ພວກທີ່ເຫັນເຫດການ ທີ່ນະຄອນຫຼວງຂອງໂຊມາເລຍ ກ່າວວ່າ ມີຢ່າງນ້ອຍ 10 ຄົນ ຖືກສັງຫານ ແລະຫລາຍກວ່າ 15 ຄົນ ໄດ້ຮັບບາດເຈັບ ເວລາພວກຫົວຮຸນແຮງ ບຸກໂຈມຕີ ໂຮງແຮງໃຫຍ່ແຫ່ງນຶ່ງ ໃນວັນພຸດວານນີ້.
ສະມາຊິກສະພາໂຊມາເລຍ ທ່ານ Mohamed Ismail Shuriye ໄດ້ບອກກັບ VOA ວ່າ ສະມາຊິກສະພາ 2 ທ່ານຄືທ່ານ Abdullahi Jama Kaboweyne ແລະທ່ານ Mohamud Gure ໄດ້ຖືກສັງຫານໃນການໂຈມຕີຄັ້ງນີ້ ທ່ານຍັງໄດ້ກ່າວອີກວ່າ ຜູ້ທີ 3 ທ່ານ Abdullah Hashi ກໍໄດ້ຮັບບາດເຈັບ.
ສ່ວນສະມາຊິກສະພາຄົນນຶ່ງ ທີ່ຢູ່ໃນໂຮງແຮມ ໄດ້ອະທິບາຍເຖິງການໂຈມຕີຄັ້ງນີ້ ໂດຍກ່າວວ່າ “ໃນຂະນະທີ່ຂ້າພະເຈົ້າກຳລັງນອນຫຼັບໃນຫ້ອງນອນຂອງຂ້າພະເຈົ້າຢູ່ນີ້ ຂ້າພະເຈົ້າໄດ້ຕື່ນັຕົກໃຈ ຍ້ອນສຽງລະເບີດຂະໜາດແຮງ. ປະຕູປ່ອງ ຢ້ຽມແລະປະຕູໄດ້ຟົ້ງມາ ທັບຂ້າພະເຈົ້າ ຂ້າພະເຈົ້າໄດ້ແລ່ນໄປປະຕູດ້ານຫຼັງຂອງ ໂຮງແຮມ ແລະສາມາດລອດຊີວິດມາໄດ້.”
ທ່ານ Abdullya Dayib ໄດ້ບອກກັບ VOA ວ່າ ທ່ານໄດ້ ສົ່ງເພື່ອນຂອງທ່ານເຂົ້າໄປຮັກສາທີ່ໂຮງພະຍາບານ ບ່ອນທີ່ທ່ານໄດ້ເຫັນລົດພະຍາບານ ນຳສົ່ງທີ່ບາດເຈັບຫຼາຍສິບຄົນ ໄປຍັງໂຮງພະຍາບານ ເພື່ອທຳການຮັກສາປິ່ນປົວ.
ນັກຂ່າວອິດສະລະທີ່ເຮັດວຽກໃຫ້ກັບ VOA ລາຍງານວ່າ ໄດ້ເຫັນສົບຄົນຕາຍ 5 ສົບ ນອນຢູ່ຕໍ່ໜ້າໂຮງແຮມ.
ພວກເຄາະຮ້າຍສ່ວນໃຫຍ່ມີລາຍງານວ່າ ເສຍຊີວິດຍ້ອນລົດລະເບີດທີ່ໄດ້ແຕກຂຶ້ນໃນຂະນະທີ່ຜູ້ຄົນກຳລັງພາກັນສູດມົນພາວະນາໃນຕອນຄ່ຳ.
ການບຸກໂຈມຕີໂຮງແຮມ Ambassador ທີ່ນະຄອນ Mogadishu ມີຂຶ້ນບໍ່ເທົ່າໃດຊົ່ວໂມງ ຫຼັງຈາກທີ່ເຈົ້າໜ້າທີ່ໂຊມາເລຍ ໄດ້ກ່າວວ່າ ຜູ້ບັນຊາສູງສຸດຂອງກຸ່ມຫົວຮຸນແຮງ al-Shabab ໄດ້ຖືກຂ້າຕາຍ ໃນການປະຕິບັດງານທາງທະຫານ ເມື່ອແລງວັນພຸດວານນີ້.
ທ້າວ Mohamed Mohamud ທີ່ຮູ້ກັນດີ ໃນນາມ Dulyadeyn ໄດ້ຖືກກ່າວຫາວ່າ ເປັນຜູ້ວາງແຜນຄົນສຳຄັນ ໃນການໂຈມຕີ ເມື່ອເດືອນເມສາປີ 2015 ທີ່ມະຫາວິທະຍາໄລ Garissa ໃນປະເທດເຄັນຢາ ທີ່ເຮັດໃຫ້ມີ 148 ຄົນ ເສຍຊີວິດ ຊຶ່ງເກີືອບວ່າທັງໝົດແມ່ນພວກນັກສຶກສາ.
ກະລຸນາອ່ານຂ່າວນີ້ເພີ້ມຕື່ມເປັນພາສາອັງກິດ
