ລັດຖະບານເມັກຊິໂກ ໄດ້ສົ່ງນັກຄ້າຢາເສບຕິດ ທ້າວ Joaquin “El Chapo” Guzman ຂ້າມແດນມາຍັງສະຫະລັດ ບ່ອນທີ່ລາວຈະປະເຊີນໜ້າກັບຂໍ້ຫາຄ້າຢາເສບຕິດ ຄາດຕະກຳ ແລະຂໍ້ກ່າວຫາອື່ນໆ.
ລາວໄດ້ມາເຖິງລັດ New York ໃນຕອນແລງວັນພະຫັດວານນີ້ ແລະຄາດວ່າຈະຖືກດຳເນີນຄະດີຢູ່ທີ່ນັ້ນ ໃນວັນສຸກມື້ນີ້. New York ແມ່ນນຶ່ງໃນຫລາຍໆ ເຂດຂອງສະຫະລັດ ທີ່ທ້າວ Guzman ຈະປະເຊີນໜ້າກັບການກ່າວຫາຕ່າງໆ.
ບັນດາເຈົ້າໜ້າທີ່ເມັກຊິໂກໄດ້ປະກາດກ່ຽວກັບການສົ່ງຜູ້ຮ້າຍຂ້າມແດນ ເວລາທ້າວ Guzman ໄດ້ຂຶ້ນເຮືອບິນໄປແລ້ວໃນວັນພະຫັດວານນີ້ ເຖິງແມ່ນວ່າເຂົາເຈົ້າບໍ່ໄດ້ເປີດເຜີຍເຖິງຈຸດໝາຍປາຍທາງຂອງລາວ.
ຫົວໜ້າກຸ່ມຄ້າຢາເສບຕິດຂະໜາດໃຫຍ່ Sinoloa ທີ່ຖືກຕັດສິນລົງໂທດ ໄດ້ໃຊ້ເວລາໃນປີທີ່ຜ່ານມານີ້ ຕໍ່ສູ້ບໍ່ໃຫ້ສົ່ງຜູ້ກ່ຽວມາຍັງສະຫະລັດ. ຫວ່າງມໍ່ໆມານີ້ລາວໄດ້ຖືກກັກຂັງໄວ້ ທີ່ຄຸກເມືອງ Juarez ໃກ້ກັບຊາຍແດນທາງພາກເໜືອຂອງເມັກຊິໂກ. ລາວໄດ້ຖືກຈັບຄືນອີກເມື່ອປີກ່ອນ ຫລັງຈາກໄດ້ແຫກຄຸກເປັນເທື່ອທີສອງ.
ທ້າວ Guzman ໄດ້ຫລົບໜີຈາກຄຸກ Altiplano ໃນເດືອນກໍລະກົດ ປີ 2015 ໃນອັນທີ່ເບິ່ງກັນຢ່າງກວ້າງຂວາງວ່າເປັນການອັບອາຍຂາຍໜ້າຢ່າງໃຫຍ່ໃຫ້ແກ່ລັດຖະບານທ່ານ Enrique Pena Nieto. ລາວໄດ້ຮັບອິດສະລະພາບ ໂດຍການຄານລອດຜ່່ານຮູໃຕ້ດິນ ຢູ່ກ້ອງຫ້ອງອາບນໍ້າໃນຄຸກຂອງລາວ ທີ່ຂຸດເປັນອຸໂມງຍາວ 1 ກິໂລແມັດເຄິ່ງ. ລາວໄດ້ຖືກຈັບຫົກເດືອນຕໍ່ມາ ໃນການປະຕິບັດງານຂອງທະຫານຢູ່ ໃນທີ່ເຮືອນຂອງລາວໃນລັດ Sinatoa.
ທ້າວ Guzman ໄດ້ຖືກຈັບເທື່ອທຳອິດໃນປີ 1993 ກ່ອນຫລົບໜີໄປດ້ວຍການຊ່ວຍເຫລືອຂອງພວກຍາມ ໃນປີ 2001 ຈາກຄຸກໃນເມືອງ Guadalajara. ລາວໄດ້ຖືກຈັບອີກ 13 ປີຕໍ່ມາ ໂດຍໄດ້ຮັບຂໍ້ມູນຈາກບັນດາອົງການສືບລັບ ສະຫະລັດ.
ໃນຕອນເຊົ້າວັນພະຫັດວານນີ້ ສານສູງສຸດເມັກຊິໂກໄດ້ປະຕິເສດ ໃນຄວາມພະ ຍາຍາມໂດຍບັນດາທະນາຍຄວາມຂອງທ້າວ Guzman ທີ່ຈະຂັດຂວາງຕໍ່ການສົ່ງໂຕລາວຂ້າມແດນ.
ອ່ານຂ່າວນີ້ເພີ້ມເປັນພາສາອັງກິດ
