ລິ້ງ ສຳຫລັບເຂົ້າຫາ

ເຈົ້າໜ້າທີ່ ໃນເມັກຊິໂກ ກ່າວວ່າ ມີ 7 ຄົນເສຍຊີວິດ ໃນການຍິງຕໍ່ສູ້ກັນ ທີ່ເມືອງ CIUDAD JUAREZ ໃກ້ໆບໍລິເວນຊາຍແດນ ຕິດກັບສະຫະລັດ. ເຈົ້າໜ້າທີ່ສືບສວນ ກ່າວວ່າ ພວກເຄາະຮ້າຍ 5 ຄົນ ທີ່ເສຍຊີວິດ ໃນມື້ວານນີ້ ເປັນຕຳຫລວດ ຂອງລັດຖະບານກາງ ຄົນນຶ່ງ ເປັນຕຳຫລວດທ້ອງຖິ່ນ ແລະຜູ້ທີ 7 ນັ້ນ ເປັນພົນລະເຮືອນ. ເຈົ້າໜ້າທີ່ ເວົ້າວ່າ ການຍິງຕໍ່ສູ້ກັນ ໄດ້ເກີດຂຶ້ນ ໃນລະຫວ່າງ ການດັກສະກັດໂຈມຕີ ລົດຕຳຫລວດ 2 ຄັນ. ໃນຕົ້ນເດືອນນີ້ ໄດ້ມີການສົ່ງ ຕຳຫລວດຂອງ ລັດຖະບານກາງ ເມັກຊິໂກ ໄປຍັງເມືອງ JUAREZ ເພື່ອໄປຮັບໜ້າທີ່ ແທນທະຫານ ຊຶ່ງໄດ້ປະສົບ ກັບຄວາມລົ້ມແຫລວ ໃນການປາບປາມ ການຄ້າຢາເສບຕິດ ຢູ່ໃນເມືອງ ທີ່ມີການ ກໍ່ຄວາມຮຸນແຮງ ຮ້າຍແຮງສຸດ ໃນເມັກຊິໂກ. ເຈົ້າໜ້າທີ່ເວົ້າວ່າ ຕຳຫລວດ ຂອງລັດຖະບານກາງ 5 ພັນຄົນ ຈະເປັນຜູ້ ກຳກັບນຳ ເລື່ອງຄວາມປອດໄພ ທີ່ເມືອງ JUAREZ ຊຶ່ງຕັ້ງກົງກັນຂ້າມ ກັບເມືອງ EL PASO ໃນລັດເທັກຊັສ ຂອງສະຫະລັດນັ້ນ. ເຖິງແມ່ນ ໄດ້ມີທະຫານ ຈຳນວນຫຼາຍພັນຄົນ ພາກັນລາຕະເວນ ຢູ່ໃນເມືອງດັ່ງກ່າວ ໃນລະຍະສອງປີ ຜ່ານມານີ້ກໍຈິງ ແຕ່ການຄາຕກຳ ດ້ວຍຄວາມຮຸນແຮງ ຍັງດຳເນີນ ຢູ່ຕໍ່ມາ ເກືອບໃນທຸກໆມື້ ຊຶ່ງເຮັດໃຫ້ເມືອງ JUAREZ ກາຍເປັນເຂດແນວໜ້າ ໃນການນອງເລືອດ.

XS
SM
MD
LG