເດີນໄປສູ່ມົສກູ. ນາຍພົນຊູໂຣວິກິນໄດ້ເປັນທີ່ຮູ້ວ່າມີຄວາມສຳພັນທີ່ດີກັບຜູ້ນຳຂອງກຸ່ມແວກເນີ ເຢບເກນີ ປຣີໂກຊິນ.
ບໍ່ເປັນທີ່ແຈ່ມແຈ້ງວ່າ ນາຍພົນຊູໂຣວິກິນ ຮອງຜູ້ບັນຊາການຂອງກອງກຳລັງຣັດເຊຍທີ່ບຸລຸກເຂົ້າໄປໃນຢູເຄຣນ ໄດ້ຖືກກ່າວຫາຢ່າງເປັນທາງການໃນການມີສ່ວນໃນການກໍ່ກະບົດ ຫຼືພຽງແຕ່ຖືກຄຸມຂັງເພື່ອສອບຖາມ.
ແຕ່ວ່າມົສກູຍັງບໍ່ທັນໄດ້ຢືນຢັນຢ່າງເປັນທາງການວ່າ ມີຫຍັງໄດ້ເກີດຂຶ້ນຕໍ່ທ່ານນ.
ໂຄສົກວັງເຄຣັມລິນ ທ່ານເດີມີຕຣີ ແປສກັອຟ ໄດ້ກ່າວຕໍ່ບັນດານັກຂ່າວວ່າ ທ່ານບໍ່ສາມາດໃຫ້ຄວາມກະຈ່າງແຈ້ງໄດ້ກ່ຽວກັບສະຖານະການຂອງນາຍພົນຊູໂຣວິກິນ ແລະກ່າວວ່າ ພວກນັກຂ່າວຄວນຕິດຕໍ່ກັບກະຊວງປ້ອງກັນປະເທດ.
ນາຍພົນຊູໂຣວິກິນ ໄດ້ປາກົດໂຕຢູ່ໃນວີດິໂອໃນວັນເສົາທີ່ຜ່ານມາ ຮຽກຮ້ອງກຸ່ມແວກເນີ ໂຈະການເຄື່ອນໄຫວທາງທະຫານ ແລະກັບຄືນສູ່ຄ້າຍຂອງເຂົາເຈົ້າ.
ລູກສາວຂອງທ່ານ ນາງເວໂຣນິກາ ໄດ້ອ້າງວ່າ “ທຸກສິ່ງຢ່າງບໍ່ມີບັນຫາກັບພໍ່ຂອງນາງ. “ຄວາມຈິງແລ້ວ ບໍ່ ບໍ່ມີຫຍັງໄດ້ເກີດຂຶ້ນກັບທ່ານ. ທ່ານເຮັດວຽກຢູ່ໂຮງການ” ນາງໄດ້ກ່າວຕໍ່ອົງການຂ່າວບາຊາຂອງຣັດເຊຍ.”
