ພວກມີສິດປ່ອນບັດ ຢູ່ໃນ 6 ລັດຂອງສະຫະລັດ ຈະພາກັນໄປປ່ອນບັດ ໃນວັນອັງຄານມື້ນີ້ ໃນການແຂ່ງຂັນເພື່ອເລືອກເອົາຜູ້ທີ່ຈະໄດ້ຖືກແຕ່ງຕັ້ງໃຫ້ເປັນຜູ້ສະໝັກປະທານາທິບໍດີຕາງໜ້າພັກເດໂມແຄຣັດ. ຈຸດເພັ່ງເລັງ ຈະເປັນລັດມິຊິແກັນ ທີ່ສຳຄັນຢູ່ພາກຕາເວັນຕົກຕອນກາງຂອງປະເທດບ່ອນທີ່ການຢັ່ງຫາງສຽງຕ່າງໆ ສະແດງໃຫ້ເຫັນວ່າ ອະດີດຮອງປະທານາທິບໍດີ ໂຈ ໄບເດັນ ກຳລັງນຳໜ້າ ສະມາຊິກສະພາສູງ ຈາກລັດເວີມອນ ທ່ານເບີນີ ແຊນເດີຣສ໌ ຢູ່.
ລັດມິຊິແກັນ ເປັນລາງວັນໃຫຍ່ທີ່ສຸດ ໃນການປ່ອນບັດລົງຄະແນນສຽງຂອງວັນອັງຄານມື້ນີ້ ໂດຍມີຜູ້ແທນຈຳນວນ 125 ທ່ານ ທີ່ເປັນເດີມພັນ.
ທ່ານແຊນເດີຣສ໌ ໄດ້ຊະນະການເລືອກຕັ້ງຂັ້ນຕົ້ນ ເມື່ອປີ 2016 ແຕ່ການຢັ່ງຫາງສຽງຫຼາຍຄັ້ງ ເມື່ອບໍ່ເທົ່າໃດວັນຜ່ານມານີ້ ສະແດງໃຫ້ເຫັນວ່າ ທ່ານແຊນເດີຣສ໌ ນຳຫລັງທ່ານໄບເດັນ ດ້ວຍຄະແນນສຽງຫຼາຍກວ່າສິບເປີເຊັນ.
ການເລືອກຕັ້ງຂັ້ນຕົ້ນ ແມ່ນຍັງຈະໄດ້ຈັດຂຶ້ນ ຢູ່ໃນລັດວໍຊິງຕັນ ມິສຊູຣີ ມິສສິສສິບປີ ໄອດາໂຮ ແລະດາໂຄຕາເໜືອ.
ການແຂ່ງຂັນດັ່ງກ່າວ ແມ່ນເປັນຄັ້ງທຳອິດ ນັບຕັ້ງແຕ່ ການປ່ອນບັດຂອງວັນອັງຄານພິເສດ ໃນສັບປະດາແລ້ວນີ້ ຢູ່ໃນລັດຕ່າງໆຈຸ້ມນຶ່ງ ແລະເມື່ອຂັ້ນຕອນການຄັດເລືອກນີ້ ໄດ້ຫັນປ່ຽນໄປຈາກການຈັດລົງຄະແນນສຽງ ໃນລັດນ້ອຍໆ ເທື່ອລະລັດ ມາເປັນການລົງຄະແນນສຽງ ໃນຫຼາຍລັດກະຈາຍໄປທົ່ວປະເທດ ພ້ອມກັນບາດດຽວ.
ທ່ານແຊນເດີຣສ໌ ໄດ້ຊະນະລັດຄາລີຟໍເນຍ ຊຶ່ງເປັນລັດທີ່ໃຫຍ່ທີ່ສຸດ ແຕ່ມັນ ກໍແມ່ນທ່ານໄບເດັນ ຜູ້ທີ່ໄດ້ປາກົດອອກມາເປັນຜູ້ນຳໜ້າໝູ່ ໂດຍໄດ້ຮັບໄຊຊະນະ 10 ລັດ ໃນຈຳນວນ 14 ລັດ ເມື່ອສັບປະດາແລ້ວນີ້.
ທ່ານໄບເດັນ ໄດ້ກ່າວຕໍ່ຝຸງຄົນໃນວັນຈັນວານນີ້ ຢູ່ໃນນະຄອນດີທຣອຍ ວ່າ “ພວກເຈົ້າຮູ້ດີ ພຽງອາທິດແລ້ວນີ້ ອົງການຂ່າວແລະພວກຊ່ຽວຊານທັງຫຼາຍ ໄດ້ປະກາດວ່າ ການໂຄສະນາຫາສຽງຂອງທ່ານຕາຍແລ້ວ. ຕໍ່ມາ ຊາວໂຄໂຣໄລນາໃຕ້ ໄດ້ປະກາດອອກມາແລ້ວ. ຕໍ່ມາ ວັນອັງຄານພິເສດ ກໍໄດ້ປະກາດອອກມາ ແລະການອອກມາໃຊ້ສິດອອກສຽງ ແມ່ນບໍ່ໜ້າເຊື່ອເລີຍ.” ທ່ານກ່າວຕື່ມວ່າ “ແລະດຽວນີ້ ໃນມື້ອື່ນ ລັດມິຊິແກັນ ມິສສິສສິບປີ ມິສຊູຣີ ດາໂຄຕາເໜືອ ໄອດາໂຮ ວໍຊິງຕັນ ພວກເຈົ້າກໍຈະໄດ້ຍິນສຽງປະກາດ. ແລະລັດມິຊິແກນ ຂ້າພະເຈົ້າ ກາງຕໍ່ພວກເຈົ້າຢ່າງໃຫຍ່ເດີ້.”
ທ່ານໄບເດັນ ໄດ້ກ້າວເຂົ້າສູ່ວັນອັງຄານມື້ນີ້ ໂດຍມີຄະແນນສຽງທີ່ໄດ້ຮັບຈາກຜູ້ແທນ 670 ທ່ານ ມາເຖິງຕອນນີ້ ນຳໜ້າທ່ານແຊນເດີຣສ໌ ຢູ່ ຜູ້ທີ່ໄດ້ຮັບຄະແນນສຽງຈາກຜູ້ແທນ 574 ທ່ານ ອີງຕາມການຄາດຄະເນຂອງອົງການຂ່າວເອພີ.
ທ່ານແຊນເດີຣສ໌ ກ່າວວ່າ ການໂຄສະນາຫາສຽງໃນດ້ານຄວາມກ້າວໜ້າຂອງທ່ານນັ້ນ ເປັນສິ່ງທີ່ປະເທດຕ້ອງການຫຼາຍກວ່າ ທ່າທີຄວາມເປັນກາງຂອງທ່ານໄບເດັນ ແລະວ່າ ທ່ານເປັນຄູ່ທ້າຊີງທີ່ດີທີ່ສຸດ ສຳລັບທ່ານທຣຳ ໃນການເລືອກຕັ້ງແຫ່ງຊາດ ໃນເດືອນພະຈິກນີ້.
