ຜູ້ອົບພະຍົບເຂົ້າ ສະຫະລັດ ໄດ້ສະແດງຄວາມກັງວົນ ກ່ຽວກັບ ອະນາຄົດຂອງຕົນເອງ ຖ້າຫາກອະດີດປະທານາທິບໍດີ ດໍໂນລ ທຣຳ ເປັນຝ່າຍຊະນະເລີດໃນການເລືອກຕັ້ງຕຳແໜ່ງຜູ້ນຳທຳນຽບຂາວໃນປີນີ້, ເນື່ອງຈາກຈຸດຢືນທີ່ແຂງແກ່ນທີ່ຄັດຄ້ານກົດໝາຍກວດຄົນເຂົ້າເມືອງ ເຊິ່ງເປີດທາງໃຫ້ມີຜູ້ອົບພະຍົບເຂົ້າປະເທດ.
ອົງການຂ່າວ ເອພີ ທີ່ເວົ້າກັບຜູ້ອົບພະຍົບຈຳນວນນຶ່ງລະບຸວ່າ ເມື່ອເວລາທີ່ທ່ານ ທຣຳ ດຳລົງຕຳແໜ່ງປະທານາທິບໍດີ ແລະ ດຳເນີນນະໂຍບາຍຕ້ານການອົບພະຍົບເຂົ້າເມືອງຢ່າງເຕັມທີ່ນັ້ນ ມີເດັກນ້ອຍທີ່ຖືກແຍກອອກຈາກພໍ່ແມ່ນຢູ່ຊາຍແດນ ສະຫະລັດ-ເມັກຊິໂກ ຈຳນວນຫຼາຍສິບພັນຄົນ ແລະ ເດັກນ້ອຍເຫຼົ່ານີ້ກໍຍັງອາໄສຢູ່ໃນ ສະຫະລັດ ຈົນເຖິງປັດຈຸບັນນີ້.
ການດຳເນີນການດັ່ງກ່າວຂອງທານ ທຣຳ ໄດ້ກໍ່ໃຫ້ເກີດສຽງຮຽກຮ້ອງຢ່າງຫຼວງ ຫຼາຍ ຈົນທ່ານ ທຣຳ ປະກາດໃຫ້ຢຸດແຜນວຽກນີ້ໃນປີ 2018 ກ່ອນທີ່ຜູ້ພິພາກສາຄົນນຶ່ງຈະສັ່ງໃຫ້ລັດຖະບານນຳເດັກນ້ອຍທີ່ຖືກແຍກຈາກພໍ່ແມ່ຂອງເຂົາເຈົ້າກັບໄປພົບກັນ ແຕ່ຍ້ອນການເກັບຂໍ້ມູນບໍ່ດີພໍ ການແກ້ໄຂບັນຫານີ້ໄກ້ກາຍເປັນເລື່ອງຍາກ ໃນຂະນະທີ່ພໍ່ແມ່ຫຼາຍຄົນໄດ້ຖືກສົ່ງຕົວອອກຈາກ ສະຫະລັດ ໄປແລ້ວ.
ຫຼາຍຄົນບໍ່ໄດ້ມີໂອກາດກັບໄປພົບໜ້າຄອບຄົວຈົນເຖິງທຸກມື້ນີ້ ແລະ ໄດ້ຮັບສະຖານະພາບຜູ້ອາໄສຢູ່ໃນ ສະຫະລັດ ຊົ່ວຄາວ ໃນຂະນະທີ່ຄວາມເປັນໄປໄດ້ທີ່ ທ່ານ ທຣຳ ຈະຄືນສູ່ທຳນຽບຂາວກໍນຳມາຊຶ່ງຄວາມຢ້ານກົວ ກ່ຽວກັບ ການຖືກສົ່ງຕົວອອກນອກປະເທດ ດັ່ງທີ່ຕົວແທນພັກຣີພັບບລີກັນຜູ້ທີ່ກ່າວວ່າ ຈະດຳເນີນການຕໍ່ຜູ້ອົບພະຍົບເຂົ້າປະເທດທີ່ຜິດກົດໝາຍ ຖ້າຫາກໄດ້ດຳລົງຕຳແໜ່ງປະທານາທິບໍດີອີກຄັ້ງ.
ອະດີດປະທານາທິບໍດີ ທຣຳ ສະໜັບສະໜູນນະໂຍບາຍກວດຄົນນເຂົ້າເມືອງທີ່ເຄັ່ງຄັດ ເປັນນຶ່ງໃນແຜນການຫາສຽງຂອງທ່ານໃນປີນີ້ ແລະ ຍັງກ່າວຫາລັດຖະບານປະທານາທິບໍດີ ໂຈ ໄບເດັນ ແລະ ຮອງປະທານາທິບໍດີ ຄາມາລາ ແຮຣິສ ວ່າປະສົບຄວາມລົ້ມແຫຼວໃນການຍົກລະດັບຄວາມປອດໄພຕາມເຂດຊາຍແດນພາກໃຕ້ຂອງປະເທດດ້ວຍ.
ພ້ອມກັນນີ້ ທ່ານນາງ ແຮຣິສ ກໍບໍ່ໄດ້ສະໜັບສະໜູນເລື່ອງກົດໝາຍກວດຄົນເຂົ້າເມືອງໃຫ້ເປັນປະເດັນການຫາສຽງຫຼັກຂອງທ່ານນາງ ແຕ່ຍົກເລື່ອງຈຸດຢືນອັນແຂງແກ່ນຂອງທ່ານ ທຣຳ ໃນເລື່ອງນີ້ມາໂຈມຕີແທນ.
ໃນໄລຍະທີ່ດຳລົງຕຳແໜ່ງປະທານາທິບໍດີນັ້ນ ລັດຖະບານທ່ານ ທຣຳ ໄດ້ດຳເນີນຄະດີອາຍາຕໍ່ຜູ້ອົບພະຍົບທີ່ເປັນຜູ້ໃຫຍ່ທີ່ເດີນທາງເຂົ້າ ສະຫະລັດ ໂດຍຜິດກົດໝາຍ ແລະ ທຳການແຍກຕົວພໍແມ່ ແລະ ເດັກນ້ອຍອອກຈາກກັນ ໂດຍສົ່ງຕົວພວກເດັກນ້ອຍໄປຢູ່ຕາມສູນເບິ່ງແຍງຕ່າງໆທົ່ວປະເທດ.
ອ່ານຂ່າວນີ້ເປັນພາສາອັງກິດ
ຟໍຣັມສະແດງຄວາມຄິດເຫັນ