ການດຳເນີນຄະດີຕໍ່ຊາວຣັດເຊຍແລະຢູເຄຣນກ່ຽວກັບການຍິງເຮືອບິນໂດຍສານຖ້ຽວບິນທີ 17 ຂອງສາຍການບິນມາເລເຊຍໃນເດືອນກໍລະກົດປີ 2014 ຕົກ ຢູ່ໃນເຂດພາກຕາເວັນອອກຂອງຢູເຄຣນ ທີ່ຄວບຄຸມໂດຍພວກແບ່ງແຍກດິນແດນ ນັ້ນ ໄດ້ເປີດຂຶ້ນຢູ່ໃນປະເທດເນເທີແລນ.
ຜູ້ຕ້ອງສົງໄສລວມມີ ຊາວຣັດເຊຍຄື ທ້າວອີກໍ ເກີກິນ (Igor Girkin), ເຊີເກ ດຸບບິນຊະກີ (Sergei Dubinsky) ແລະ ທ້າວໂອເລັກ ປູລາຕົຟ (Oleg Pulatov) ແລະທ້າວ ເລໂອນິດ ຄາເຈັນໂກ (Leonid Kharchenko) ຊຶ່ງ ເປັນຄົນຢູເຄຣນນັ້ນ ຖືກກ່າວຫາວ່າ ໄດ້ສັງຫານຄົນໂດຍສານພ້ອມກັບພະນັກງານຢູ່ໃນເຮືອບິນ 298 ຄົນ ທີ່ເສຍຊີວິດໄປໃນຖ້ຽວບິນທີ MH17 ທີ່ບິນຂຶ້ນຈາກນະຄອນອາມສະເຕີດາມ (Amsterdam) ມຸ້ງໜ້າໄປຫານະຄອນກົວລາລຳເປີ (Kuala Lumpur) ທີ່ຖືກຍິງຕົກໂດຍລູກສອນໄຟຕ້ານເຮືອບິນ ທີ່ຜະລິດໂດຍຣັດເຊຍ.
ທັງສີ່ຄົນນັ້ນ ຍັງຈັບບໍ່ທັນໄດ້ເທື່ອ ແລະກໍບໍ່ໄດ້ຢູ່ໃນສານທີ່ມີການຮັກສາຄວາມປອດໄພຢ່າງສູງ ຕັ້ງຢູ່ໃກ້ກັບສະໜາມບິນຊິບໂພລ (Schiphol) ບ່ອນທີ່ຖ້ຽວ ບິນໂຊກບໍ່ດີອັນນັ້ນໄດ້ບິນອອກໄປ ເຖິງແມ່ນວ່າ ຈະມີໝາຍຮຽກໃນລະດັບສາກົນ ໃຫ້ຈັບຕົວພວກກ່ຽວຢູ່ກໍຕາມ.
ພວກໄດ້ຮັບເຄາະຮ້າຍລວມມີ ຊາວເນເທີແລນ 193 ຄົນ ພ້ອມກັບຊາວມາເລເຊຍ 43 ຄົນ ແລະຊາວອອສເຕຣເລຍ 38 ຄົນ.
ພວກຕ້ອງສົງໄສທັງໝົດຕ່າງ ກໍໄດ້ຮັບຕຳແໜ່ງຂັ້ນສູງ ຢູ່ໃນການຈັດຕັ້ງຂອງກຸ່ມຕິດອາວຸດແບ່ງແຍກດິນແດນທີ່ໄດ້ຮັບການໜູນຫລັງຈາກຣັດເຊຍ ຊຶ່ງໄດ້ຕໍ່ສູ້ກັບກຳລັງທະຫານຂອງລັດຖະບານຢູເຄຣນຢູ່ໃນພາກຕາເວັນອອກຂອງຢູເຄຣນ ນັບຕັ້ງແຕ່ລະດູບານໃໝ່ປີ 2014 ເປັນຕົ້ນມານັ້ນ.
ທ້າວເກີກິນ (Girkin) ທີ່ຖືກເອີ້ນວ່າ ເປັນລັດຖະມົນຕີກະຊວງປ້ອງກັນປະເທດຂອງກຸ່ມແບ່ງແຍກດິນແດນທີ່ໄດ້ຮັບການໜູນຫລັງຈາກຣັດເຊຍ ທີ່ຕັ້ງຊື່ໃຫ້ຕົນເອງວ່າ ເປັນສາທາລະນະລັດປະຊາຊົນໂດເນສຄ໌ (Donetsk) ນັ້ນ. ສ່ວນຜູ້ຕ້ອງສົງໄສຄົນອື່ນໆ ແມ່ນເປັນສະມາຊິກຂອງໜ່ວນສືບລັບສັງກັດຢູ່ໃນກອງທັບ ຂອງກຸ່ມທີ່ຕັ້ງຂຶ້ນມານັ້ນ.
ເຖິງແມ່ນຈະມີຫລັກຖານສະແດງໃຫ້ເຫັນວ່າ ກອງທັບຣັດເຊຍມີສ່ວນຮ່ວມໂດຍກົງກັບການຍິງຖ້ຽວບິນ MH17 ນັ້ນໃຫ້ຕົກລົງ ໂດຍລູກສອນໄຟທີ່ຍິງອອກຈາກເຂດທີ່ຄວບຄຸມໂດຍພວກແບ່ງແຍກດິນແດນຢູ່ໃນພາກຕາເວັນອອກຂອງຢູເຄຣນກໍຕາມ ວັງເຄຣັມລິນ ກໍຍັງໄດ້ປະຕິເສດຊ້ຳແລ້ວຊ້ຳອີກ ວ່າບໍ່ໄດ້ມີສ່ວນພົວພັນກັບເລື້ອງນີ້ເລີຍ.
ເບິ່ງວີດິໂອກ່ຽວກັບຂ່າວນີ້ເພີ້ມ
