ສະພາ ສະຫະລັດ ໄດ້ພາກັນຮຽກຮ້ອງເພີ້ມຂຶ້ນໃຫ້ມີຄໍາສັ່ງຫ້າມການນໍາເຂົ້ານໍ້າມັນຈາກ ຣັດເຊຍ, ໂດຍຕັດປະ ທານາທິບໍດີ ຣັດເຊຍ ທ່ານ ວລາດີເມຍ ປູຕິນ ອອກຈາກແຫຼ່ງລາຍຮັບຫຼັກຂອງພວກເຂົາ ເພື່ອເປັນການຕອບໂຕ້ຕໍ່ຣັດເຊຍ ໃນການຮຸກຮານ ຢູເຄຣນ ແບບບໍ່ມີການເກາະຜິດ.
ສະມາຊິກສະພາສູງ ຈາກພັກເດໂມແຄຣັດ ທ່ານດິກ ເດີບິນ (Dick Durbin) ກ່າວຢູ່ໃນສະພາໃນມື້ວັນຈັນວານນີ້ວ່າ “ດ້ວຍເຫດໃດພວກເຮົາຈຶ່ງຈະຕ້ອງນໍາເຂົ້ານໍ້າມັນ ແລະ ອາຍແກັສເພື່ອໃຫ້ກໍາໄລ ແລະ ການດໍາເນີນທຸລະກິດ ໃຫ້ແກ່ ວລາດີເມຍ ປູຕິນ ໃນການຊື້ເຄື່ອງຈັກສົງຄາມຂອງລາວ?”
ທ່ານ ເດີບິນ ໄດ້ສະເໜີຮ່າງກົດໝາຍທີ່ໄດ້ຮັບການສະໜັບສະໜຸນຈາກສອງພັກໃນມື້ວັນພະຫັດແລ້ວນີ້ ພ້ອມດ້ວຍສະມາຊິກສະພາສູງອີກ 11 ຄົນ ທີ່ເຫັນດີໃນການຫ້າມນໍາເຂົ້ານໍ້າມັນຊົ່ວຄາວຈາກ ຣັດເຊຍ ລວມເຖິງການໂຈະການຄ້າ ລະຫວ່າງ ສະຫະລັດ ແລະ ຣັດເຊຍ ນໍາອີກດ້ວຍ.
ທ່ານກ່າວວ່າ ຖ້າຂໍ້ສະເໜີດັ່ງກ່າວຫາກໄດ້ຮັບການຮັບຮອງ, ຜົນທີ່ອອກມາຂອງກົດໝາຍນັ້ນຈະເປັນໄປໄດ້ວ່າ “ທົ່ວໂລກລວມເຖິງ ສະຫະລັດ ມີແນວໂນ້ມທີ່ຈະຈ່າຍຄ່ານໍ້າມັນແພງຂຶ້ນໃນການໃສ່ນໍ້າມັນຢູ່ທີ່ປໍ້າ ຄ່າອາຍຮ້ອນຢູ່ເຮືອນກໍເຊັ່ນດຽວກັນ, ພວກເຮົາຕ້ອງກຽມພ້ອມສໍາລັບຄວາມເປັນຈິງ. ແຕ່ນັ້ນແມ່ນລາຄາໃນປັດຈຸບັນ ເພື່ອປົກປ້ອງອິດສະຫຼະພາບ ແລະ ປະຊາທິປະໄຕ. ປະຊາຊົນຢູເຄຣນກໍາລັງຈ່າຍດ້ວຍການໃຊ້ຊີວິດຂອງພວກເຂົາເຈົ້າ, ພວກເຮົາອາດຈະຈົບລົງດ້ວຍການຈ່າຍເງິນຫຼາຍກວ່າເກົ່າຢູ່ທີ່ປໍ້ານໍ້າມັນ.”
ໃນຈົດໝາຍໃນມື້ວັນອາທິດແລ້ວນີ້ ປະທານສະພາຕໍ່າ ທ່ານນາງ ແນນຊີ ເພໂລຊີ (Nancy Pelosi) ກ່າວຕໍ່ສະມາຊິກສະພາຕ່ຳວ່າ “ເພື່ອນຮ່ວມງານທີ່ຮັກ” ທາງສະພາຕໍ່າກຳລັງດໍາເນີນງານໃນຮ່າງກົດໝາຍຂອງຕົນເອງ ໃນການຫ້າມການນໍາເຂົ້າເຫຼົ່ານັ້ນ.
ດ້ວຍລາຄາພະລັງງານທີ່ເພີ້ມສູງຂຶ້ນຢູ່ໃນສະຫະລັດແລ້ວນັ້ນ ເນື່ອງຈາກການຮຸກຮານ, ບັນດາສະມາຊິກສະພາກຳລັງປະເຊີນໜ້າຄວາມເປັນຫ່ວງ ກ່ຽວກັບ ການຫ້າມດັ່ງກ່າວອາດເພີ້ມຄວາມກົດດັນຕໍ່ຊາວ ອາເມຣິກັນ ທີ່ພວມປະເຊີນໜ້າກັບໄພເງິນເພີ້ມທີ່ກຳລັງສູງຂຶ້ນ.
