ໂຮງໝໍ ເມັກຊິໂກ ກວດ 6 ຄົນ ທີ່ສົງໄສ ຖືກ ກຳມັນຕະພາບ ລັງສີ (ວີດີໂອ)

ເຈົ້າໜ້າທີ່ເມັກຊິໂກ ກ່າວວ່າ ພວກຜູ້ຊາຍ 6 ຄົນ ທີ່ສົງໄສວ່າໄດ້
ລັກຂະໂມຍເອົາວັດຖຸທີ່ມີກຳມັນຕະພາບລັງສີໄປນັ້ນ ໄດ້ຖືກເຈົ້າ
ໜ້າທີ່ຄວບຄຸມໂຕໄວ້ແລ້ວແລະພວມຖືກກວດໃນຄວາມເປັນໄປ ໄດ້ທີ່ພວກກ່ຽວອາດໄດ້ແຕະຕ້ອງ ຫລືຖືກເຜີຍແບໃສ່ ກຳມັນຕະ ພາບລັງສີທີ່ໂຮງໝໍແຫ່ງນຶ່ງນັ້ນ.

ທ່ານ Pedro Luis Noble ຫົວໜ້າພະແນກ ສາທາລະນະສຸກ
ຂອງລັດ Hidalgo ກ່າວວ່າ ພວກຜູ້ຊາຍຈຸນີ້ ບາງຄົນຮູ້ສຶກຢາກ
ຮາກແລະວິນວຽນຫົວ ຊຶ່ງອາດເປັນຮ່ອງຮອຍຂອງອາການເບື່ອ
ເມົາ ກຳມັນຕະພາບລັງສີ. ເຈົ້າໜ້າທີ່ກ່າວວ່າ ຕຳຫຼວດໄດ້ຍາມ
ຈັບຕາເບິ່ງ ຜູ້ຕ້ອງສົງໄສເຫຼົ່ານີ້ ຢູ່ທີ່ໂຮງໝໍ Hidalgo.

ຂ່າວການຈັບກຸມໃນວັນສຸກວານນີ້ມີຂຶ້ນບໍ່ເທົ່າໃດຊົ່ວໂມງຫຼັງຈາກເຈົ້າໜ້າທີ່ເວົ້າວ່າຕົນໄດ້ ພົບເຫັນ ເສດທາດ cobalt-60 ທີ່ມີກຳມັນຕະພາບລັງສີສູງ ຊຶ່ງໄດ້ຖືກຂະໂມຍໄປ ທັງໝົດ ແລ້ວ ທີ່ຖືກນຳໄປປະຖິ້ມໄວ້ ຢູ່ໃນທົ່ງນາແຫ່ງນຶ່ງ ໃນເຂດພາກກາງຂອງເມັກຊິໂກ.

ລົດບັນທຸກທີ່ຂົນວັດຖຸຊຶ່ງມີກຳມັນຕະພາບລັງສີ ໄດ້ຖືກພົບເຫັນໃນມື້ວັນພຸດຜ່ານມາ ພ້ອມ ດ້ວຍທາດ cobalt-60 ທີ່ຖືກນຳອອກມາຈາກຫີບບັນຈຸແລ້ວນັ້ນ.

ວັດຖຸດັ່ງກ່າວ ໄດ້ຍົກຍ້າຍອອກຈາກອຸບປະກອນການບຳບັດປິ່ນປົວທີ່ໝົດສະໄໝໄປແລ້ວ ຢູ່ໂຮງໝໍແຫ່ງນຶ່ງໃນເມືອງ Tijuana ທາງພາກເໜືອຂອງປະເທດ ແລະພວມຖືກສົ່ງໄປຍັງ ສະຖານທີ່ເກັບມ້ຽນເສດນິວເຄລຍແຫ່ງນຶ່ງ ໃກ້ໆນະຄອນຫຼວງເມັກຊິໂກຊີ້ຕີ້.