ສະຫະລັດ ກ່າວວ່າ ຕົນບໍ່ສາມາດ ໃຫ້ການຢືນຢັນ ຕໍ່ການກ່າວ
ອ້າງຂອງປະທານາທິບໍດີຣັດເຊຍທ່ານ Vladimir Putin ທີ່ເວົ້າ
ວ່າ ເວລານີ້ ຣັດເຊຍໄດ້ໃຫ້ການສະໜັບສະໜຸນພວກຕໍ່ຕ້ານລັດ
ຖະບານໃນຊີເຣຍ ທີ່ໄດ້ຮັບການໜຸນຫລັງ ຈາກປະເທດຕາເວັນ
ຕົກທີ່ພົວພັນໃນການປະຕິບັດງານຮ່ວມກັບກອງທັບຊີເຣຍເພື່ອ
ສູ້ລົບກັບກຸ່ມລັດອິສລາມ.
ທ່ານ John Kirby ໂຄສົກກະຊວງການຕ່າງປະເທດສະຫະລັດ
ກ່າວໃນວັນສຸກວານນີ້ວ່າ ສິ່ງທີ່ຂ້າພະເຈົ້າ ສາມາດບອກພວກ
ທ່ານໄດ້ ກໍແມ່ນວ່າມັນຍັງບໍ່ທັນເປັນທີ່ຈະແຈ້ງສຳລັບພວກເຮົາ
ເຊັ່ນດຽວກັນ. ຂ້າພະເຈົ້າບໍ່ຢູ່ໃນທ່າທີທີ່ຈະໃຫ້ການຢືນຢັນກ່ຽວ
ກັບຄວາມເຫັນດັ່ງກ່າວ ນອກຈາກຂໍເວົ້າວ່າ ສ່ວນໃຫຍ່ໃນການໂຈມຕີທາງອາກາດ ໂດຍເຮືອບິນລົບຂອງຣັດເຊຍແມ່ນຕໍ່ກຸ່ມຕໍ່ຕ້ານລັດຖະບານຂອງປະທານາທິບໍດີ Assad ແລະ
ບໍ່ໄດ້ແນໃສ່ກຸ່ມລັດອິສລາມຫຼື ISIL.
ທ່ານ Putin ກ່າວຕໍ່ເຈົ້າໜ້າທີ່ຂັ້ນສູງ ຂອງກະຊວງປ້ອງກັນປະເທດ ໃນວັນສຸກວານນີ້ວ່າ
ຣັດເຊຍໄດ້ໃຫ້ການຄຸ້ມກັນທາງອາກາດ ໃຫ້ອາວຸດ ແລະສຳພາລະຕ່າງໆແກ່ກຸ່ມກອງທັບ
ຊີເຣຍເສລີ ທີ່ໄດ້ທຳການສູ້ລົບກັບທະຫານລັດຖະບານມາ ເປັນເວລາດົນນານແລ້ວນັ້ນ.
ທ່ານ Kirby ກ່າວວ່າ ສິ່ງທີ່ຍັງບໍ່ຈະແຈ້ງກໍຄືວ່າພວກຕໍ່ຕ້ານລັດຖະບານມັກຈະໃຊ້ຄຳວ່າ
ກອງທັບຊີເຣຍເສລີ ຊຶ່ງໝາຍເຖິງການຄຸ້ມຄອງ ຂອງບັນດາກຸ່ມຕໍ່ຕ້ານລັດຖະບານທີ່ພະ
ຍາຍາມຫາທາງໂຄ່ນລົ້ມລັດຖະບານທ່ານ Assad ຢູ່ນັ້ນ.
ຖ້າຫາກການກ່າວອ້າງ ຂອງທ່ານ Putin ໄດ້ຮັບການຢືນຢັນແລ້ວ ມັນຈະເປັນການປ່ຽນ
ແປງທີ່ສຳຄັນ ໃນນະໂຍບາຍຂອງຣັດເຊຍ. ສະຫະລັດ ໄດ້ກ່າວຫາຣັດເຊຍວ່າ ໃຫ້ການສະໜັບສະໜຸນ ຕໍ່ອຳນາດການປົກຄອງ Assad ໂດຍທຳການ ໂຈມຕີກຸ່ມຕໍ່ຕ້ານລັດຖະ
ບານທີ່ນິຍົມແນວທາງປານກາງແທນທີ່ຈະໂຈມຕີກຸ່ມລັດອິສລາມທີ່ຣັດເຊຍກ່າວວ່າເປັນເຫດຜົນທີ່ພາໃຫ້ຣັດເຊຍເຂົ້າໄປໃນຊີເຣຍນັ້ນ.
ທ່ານ Kirby ກ່າວວ່າ ຍັງບໍ່ມີການປ່ຽນແປງ ທີ່ສຳຄັນໃດໆ ໃນການໂຈມຕີທາງອາກາດ
ຂອງຣັດເຊຍຢູ່ໃນຊີເຣຍແລະພວກຕໍ່ຕ້ານລັດຖະບານຍັງຖືກຣັດເຊຍໂຈມຕີຢູ່. ກອງທັບ
ຊີເຣຍເສລີກໍຍັງບໍ່ທັນໃຫ້ການຢືນຢັນເທື່ອວ່າຕົນໄດ້ຮັບການຊ່ອຍເຫຼືອຈາກທ່ານ Putin.
ທ່ານ Putin ເວົ້າວ່າ ເຮືອບິນລົບຂອງຣັດເຊຍໄດ້ໃຫ້ການຄຸ້ມກັນທາງອາກາດແລະການສະໜັບສະນໜຸນດ້ານສຳພາລະຕ່າງໆ ແກ່ທັງກອງທັບຊີເຣຍເສລີ ແລະທະຫານລັດຖະ
ບານ ທີ່ຮ່ວມກັນສູ້ລົບ ຕ້ານກຸ່ມລັດອິສລາມ. ທ່ານເວົ້າວ່າ ໃນເວລານີ້ ມີທະຫານຫລາຍ
ກວ່າ 5,000 ຄົນພວມທຳການສູ້ລົບທາງພາກພື້ນດິນທີ່ແຂວງ Homs, Hama, Aleppo
ແລະ Raqqa.
