ອຸບັດເຫດເທິງທ້ອງຖະໜົນເຮັດໃຫ້ເກີດການເສຍຫາຍຫຼາຍຂຶ້ນ
ໂດຍສະເພາະແມ່ນໃນເຂດນະຄອນຫຼວງວຽງຈັນ ທີ່ມີຍວດຍານ
ພາຫະນະເພີ່ມຂຶ້ນ ແຕ່ຜູ້ຂັບຂີ່ຍານພາຫະນະ ກັບພາກັນຝ່າຝືນ
ກົດຈະລາຈອນຫຼາຍຂຶ້ນນັບມື້.
ກະຊວງປ້ອງກັນຄວາມສະຫງົບພາຍໃນລາວ ລາຍງານວ່າ ມີອຸບັດເຫດເທິງທ້ອງຖະໜົນ
ເກີດຂຶ້ນເຖິງ 646 ກໍລະນີ ໃນທົ່ວປະເທດ ໃນຕະຫລອດຊ່ວງເດືອນເມສາ ທີ່ຜ່ານມາ ໂດຍ
ເຖິງແມ່ນວ່າ ຈຳນວນອຸບັດເຫດ ຈະຫຼຸດລົງຈາກ 673 ກໍລະນີ ເມື່ອທຽບກັບເດືອນເມສາ
2014 ກໍຕາມ ຫາກແຕ່ກໍປາກົດວ່າ ອຸບັດເຫດທີ່ເກີດຂຶ້ນໃນຊ່ວງເດືອນເມສາ 2015 ນີ້
ມີລະດັບຄວາມຮຸນແຮງຫຼາຍກວ່າເດືອນເມສາປີທີ່ແລ້ວ.
ດັ່ງຈະເຫັນໄດ້ຈາກຈຳນວນ ຜູ້ທີ່ເສຍຊີວິດໃນອຸບັດເຫດ ທີ່ເພີ່ມຂຶ້ນຈາກ 108 ຄົນ ເປັນ 133 ຄົນ. ສ່ວນຈຳນວນຜູ້ໄດ້ຮັບບາດເຈັບນັ້ນ ເຖິງແມ່ນຈະຫຼຸດລົງ ຈາກ 1,123 ຄົນ ເປັນ
1,066 ຄົນ ແລະ ຍານພາຫະນະທີ່ເສຍຫາຍ ກໍຫຼຸດລົງຈາກ 1,200 ກວ່າຄັນເປັນ 1,113 ຄັນ ກໍຕາມ ຫາກແຕ່ດ້ວຍລະດັບຄວາມຮຸນແຮງຂອງອຸບັດເຫດ ທີ່ເພີ່ມຂຶ້ນນັ້ນ ກໍໄດ້ເປັນ
ຜົນເຮັດໃຫ້ເກີດການເສຍຫາຍເພີ່ມຂຶ້ນຈາກ 7 ຕື້ກວ່າກີບ ໃນເດືອນເມສາ 2014 ເປັນ
ຫຼາຍກວ່າ 8 ຕື້ກີບ ໃນເດືອນເມສາ 2015 ນີ້.
ໂດຍເຂດທີ່ເກີດອຸບັດເຫດເທິງທ້ອງຖະໜົນ ຫຼາຍທີ່ສຸດໃນຊ່ວງ
ດັ່ງກ່າວນີ້ ກໍຄືນະຄອນຫຼວງວຽງຈັນ ທີ່ມີອຸບັດເຫດເກີດຂຶ້ນ 145
ກໍລະນີ ຊຶ່ງເຮັດໃຫ້ມີຜູ້ເສຍຊີວິດໄປ 31 ຄົນ ແລະ ບາດເຈັບ
188 ຄົນ ຕິດຕາມດ້ວຍແຂວງຈຳປາສັກ ທີ່ມີອຸບັດເຫດເກີດຂຶ້ນ
90 ກໍລະນີ ມີຜູ້ເສຍຊີວິດໄປ 11 ຄົນ ແລະ ບາດເຈັບ 175 ຄົນ
ສ່ວນອັນດັບທີ 3 ກໍຄືແຂວງວຽງຈັນ ທີ່ມີອຸບັດເຫດເກີດຂຶ້ນ 80
ກໍລະນີ ມີຜູ້ເສຍຊີວິດໄປ 10 ຄົນ ແລະ ໄດ້ຮັບບາດເຈັບ 137 ຄົນ
ຕາມລຳດັບ ສຳຫລັບສາເຫດທີ່ເຮັດໃຫ້ເກີດອຸບັດເຫດຫຼາຍທີ່ສຸດ
ກໍແມ່ນການຂັບຂີ່ຍານພາຫະນະ ໃນຂະນະເມົາສຸລາ ແລະ ການ
ຂັບຂີ່ລົດໄວ ທີ່ເກີນກຳນົດ ໂດຍສະເພາະແມ່ນໃນເວລາກາງຄືນ
ຖືເປັນຊ່ວງທີ່ມີອຸບັດເຫດເກີດຂຶ້ນຫຼາຍທີ່ສຸດ ດັ່ງທີ່ເຈົ້າໜ້າທີ່ຕຳຫລວດລາວ ໄດ້ຢືນຢັນວ່າ:
“ຖ້າທຽບໃສ່ໃນປີທີ່ຜ່ານມາ ກະເຫັນວ່າເພີ່ມຂຶ້ນຫັ້ນແລ້ວ ແຕ່ວ່າອຸບັດເຫດສ່ວນໃຫຍ່ ມັນເກີດຂຶ້ນຫັ້ນ ຢູ່ຕົວເມືອງໃຫຍ່ ໃນເຂດເທດສະບານ ແລະກະເກີດໃນໄລຍະເວລາ 19 ໂມງ ຫາເວລາ 23 ໂມງນີ້ ເປັນສ່ວນຫຼາຍ ຈາກບັນຫາດັ່ງກ່າວ ມາເບິ່ງແລ້ວ ນີ້ແມ່ນຜູ້ຂັບຂີ່ຂາດສະຕິ ແລ່ນລົດໄວພາໃຫ້ເກີດອຸບັດເຫດ.”
ນອກຈາກນີ້, ມີສາເຫດເກີດຈາກການ ທີ່ມີຈຳນວນຍານພາຫະນະ ເພີ່ມຂຶ້ນຢ່າງໄວວາ.
ໃນຂະນະທີ່ພື້ນຜິວຖະຫນົນ ມີຢູ່ຢ່າງຈຳກັດ. ຊຶ່ງກໍ່ເຮັດໃຫ້ເກີດບັນຫາຈາລະຈອນ ແອອັດ
ຢ່າງຫຼີກລ້ຽງບໍ່ໄດ້ ໂດຍສະເພາະແມ່ນໃນເຂດນະຄອນຫຼວງວຽງຈັນ ທີ່ມີຍານພາຫະນະ
ຫຼາຍກວ່າ 7 ແສນຄັນ ແລະ ສະພາບການດັ່ງກ່າວ ກໍຍັງເຮັດໃຫ້ຕ້ອງນຳເຂົ້າ ນ້ຳມັນເຊື້ອໄຟ ຈາກຕ່າງປະເທດ ເພີ່ມຂຶ້ນນັບມື້ອີກດ້ວຍ
ໂດຍກະຊວງອຸດສາຫະກຳ ແລະການຄ້າ ລາຍງານວ່າ ລາວໄດ້ນໍາາເຂົ້ານຳມັນເຊື້ອໄຟ
ໃນປະລິມານລວມຫຼາຍກວ່າ 960 ລ້ານລິດໃນປີ 2014, ເຊິ່ງເພີ່ມຂຶ້ນໃນອັດຕາສະເລ່ຍ
ຫຼາຍກວ່າ 5 ເປີເຊັນ ທຽບໃສ່ປີ 2013 ແລະ ດ້ວຍສະພາບການທີ່ມີການລົງທຶນຂອງ
ຕ່າງຊາດໃນລາວເພີ່ມຂຶ້ນນັບມື້ ຍັງເຮັດໃຫ້ຄາດວ່າ ໃນປີ 2015 ລາວຈະນໍາາເຂົ້ານ້ຳມັນ
ເຊື້ອໄຟຫຼາຍກວ່າ 1,270 ລ້ານລິດ ຫຼືເພີ່ມຂຶ້ນຫຼາຍກວ່າ 32 ເປີເຊັນ ທຽບໃສ່ປີ 2014
ແລະ ຄິດເປັນມູນຄ່າຫຼາຍກວ່າ 780 ລ້ານດອນລາ.
ເຈົ້າຫນ້າທີ່ຂັ້ນສູງໃນກົມພາສີ ກະຊວງການເງິນໄດ້ຢືນຢັນວ່າ ການນໍາາເຂົ້ານ້ຳມັນເຊື້ອ
ໄຟເພີ່ມຂຶ້ນດັ່ງກ່າວ. ບໍ່ພຽງແຕ່ຈະເຮັດໃຫ້ ລາວຕ້ອງປະເຊີນກັບການຂາດດຸນການຄ້າ
ຕ່າງປະເທດເພີ່ມຂຶ້ນເທົ່ານັ້ນ ຫາກແຕ່ກໍຍັງຈະເຮັດໃຫ້ລັດຖະບານລາວ ຕ້ອງສູນເສຍ
ລາຍຮັບຈາກພາສີອາກອນເພີ່ມຂຶ້ນອີກດ້ວຍ ເນື່ອງຈາກລັດຖະບານລາວໄດ້ຍົກເວັ້ນພາສີ
ອາກອນການນໍາເຂົ້າສິນຄ້າ ໃຫ້ແກ່ບັນດາບໍລິສັດຕ່າງຊາດ ທີ່ລົງທຶນຢູ່ໃນລາວໃນຫລາຍ
ລາຍການ ຊຶ່ງລວມເຖິງນ້ຳມັນເຊື້ອໄຟດ້ວຍ ໂດຍຈະເຫັນໄດ້ຈາກໃນປີ 2014 ທີ່ຜ່ານມາກໍປາກົດວ່າ ລາວຕ້ອງສູນເສຍລາຍຮັບຈາກການຍົກເວັ້ນພາສີດັ່ງກ່າວ ຄິດເປັນມູນຄ່າລວມຫຼາຍກວ່າ 1,600 ຕື້ກີບ ຫຼື ຫຼາຍກວ່າ 200 ລ້ານດອນລາ.
