ຜົນການນັບບັດຄະແນນສຽງຄືນໃໝ່ຢ່າງເປັນທາງການຢູເມັກຊິໂກ ໃຫ້ການຢືນຢັນກ່ຽວກັບ
ການໄດ້ຮັບໄຊຊະນະ ຂອງທ່ານ Enrique Pena Nieto ໃນການເລືອກຕັ້ງປະທານາທິບໍດີ
ແຕ່ຄູ່ແຂ່ງຂອງທ່ານຍັງປະຕິເສດບໍ່ຍອມຮັບເອົາການປາໄຊຍ້ອນມີການກ່າວຫາກ່ຽວກັບການ
ສໍ້ໂກງຄະແນນສຽງ.
ຈາກບັດຄະແນນສຽງທີ່ນັບໄປແລ້ວ 99% ໃນຕອນແລງຂອງວັນພະຫັດວານນີ້ ທ່ານ Pena
Nieto ຈາກພັກສະຖາບັນປະຕິວັດ ຫຼື PRI ມີຄະແນນສຽງນຳໜ້າ 7% ລື່ນທ່ານ ທ່ານ An-
dres Manual Lopez Obrador ຜູ້ສະມັກຂອງພັກນິຍົມຊ້າຍ.
ໂຕເລກດັ່ງກ່າວ ຊຶ່ງຮວມທັງການນັບບັດຄະແນນສຽງຄືນໃໝ່ເກືອບເຄິ່ງນຶ່ງຂອງຈຳນວນທັງ
ໝົດສ່ວນໃຫຍ່ແລ້ວແມ່ນບໍ່ໄດ້ມີການປ່ຽນແປງຫຍັງຫຼາຍ ຈາກຜົນການນັບຄະແນນສຽງຂັ້ນ
ຕົ້ນໃນການເລືອກຕັ້ງໃນມື້ວັນອາທິດຜ່ານມາ. ຖ້າຫາກໄດ້ຮັບການຢືນຢັນ ຜົນການນັບຄະ
ແນນສຽງດັ່ງກ່າວ ຈະເຮັດໃຫ້ພັກສະຖາບັນປະຕິວັດ ທີ່ໄດ້ປົກຄອງປະເທດເປັນເວລາ 7 ທົດ
ສະວັດມາຈົນຮອດປີ 2000 ນັ້ນ ກັບຄືນເຂົ້າກຳອຳນາດອີກ.
ແຕ່ທ່ານ Lopez Obrador ທີ່ຢາກໃຫ້ນັບບັດຄະແນນສຽງຄືນໃໝ່ທັງໝົດນັ້ນຍັງສືບຕໍ່ກ່າວ
ຫາພັກສະຖາບັນປະຕິວັດວ່າຊື້ສຽງແລະຂູ່ເຂັນບັງຄັບໃຫ້ປະຊາຊົນບ່ອນບັດເອົາ. ໃນວັນພະ
ຫັດວານນີ້ ທ່ານໄດ້ຈັດກອງປະຊຸມຖະແຫຼງຂ່າວຂຶ້ນຕໍ່ໜ້າກອງບັດຊື້ຂອງຂວັນທີ່ທ່ານເວົ້າວ່າ
ໄດ້ມີການແຈກຢາຍໃຫ້ແກ່ຜູ້ມີສິດປ່ອນບັດ ກ່ອນການປ່ອນບັດໃນວັນອາທິດແລ້ວ.