ພວກເຈົ້າໜ້າທີ່ເລືອກຕັ້ງຂອງ
ມົງໂກເລຍເວົ້າວ່າ ພັກປະຊາ
ທິປັດ ຊຶ່ງເປັນພັກຝ່າຍຄ້ານໄດ້
ຮັບຄະແນນສຽງຫລາຍກວ່າ
ພັກປະຊາຊົນມົງໂກເລຍ ຫຼື
MPP ທີ່ປົກຄອງປະເທດໃນ
ປັດຈຸບັນ ໃນການເລືອກຕັ້ງ
ສະພາແຫ່ງຊາດຊຸດໃໝ່ເມື່ອ
ວັນພະຫັດທີ່ຜ່ານມາ, ແຕ່ບໍ່
ໄດ້ຮັບຄະແນນພຽງພໍທີ່ຈະ
ເປັນພັກສຽງສ່ວນຫລາຍໃນ
ສະພາໄດ້.
ຜົນການເລືອກຕັ້ງຂັ້ນສຸດທ້າຍ
ຍັງບໍ່ທັນໄດ້ປະກາດໃຫ້ຮູ້ເທື່ອ
ຍ້ອນວ່າມີບັນຫາທາງເທັກນິກ
ກ່ຽວກັບລະບົບນັບບັດແບບ
ອັດຕະໂນມັດ ທີ່ໄດ້ເລີ້ມເອົາມາ
ນໍາໃຊ້ ເພື່ອຮັບປະກັນຄວາມ
ຍຸດຕິທໍາໃນຂັ້ນຕອນການລົງຄະ
ແນນສຽງເລືອກຕັ້ງ.
ພັກປະຊາຊົນມົງໂກເລຍ ຊຶ່ງເປັນພັກຂອງລັດຖະບານຊຸດປັດຈຸບັນ ແລະອີກ 8 ພັກທີ່
ນ້ອຍກວ່າ ໄດ້ຮ້ອງຂໍໃຫ້ມີການເລືອກຕັ້ງໃໝ່ ໂດຍອ້າງເຖິງ ບັນຫາຂັດຂ້ອງທາງເທັກນິກ ໃນລະບົບນັບບັດໃໝ່ນີ້.
ມີຫລາຍພັກໄດ້ຂໍໃຫ້ມີການນັບບັດຄືນໃໝ່ ທ່າມກາງການກ່າວຫາວ່າ ມີການໂກງຄະແນນ
ສຽງ ແລະມີຄວາມເປັນຫ່ວງກ່ຽວກັບລະບົບປ່ອນບັດແບບໃໝ່.
ໃນວັນເສົາວານນີ້ ຫົວໜ້າຄະນະກໍາມະການເລືອກຕັ້ງ ທ່ານ Namsrijavttulg Luvsanjav ໄດ້ກ່າວປົກປ້ອງເທັກໂນໂລຈີໃໝ່ນັ້ນ ໂດຍໃຫ້ເຫດຜົນວ່າ ການນັບບັດດ້ວຍມືຢູ່ສະຖານທີ່
ປ່ອນບັດບາງບ່ອນ ສ່ວນຫລາຍກໍໄດ້ສະແດງໃຫ້ເຫັນຜົນການເລືອກຕັ້ງແບບດຽວກັນກັບ ລະບົບນັບບັດແບບອັດຕະໂນມັດນີ້.
ຄາດວ່າ ພັກປະຊາທິປັດຝ່າຍຄ້ານ ຈະໄດ້ຮັບບ່ອນນັ່ງສ່ວນໃຫຍ່ ໃນສະພາທີ່ມີບ່ອນນັ່ງ
ທັງໝົດ 76 ບ່ອນນັ້ນ ແຕ່ກໍຈະຕ້ອງໄດ້ປະກອບລັດຖະບານປະສົມຮ່ວມກັບພັກອື່ນ. ຜົນ
ການເລືອກຕັ້ງຢ່າງເປັນທາງການ ມີກໍານົດຈະປະກາດໃຫ້ຮູ້ ພາຍໃນ 14 ມື້ຫລັງຈາກການ
ເລືອກຕັ້ງ.
