ກອງປະຊຸມແຫ່ງຊາດຂອງພັກເດໂມແຄຣັດ ຫາກໍປິດລົງໃນຄືນວັນພະຫັດວານນີ້ ດ້ວຍທ່ານນາງ ຄາມາລາ
ແຮຣິສ ຮັບເອົາການສະເໜີຊື່ຂອງພັກ ເພື່ອລົງແຂ່ງຂັນຊິງຕຳແໜ່ງປະທານາທິບໍດີໃນເດືອນພະຈິກນີ້ຢ່າງເປັນທາງການ, ພ້ອມກັບຜູ້ຖືກສະເໜີຊື່ຮ່ວມລົງແຂ່ງຂັນຊິງຕຳແໜ່ງຮອງປະທານາທິບໍດີຂອງທ່ານນາງເຊັ່ນກັນ, ຄືທ່ານ ທິມ ວາລສ໌, ຜູ້ປົກຄອງລັດ ມິນເນໂຊຕ້າ. ຕໍ່ກັບການເລືອກຕັ້ງປະທານາທິບໍດີ ສະຫະລັດ ໃນປີນີ້ ມີຄົນລາວຈຳນວນນຶ່ງໄດ້ໃຫ້ຄວາມສົນໃຈເປັນພິເສດ ແລະ ກໍໄດ້ສະແດງຄວາມຄິດເຫັນຕໍ່ພວກເຮົາ. ຊຶ່ງ ພຸດທະສອນ ມີລາຍງານຈາກນັກຂ່າວຂອງພວກເຮົາມາສະເໜີທ່ານໃນອັນດັບຕໍ່ໄປ.
ຕົວເລືອກໃໝ່ສຳລັບພັກເດໂມແຄຣັດເພື່ອລົງແຂ່ງຂັນຊິງຕຳແໜ່ງປະທານາທິບໍດີ ສະຫະລັດ ໄດ້ສ້າງຄວາມຫວັງ ແລະ ຕື່ມເຕັ້ນຄັ້ງໃໝ່ໃຫ້ກັບປະຊາຊົນໃນ ສະຫະລັດ ແລະ ທົ່ວໂລກ. ກ່ອນໜ້ານີ້ ເວລາທີ່ປະທານາທິບໍດີ ໂຈ ໄບເດັນ ຍັງລົງແຂ່ງຂັນຢູ່, ຫຼາຍຄົນກໍຢ້ານ ແລະ ບໍ່ມີຄວາມຫວັງວ່າທ່ານຈະໄດ້ເປັນປະທານາທິບໍດີອີກ ຫຼັງຈາກຜົນງານທີ່ບໍດີຈາກການໂຕ້ວາທີກັບທ່ານ ດໍໂນລ ທຣຳ.
ຫຼັງຈາກນັ້ນມາຜົນຢັ່ງຫາງສຽງກໍໄດ້ສະແດງຄະແນນຂອງທ່ານ ໄບເດັນ ຕາມຫຼັງທ່ານ ທຣຳ ຕະຫຼອດມາ. ເມື່ອຖືກກົດດັນຢ່າງແຮງຈາກສະມາຊິກໃນພັກເດໂມແຄຣັດຢ່າງແຮງ ທ່ານ ໄບເດັນ ກໍໄດ້ຖອນຕົວອອກຈາກການແຂ່ງຂັນ ແລະ ໄດ້ຮັບຮອງເອົາຮອງປະທານາທິບໍດີ ຄາມາລາ ແຮຮິສ ລົງແຂ່ງຂັນແທນ. ຕັ້ງແຕ່ນັ້ນມາ ທຸກຢ່າງກໍໄດ້ປ່ຽນແປງ, ສະຖານະການກໍມີຄວາມຄຶກຄືນຂຶ້ນ, ການຢັ່ງຫາງສຽງກໍໄດ້ສະແດງໃຫ້ເຫັນທ່ານນາງ ແຮຣິສ ມີຄະແນນດີກວ່າທ່ານ ດໍໂນລ ທຣຳ ໃນຫຼາຍລັດເປັນຄັ້ງທຳອິດ.
ແຕ່ຜົນການເລືອກຕັ້ງດັ່ງກ່າວແມ່ນຍັງບໍ່ແນ່ນອນ, ໂດຍຜູ້ລົງແຂ່ງຂັນທັງສອງຄົນຍັງມີຄະແນນທີ່ສູສີກັນຫຼາຍ.
ປົກກະຕິແລ້ວ, ເຮົາຈະບໍ່ໄດ້ຍິນປະຊາຊົນໃນປະເທດລາວສະແດງຄວາມສົນໃຈ ໃນການເລືອກຕັ້ງ ສະຫະລັດ ຫຼາຍພໍປານໃດ, ແຕ່ມາເຖິງປັດຈຸບັນນີ້ ໄດ້ມີຄົນລາວຈຳນວນຫຼາຍຂຶ້ນ ທີ່ສົນໃຈ ແລະ ສະແດງຄວາມຄິດເຫັນ ກ່ຽວກັບ ການເລືອກຂອງ ສະຫະລັດ, ເຊິ່ງເຮົາກໍໄດ້ສຳພາດ ແລະ ຂໍຄວາມເຫັນຈາກເຂົາເຈົ້າ.
ນັກສຶກສາມະຫາວິທະຍາໄລເເຫ່ງຊາດຜູ້ໜຶ່ງໄດ້ກ່າວວ່າ:” ຄັນສົມມຸດທ່ານເເຮຣີສ ໄດ້ເປັນປະທານາທິບໍດີເເທ້ ລາວຈະໄດ້ເປັນຜູ້ຍິງຄົນທຳອິດທີ່ມີເຊື້ອສານອາຟິກັນ ອາເມລິກັນນຳຕໍ່ຈາກທ່ານບາຣັກ ໂອບາມາ. ມັນກະຈະມີຜູ້ມັກເເດ່ໂມເເຄຣັດ ເເດ່ຜູ້ມັກຣີພັບລີກັນເເດ່. ພັກເສລີຊົນ ກັບ ພັກອານຸລັກນິຍົມ. ເເຕ່ຖ້າທ່ານ ທຣຳໄດ້ເປັນປະທານາທິບໍດີລາວຈະບໍ່ໃຫ້ວີຊ່າເຂົ້າໄປອາເມລິກາໄດ້ງ່າຍໆຫັ້ນນະ ລາວຈະມາປ່ຽນນະໂຍບາຍຫຼາຍໆສຸດໂຕ່ງເກີນໄປໂດຍສະເພາະການປາໄສປ່ຽນນະໂຍບາຍຫຼາຍໆຢ່າງຂ້ອຍເລີຍບໍ່ມັກ”
ທ່ານ ດໍໂນລ ທຣຳ, ມີນະໂຍບາຍທີ່ບໍ່ຕ້ອນຮັບຄົນເຂົ້າເມືອງ ເຊິ່ງໄດ້ສະແດງໃຫ້ເຫັນໃນການດຳລົງຕຳແໜ່ງສະໄໝກ່ອນຂອງທ່ານ ທີ່ໄດ້ສ້າງກຳແພງເພື່ອກີດກັ້ນຜູ້ຍົກຍ້າຍຖິ່ນຖານຈາກປະເທດ ເມັກຊິກໂກ ແລະ ປະເທດອື່ນໆໃນບັນດາປະເທດອາເມຣິກາລາຕິນ, ພ້ອມກັນນັ້ນຍັງໄດ້ເນລະເທດນັກໂທດ ຫຼື ຜູ້ກະທຳຜິດທາງອາຍາທີ່ເປັນຄົນເຊື້ອຊາດອື່ນອອກຈາກປະເທດເປັນຈຳນວນຫຼວງຫຼາຍ. ໃນຂະນະດຽວກັນກໍໄດ້ຫ້າມອອກວີຊາໃຫ້ປະຊາຊົນລາວອີກດ້ວຍ.
ປະຊາຊົນລາວລຸ້ນໃໝ່ເຫັນໄດ້ວ່າສົນໃຈໃນລັດຖະບານທີ່ມີຫຼາຍພັກ ຊຶ່ງເຂົາເຈົ້າກໍໄດ້ປຽບທຽບໃຫ້ພວກເຮົາຟັງ.
“ຖ້າເວົ້າເລື່ອງການປົກຄອງເເບບຄອມມູນິດຈີນເເມ່ນມີຄວາມສະຫງົບເເຕ່ຖ້າເວົ້າເລື່ອງຂໍ້ເສີຍຂອງການປົກຄອງເເບບພັດດຽວເເຕ່ມັນກະຂຶ້ນກັບປະເທດມັນຂຶ້ນກັບຜູ້ນຳລ້ວນໆປຽບທຽບປະຊາທິປະໄຕຂອງເມກາເຊິ່ງເເຕ່ລະພັກຕ້ອງເອົານະໂຍບາຍດີໆໂຕເອງອອກມາເອົາໃຈປະຊາຊົນ. ພັກໃດຊະນະເສດຖະກິດລາວມັນກະຄືເກົ່າ ເເຕ່ປີນີ້ຖ້າພັກ ຣີພັບລີກັນ ຊະນະຄົນລາວອາດຈະໄດ້ໄປເມກາຍາກ ຍ້ອນນະໂຍບາຍຂອງທຣຳ ຈາກສະພາບ ປັດຈຸບັນທີ່ຍາກຢູ່ເເລ້ວ.”
ຜູ້ໃຫ້ສຳພາດແກ່ພວກເຮົານອກຈາກຈະມີຄວາມເປັນຫ່ວງ ກ່ຽວກັບ ຜົນກະທົບຕໍ່ຄົນໃນປະເທດລາວແລ້ວ, ເຂົາເຈົ້າກໍໄດ້ສະແດງຄວາມຄິດເຫັນ ກ່ຽວກັບ ສິ່ງທີ່ຈະກະທົບຕໍ່ບັນຫາຂັດແຍ້ງທີ່ເກີດຂຶ້ນໃນໂລກເຊັ່ນກັນ ໂດຍສະເພາະແມ່ນສົງຄາມ ຢູເຄຣນ ທີ່ດຳເນີນມາໄດ້ສອງປີປາຍແລ້ວ.
ພະນັກງານເອກະຊົນທີ່ເຮັດວຽກໃນວົງການສື່ມວນຊົນໃນນະຄອນຫຼວງວຽງຈັນດັ່ງກ່າວກໍໃຫ້ສຳພາດວ່າ: ມັນຈະເປັນການປ່ຽນຂົ້ວອຳນາດຄັ້ງຍິ່ງໃຫຍ່ສົມມຸດທຣຳ ໄດ້ເປັນເນາະ ມັນກະຈະສົ່ງຜົນກະທົບເຖິງສົງຄາມຢູ່ຢູເຄຣນກັບຣັດເຊຍເພາະວ່າ ທຣຳ ເຄີຍເວົ້າວ່າ ລາວຢາກຈະຈົບສົງຄາມພາຍໃນມື້ດຽວໄດ້ຖ້າລາວໄດ້ເປັນປະທານາທິບໍດີນະ. ເເຕ່ມັນ ເປັນໄປບໍ່ໄດ້ດອກ. ຖ້າເປັນເເທ້ອາດຈະມີການງົດສົ່ງອາວຸດໄປໃຫ້ ຢູເຄຣນ ເເລະ ພະຍາຍາມບີບໃຫ້ ຢູເຄຣນ ເເບບຍອມໄປເອງຫັ້ນນະ. ເຊິ່ງສ່ວນຕົວຄິດວ່າ ທຣຳນ່າຈະໄດ້ເປັນປະທານາທິບໍດີຫຼາຍກວ່າທາງຝ່າຍເດໂມເເຄຣັດກະຍ້ອນວ່າທຣຳກະອາດຈະໄດ້ຮັບຄະເເນນສົງສານຕອນທີ່ລາວຖືກລັກຍິງໃກ້ກັບຫູຂອງລາວເເຕ່ສ່ວນຕົວມັກຄວາມເປີດກວ້າງຂອງພັກເດໂມເເຄຣັດຫັ້ນນະ. ພັກລີພັບລິກັນເອົາເເຕ່ຄົນເອເມລິກັນໃຫ້ພົນລະເມືອງອາເມລິກັນມັນກະດີສຳລັບຄົນໃນປະເທົ່າເຂົາເຈົ້າເເຕ່ມັນກະສົ່ງຜົນເສຍຕໍ່ຄົນອົບພະຍົກ ຫຼື ຄົນເມັກຊິກັນ ຈະບໍ່ໄດ້ຮັບ ການເບິ່ງເເຍງທີ່ດີຖ້າເກີດວ່າພັກຣີພັບລີກັນໄດ້ຂຶ້ນ”
ການເລືອກຕັ້ງປະທານາທິບໍດີ ສະຫະລັດ ແມ່ນໄດ້ຫຍັບໃກ້ເຂົ້າມາຫຼາຍແລ້ວ, ເຊິ່ງຈະຖືກຈັດຂຶ້ນໃນວັນທີ 5 ພະຈິກ. ທ່ານນາງ ຄາມາລາ ແຮຣິສ ແລະ ທ່ານ ດໍໂນລ ທຣຳ ກໍມີກຳນົດທີ່ຈະທຳການໂຕ້ວາທີກັນເປັນຄັ້ງທຳອິດໃນວັນອັງຄານທີ 10 ກັນຍາ ຢູ່ນະຄອນ ຟິລາແດລເຟຍ, ລັດ ເພັນຊິລເວເນຍ. ເຊິ່ງການໂຕ້ວາທີຄັ້ງຄາດວ່າຈະມີການໂຕ້ຖຽງກັນຢ່າງດຸເດືອດ ແຕກຕ່າງຈາກການໂຕ້ວາທີລະຫວ່າງທ່ານ ໄບເດັນ ແລະ ທ່ານ ທຣຳ ໃນເດືອນກໍລະກົດທີ່ຜ່ານມາຢ່າງແນ່ນອນ.
ຟໍຣັມສະແດງຄວາມຄິດເຫັນ