ລາວຍອມຮັບວ່າ ປະຊາຊົນລາວພາກັນ ໃຊ້ຢາເສບຕິດ ແລະປູກຝິ່ນຫຼາຍຂຶ້ນ

ລັດຖະມົນຕີລາວຍອມຮັບວ່າ ລາວກຳລັງປະເຊີນກັບບັນຫາການຊົມໃຊ້ຢາເສດຕິດຫຼາຍຂື້ນ ແລະໃນຂະນະດຽວກັນປະຊາຊົນລາວກໍ່ໄດ້ພາກັນກັບຄືນໄປລັກລອບປູກຝິ່ນຫຼາຍຂື້ນເລື້ອຍໆອີກດ້ວຍ.

ທ່ານສຸບັນ ສະລິດທິລາດ ລັດຖະມົນຕີປະຈຳສຳນັກງານນາຍຍົກລັດຖະມົນຕີ ໄດ້ຖະແຫລງຍອມຮັບໃນຖານະປະທານຄະນະກໍາມະການຄວບຄຸມ ແລະກວດກາຢາເສບຕິດແຫ່ງຊາຕິລາວວ່າ ປະເທດລາວກຳລັງປະເຊີນກັບບັນຫາການຊົມໃຊ້ຢາເສບຕິດເພີ້ມຫຼາຍຂື້ນນັບມື້ ໂດຍສະເພາະແມ່ນການຊົມໃຊ້ຢາບ້າຂອງບັນດາເຍົາວະຊົນລາວນັ້ນ ຖືເປັນສະຖານະການທີ່ໜ້າເປັນຫ່ວງຢ່າງຍິ່ງ ແລະໃນຂະນະດຽວກັນກໍຍັງປະກາດວ່າ ມີປະຊາຊົນໄດ້ພາກັນກັບຄືນໄປລັກລອບປູກຝິ່ນຫຼາຍຂື້ນເລື້ອຍໆອີກດ້ວຍ.

ທ່ານສຸບັນ ໄດ້ໃຫ້ການອະທິບາຍວ່າສາເຫດທີ່ເຮັດໃຫ້ມີຄົນລາວຊົມໃຊ້ ຫຼືຕິດຢາບ້າຫຼາຍຂື້ນນັ້ນ

ກໍຍ້ອນວ່າລາວໄດ້ຕົກໄປເປັນປະເທດເຂດທາງຜ່ານ ຂອງການລັກລອບຂົນສົ່ງຢາເສບຕິດໄປຍັງຕ່າງປະເທດ ຫລື ປະເທດທີສາມເພີ້ມຫຼາຍຂຶ້ນ​ນັບ​ມື້ ສ່ວນການສາເຫດທີ່ເຮັດໃຫ້ປະຊາຊົນລາວໄດ້ພາກັນກັບຄືນໄປລັກລອບປູກຝິ່ນຫລາຍຂຶ້ນນັ້ນ ກໍຍ້ອນວ່າ ໂຄງການພັດທະນາ ເພື່ອແກ້ໄຂປັນຫາຄວາມຢາກຈົນເຂົ້າໄປບໍ່ເຖີງໝູ່ບ້ານສ່ວນໃຫ່ຍທີ່ເຂົ້າຮ່ວມໃນແຜນການ ລົບລ້າງການປູກຝິ່ນຢ່າງສີ້ນເຊີງ ຈໍານວນ 1,100 ກວ່າ

ໝູ່ບ້ານ ນັບແຕ່ປີ 2006 ເປັນຕົ້ນມາ.

ນອກຈາກນີ້ ເມື່ອປະກອບກັບການທີ່ຢູ່ໃນລາວ ກໍຍັງຄົນຕິດຢາຢາຝິ່ນຢູ່ ຫຼາຍກວ່າ 15,000 ຄົນ ແລະໃນຂະນະດຽວກັນລາຄາຢາຝິ່ນໃນປັດຈຸບັນນີ້ ກໍໄດ້ເພີ້ມຂຶ້ນເຖິງ 16 ເທົ່າ ເມື່ອທຽບກັບປີ 2011 ຈຶ່ງເຮັດໃຫ້ປະຊາຊົນລາວໄດ້ພາກັນກັບຄືນໄປປູກຝິ່ນອີກເທື່ອໄໝ່.

ກ່ອນໜ້ານີ້ ອົງການ​ຄວບ​ຄຸມ​ຢາ​ເສບ​ຕິດ ​ແລະອາ​ຊະ​ຍາ​ກໍາ​ແຫ່ງ​ສະຫະ​ປະຊາ​ຊາດ (UNODC) ​ໄດ້ຖະແຫລງ ​ຜົນການສໍາຫລວດ ກ່ຽວກັບ​ການ​ລັກລອບ​ປູກ​ຝິ່ນໃນເອເຊຍຕາເວັນອອກສຽງໃຕ້ ປະຈໍາປີ 2010 ວ່າ​ມຽນມາ ​ແລະ​ ຍັງຄົງເປັນປະເທດ ທີ່ມີການລັກລອບປູກຝິ່ນຫລາຍທີ່ສຸດ ຫາກແຕ່ວ່າ ລາວກໍນັບເປັນປະເທດທີ່ມີການລັກລອບປູກຝິ່ນ​ເພີ້ມຈາກ 1,900 ​ເຮັກຕາ​ໃນ​ປີ 2009 ຂຶ້ນມາ​ເປັນ 3,000 ​ເຮັກຕາ​ໃນ​ປີ 2010 ນີ້ ຫລື​ຄິດ​ເປັນ​ອັດຕາ​ສະ​ເລ່ຍທີ່​ເພີ້ມຂຶ້ນເຖິງ 58%. ຍິ່ງ​ໄປ​ກວ່າ​ນັ້ນ ຖ້າ​ຫາ​ກປຽບທຽບ​ໃສ່​ກັບ​ປີ 2007 ທີ່​ມີ​ການ​ລັກລອບ​ປູກ​ຝິ່ນ​ໃນ​ລາວຄິດ​ເປັນ​ພື້ນທີ່​ລວມ 1,500 ​ເຮັກຕາ​ນັ້ນ ກໍ​ຈະ​ໄດ້​ເຫັນ​ວ່າ​ໃນ​ໄລຍະ 3 ປີ​ມານີ້ ການ​ລັກລອບ​ປູກ​ຝິ່ນ​ໃນ​ລາວ ​ໄດ້​ເພີ້ມຂຶ້ນ​ເຖິງ 100% ອີກດ້ວຍ ແລະໃນປີ 2011 ນີ້ກໍເຊື່ອວ່າ ພື້ນທີ່ປູກຝິ່ນໃນລາວກໍຍັງຈະເພີ້ມຂຶ້ນອີກ.

ທາງດ້ານທ່ານໄຊສົມພອນ ພົມວິຫານ ຮອງປະທານສະພາແຫ່ງຊາດລາວ ກໍໄດ້ສະເໜີວ່າ ລັດຖະບານລາວຄວນຈະດຳເນີນມາດຕະການກວດສອບ ແລະທົບທວນແຜນການລົບລ້າງການປູກຝິ່ນຄືນໄໝ່ ເພື່ອທີ່ວ່າຈະໄດ້ປະຕິບັດການແກ້ໄຂບັນຫາໄດ້ຢ່າງສອດຄ່ອງກັບສະພາບການທີ່ເປັນຈິງໃນປະຈຸບັນນີ້ ດັ່ງທີທ່ານໄດ້ຖະແລງເນັນຢໍ້າໃນຕອນໜຶ່ງວ່າ:

“ການຮັກສາຜົນປະໂຫຍດຂອງການຢຸດຕິການປູກຝິ່ນໃຫ້ໄດ້ຖາວອນນັ້ນ ກະໃຫ້ກວດຄືນເບິ່ງວ່າ ການສະຫລຸບຕີລາຄານັ້ນ ແມ່ນໄດ້ຕາມຄາດໝາຍທີ່ກອງປະຊຸມ ຂອງສະພາແຫ່ງຊາດ ໄດ້ຮັບຮອງເອົາແລ້ວຫລືບໍ່ ຫລືຍັງມີບັນຫາໃດຕື່ມ ທີ່ວ່າຍັງບໍ່ທັນຈະແຈ້ງ ຫຼືບໍ່ທັນແທດແໝາະກັບບັນຫາທີ່ເປັນຈິງ”

ທາງການລາວໄດ້ປະເມີນສະຖານະການວ່າ ໃນປະຈຸບັນນີ້ມີປະຊາຊົນແລະເຍົາວະຊົນລາວຫຼາຍກວ່າ 5 ໝື່ນຄົນທີ່ເສບຢາບ້າ. ສ່ວນໃນດ້ານຂອງການປາບປາມນັ້ນ ກໍປະກົດວ່າທາງການລາວສາມາດຢຶດຢາເສບຕິດໄດ້ເພີ້ມຂື້ນຢ່າງຫລວງຫຼາຍ. ໃນປີ 2010 ທາງການລາວຢຶດເຮໂຣອີນໄດ້ 84 ກິໂລກຣາມ ແລະຢຶດຢາບ້າໄດ້ເກືອບ 25 ລ້ານເມັດ ຫຼືເພີ້ມຂື້ນຈາກປີ 2008 ຄິດເປັນສັດສ່ວນເຖິງ 4 ເທົ່າແລະ 18 ເທົ່າຕາມລຳດັບ.