ລິ້ງ ສຳຫລັບເຂົ້າຫາ

logo-print

ປະທານາທິບໍດີ ເມັກຊິໂກ ກ່າວວ່າ ທ່ານໄດ້ກວດ ມີຜົນບວກ ສຳລັບເຊື້ອໄວຣັສໂຄວິດ


ປະທານາທິບໍດີ ເມັກຊິໂກ ທ່ານ ອານເດຣສ ແມນູແອລ ໂລເປັສ ໂອບຣາດໍ ກ່າວໃນກອງປະຊຸມຖະແຫລງຂ່າວປະຈຳວັນ ຢູ່ທີ່ທຳນຽບປະທານາທິບໍດີ, ໃນນະຄອນຫຼວງ ເມັກຊິໂກ ຊີຕີ, ວັນທີ 18 ທັນວາ 2020.

ປະທານາທິບໍດີເມັກຊິໂກ ທ່ານອານເດຣສ ແມນູແອລ ໂລເປັສ ໂອບຣາດໍ ໄດ້ກ່າວໃນວັນອາທິດວານນີ້ ວ່າ ທ່ານໄດ້ກວດມີຜົນເປັນບວກສຳລັບເຊື້ອໄວຣັສໂຄວິດ-19 ແລະວ່າອາການຕ່າງໆແມ່ນບໍ່ຮ້າຍແຮງ ອີງຕາມລາຍງານຂອງອົງການຂ່າວເອພີ.

ປະທານາທິບໍດີຂອງເມັກຊິໂກ ຜູ້ທີ່ໄດ້ຖືກຕ້ອງຕິ ສຳລັບການຮັບມືກັບໂຣກ ລະບາດດັ່ງກ່າວໃນປະເທດຂອງທ່ານນັ້ນ ໄດ້ກ່າວຢູ່ໃນບັນຊີທວິດເຕີ້ ທີ່ເປັນທາງການຂອງທ່ານ ວ່າ ທ່ານຢູ່ພາຍໃຕ້ການຮັກສາປິ່ນປົວທາງການແພດ.

ທ່ານຂຽນລົງໃນທວິດເຕີ້ວ່າ “ຂ້າພະເຈົ້າເສຍໃຈທີ່ແຈ້ງໃຫ້ທ່ານຊາບວ່າ ຂ້າພະ ເຈົ້າໄດ້ຕິດເຊື້ອໂຄວິດ-19 ແລະອາການຕ່າງໆແມ່ນບໍ່ຮ້າຍແຮງ ແຕ່ຂ້າພະເຈົ້າຢູ່ພາຍໃຕ້ການຮັກສາປິ່ນປົວທາງການແພດແລ້ວ. ຂ້າພະເຈົ້າມີຄວາມຫວັງໃນແງ່ດີ ຢູ່ສະເໝີ. ພວກເຮົາທັງໝົດຈະກ້າວໄປໜ້ານຳກັນ.”

ທ່ານໂລເປັສ ໂອບຣາດໍ ອາຍຸ 67 ປີ ໄດ້ເປັນຜູ້ທີ່ຖືກຕຳໜິມາຍາວນານ ສຳລັບການບໍ່ເປັນແບບຢ່າງຂອງການປ້ອງກັນທີ່ດີໃຫ້ແກ່ມະຫາຊົນ. ທ່ານບໍ່ຄ່ອຍເຫັນໃສ່ໜ້າກາກເລີຍ ແລະສືບຕໍ່ຮັກສາຕາຕະລາງການເດີນທາງ ທາງອາກາດຢູ່ເລື້ອຍໆ.

ທ່ານໄດ້ຄັດຂືນທີ່ຈະປິດເສດຖະກິດຂອງປະເທດ ໂດຍໃຫ້ຂໍ້ສັງເກດເຖິງຜົນກະ ທົບຮ້າຍແຮງທີ່ມັນອາດເກີດຂຶ້ນຕໍ່ຊາວເມັກຊິກັນຫຼາຍໆຄົນຜູ້ທີ່ດຳລົງຊີວິດມື້ຕໍ່ມື້.

ເມື່ອຕອນຕົ້ນໆຂອງໂຣກລະບາດ ທ່ານໄດ້ຖືກຖາມວ່າ ທ່ານຈະປົກປ້ອງຊາວເມັກຊິໂກແນວໃດ ທ່ານໂລເປັສ ໂອບຣາດໍ ໄດ້ນຳເອົາຂອງມົງຄົນສອງອັນອອກມາຈາກກະເປົາຂອງທ່ານ ແລະໄດ້ສະແດງໃຫ້ພວກເຂົາເຈົ້າເບິ່ງຢ່າງພາກ ພູມໃຈ.

ທ່ານໂລເປັສ ໂອບຣາດໍ ໄດ້ກ່າວວ່າ “ເຄື່ອງປົກປ້ອງທີ່ຄຸ້ມກັນ ແມ່ນ ‘ໃຫ້ເຈົ້າຢູ່ດ້ານຫຼັງຂ້ອຍ, ພະຍາຍົມ” ຊຶ່ງທ່ານອ່ານຄຳທີ່ຂຽນລົງໃນຂອງມົງຄົນນັ້ນວ່າ “ຢຸດ ສັດຕູ ເພື່ອຫົວໃຈຂອງພະເຍຊູ ແມ່ນຢູ່ກັບຂ້ອຍ.”

ການປະກາດຂອງທ່ານໂລເປັສນັ້ນ ໄດ້ມີຂຶ້ນບໍ່ດົນ ຫຼັງຈາກທີ່ລາຍງານຂ່າວໄດ້ອອກມາວ່າ ທ່ານຈະໂອ້ລົມກັບປະທານາທິບໍດີຣັດເຊຍ ທ່ານວລາດີເມຍ ປູຕິນ ໃນວັນຈັນມື້ນີ້ ກ່ຽວກັບການຮັບຢາວັກຊີນກັນໂຄວິດ-19 Sputnik V ຂອງຣັດເຊຍຈຳນວນຫຼາຍໂດສ.

ລັດຖະມົນຕີກະຊວງການຕ່າງປະເທດຂອງເມັກຊິໂກ ທ່ານມາຣແຊໂລ ອີບຣາດ ໄດ້ກ່າວຜ່ານທາງທວິດເຕີ້ວ່າ ຜູ້ນຳທັງສອງ ຈະໂອ້ລົມກັນກ່ຽວກັບ ສາຍສຳພັນສອງຝ່າຍ ແລະການສະໜອງຢາວັກຊີນຈຳນວນນຶ່ງໃຫ້ແກ່ເມັກຊິໂກ.

ອ່ານຂ່າວນີ້ຕື່ມ ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG