ປະຊາຊົນມົງໂກເລຍພາກັນໄປປ່ອນບັດລົງຄະແນນສຽງໃນວັນພະຫັດມື້ນີ້ ເພື່ອເລືອກຕັ້ງ
ເອົາສະມາຊິກສະພາແຫ່ງຊາດຊຸດໃໝ່ ທີ່ຈະມີພາ ລະກິດໃນການກຳນົດກ່ຽວກັບວ່າ ຈະມີການນຳໃຊ້ແບບໃດຈຶ່ງຈະດີທີ່ສຸດຄວາມອຸດົມຮັ່ງມີໃນດ້ານບໍ່ແຮ່ຂອງປະເທດເພື່ອຊ່ອຍເຫຼືອພວກປະ ຊາຊົນທີ່ຍັງທຸກຈົນຢູ່ນັ້ນ.
ມົງໂກເລຍທີ່ຮັ່ງອຸດົມມີໃນດ້ານຊັບພະຍາກອນທໍາມະຊາດອວດອ້າງວ່າຕົນມີເສດຖະກິດທີ່ເຕີບໂຕຂຶ້ນໄວທີ່ສຸດຂອງໂລກ ເນື່ອງຈາກມີລາຍຮັບ ກະໂດດຂຶ້ນຢ່າງຫຼວງຫຼາຍຈາກຊັບພະຍາກອນແຮ່ຄໍາ ທອງແດງແລະ ເຫຼັກທີ່ສ່ວນໃຫຍ່ຍັງບໍ່ທັນໄດ້ຂຸດຄົ້ນອອກມາໃຊ້ເທື່ອນັ້ນ.
ເຖິງແມ່ນເສດຖະກິດຂອງມົງໂກເລຍເຕີບໂຕຂຶ້ນ 17 ເປີເຊັນໃນປີແລ້ວນີ້ກໍຕາມ ແຕ່ຄວາມອຸດົມຮັ່ງມີທີ່ພົບໃໝ່ນີ້ ມາຮອດປັດຈຸບັນ ໄດ້ນໍາຜົນປະໂຫຍດພຽງເລັກນ້ອຍ ມາຊ່ອຍປະຊາຊົນຈໍານວນ 2 ລ້ານ 8 ແສນຄົນຂອງປະເທດ ຊຶ່ງ 1 ສ່ວນ 3 ຂອງຈໍານວນປະຊາກອນ ແມ່ນດໍາ ລົງຊີວິດການເປັນຢູ່ ຕໍ່າກວ່າລະດັບທຸກຈົນ.
ການສໍາຫຼວດຫາງສຽງປະຊາຊົນສະແດງໃຫ້ເຫັນວ່າ ພັກປະຊາທິປັດຊຶ່ງເປັນພັກຝ່າຍຄ້ານທີ່ໃຫຍ່ທີ່ສຸດມີສຽງນໍາໜ້າພັກປະຊາຊົນມົງໂກເລຍ ຫຼື MPP ທີ່ປົກຄອງປະເທດໃນປັດຈຸບັນ ໃນການເລືອກຕັ້ງໃນວັນພະ ຫັດມື້ນີ້. ທັງສອງພັກຕ່າງກໍໃຫ້ຄໍາໝັ້ນສັນຍາທີ່ຈະຈັດຕັ້ງກອງທຶນຂຶ້ນ ເພື່ອຈະແບ່ງປັນຜົນກໍາໄລທີ່ໄດ້ຮັບຈາກແຫຼ່ງຊັບພະຍາກອນບໍ່ແຮ່ໃຫ້ສະເໜີພາບຫຼາຍຂຶ້ນໃນທົ່ວສັງຄົມນັ້ນ.
ການເລືອກຕັ້ງ ໄດ້ເຕັມໄປດ້ວຍການກ່າວຫາ ກ່ຽວກັບການສໍ້ລາດບັງຫຼວງ ຊຶ່ງເວລານີ້ການຕໍ່ສູ້ກັນທາງດ້ານກົດໝາຍພວມດໍາເນີນໄປຢູ່ລະ ຫວ່າງປະທານາທິບໍດີ Elbegdorj Tsakhia ແລະທ່ານ Enkhbayar Nambar ປະທານາທິບໍດີຄົນກ່ອນຂອງມົງໂກເລຍ.
