ລິ້ງ ສຳຫລັບເຂົ້າຫາ

ວັນພະຫັດ, ໒໓ ພຶດສະພາ ໒໐໒໔

ຊາວເມັກຊິໂກ ເດີນຂະບວນປະທ້ວງ ການຫາຍສາບສູນ ຂອງ ພວກນັກສຶກສາ


ພວກປະທ້ວງ ຮ້ອງໂຮ ໃນຂະນະທີ່ ພວກເຂົາເຈົ້າ ເດີນຂະບວນຄັ້ງໃຫຍ່ ໃນນະຄອນຫລວງ Mexico City ຂອງເມັກຊິໂກ ໃນວັນພະຫັດ ທີ 20 ພະຈິກ, 2014.
ພວກປະທ້ວງ ຮ້ອງໂຮ ໃນຂະນະທີ່ ພວກເຂົາເຈົ້າ ເດີນຂະບວນຄັ້ງໃຫຍ່ ໃນນະຄອນຫລວງ Mexico City ຂອງເມັກຊິໂກ ໃນວັນພະຫັດ ທີ 20 ພະຈິກ, 2014.

ພວກ​ປະ​ທ້ວງ​ໄດ້​ປະ​ທະ​ກັນ​ກັບເຈົ້າໜ້າ​ທີ່​ຕຳຫຼວດ ​ໃນ​ນະ​ຄອນ
​ຫຼວງ​ຂອງເມັກ​ຊິໂກ ທີ່ພາກັນເດີນຂະ​ບວນ​ຄັ້ງ​ໃຫຍ່ ປະທ້ວງ
ການ​ຮັບ​ມື​ ຂອງ​ປະທານາທິບໍດີ Enrique Pena Nieto ກ່ຽວ
ກັບການ​ຄາດ​ຕະກຳນັກ​ສຶກສາ​ວິທະຍາ​ໄລຈຳນວນ 43 ຄົນ​ນັ້ນ.

ການ​ປະທະກັນ ຢູ່​ນອກທຳນຽບແຫ່ງ​ຊາດ ໃນ​ນະຄອນຫຼວງ
Mexico City ​ໃນ​ວັນ​ພະຫັດ​ວານ​ນີ້ ​ໄດ້​ເຮັດ​ໃຫ້ການເດີນ​ຂະ​ບວນ
ປະ​ທ້ວງ ​ທີ່ ມີຫຼາຍພັນ​ຄົນ​ເຂົ້າຮ່ວມຢ່າງ​ສັນຕິ ນັ້ນ ​ເສຍ​ພາບ​ພົດ
​ໄປໝົດ.

ໃນ​ຕອນ​ເຊົ້າຂອງ​ວັນ​ພະຫັດວານນີ້ ພວກ​ປະ​ທ້ວງ​ທີ່​ປົກ​ປິດ​ໜ້າຈຳນວນ ​ນຶ່ງ ​ໄດ້ຕໍ່ສູ້​ກັບ​ເຈົ້າໜ້າ​ທີ່​ຕຳຫລວດ ​ໃກ້ໆສະໜາມ​ບິນ​ໃນ​ນະຄອນຫຼວງ Mexico City ​ໂດຍແກວ່ງລະເບີດນ້ຳມັນ ແລະ ໝາກ​ກະ​ໂພ​ກ​ເຂົ້າໃສ່ຕຳຫຼວດ.

ພວກ​ນັກ​ສຶກສາດັ່ງກ່າວ ໄດ້​ຫາຍ​ສາບ​ສູນ​ໄປ ​ໃນ​ວັນ​ທີ 26 ກັນຍາ ​ຢູ່​ທີ່​ເມືອງ Iguala. ບັນດາ​ເຈົ້າໜ້າ​ທີ່ ​ເຊື່ອ​ວ່າ ພວກ​ນັກ​ສຶກສາ​ເຫຼົ່ານັ້ນ ຖືກ​ຕຳຫລວດ​ໃນ​ທ້ອງ​ຖິ່ນ ຈັບ​ພວກ​ເຂົາ​ເຈົ້າ ​ແລະນຳໄປມອບ​ໃຫ້ພວກ​ ​ແກ້ງ​ຄ້າ​ຍາ​ເສບ​ຕິດ​ໃນ​ທ້ອງ​ຖິ່ນ ທີ່​ມີຊື່ວ່າ Guerreros Unidos.
ມີ​ການ​ກ່າວ​ຫາວ່າ ແກ້ງ​ດັ່ງກ່າວ ​ໄດ້​ຂ້າ​ພວກ​ນັກ​ສຶກສາ​ເຫຼົ່ານັ້ນ ແລະ ​ເຜົາ​ສົບ​ພວກ​ເຂົາ​ເຈົ້າ ​ແລ້ວ​ນຳ​ເອົາ​ຂີ້​ເຖົ່າ​ໄປ​ຖິ້ມລົງ​ໃນ​ແມ່ນ້ຳ​ແຫ່ງ​ນຶ່ງ.

ພໍ່​ແມ່​ຂອງ​ພວກ​ນັກ​ສຶກສາ ​ໄດ້​ປະຕິ​ເສດ ຕໍ່ການກ່າວ​ອ້າງທີ່ວ່າ ລູກ​ເຕົ້າຂອງ​ພວກ​ເຂົາ​ເຈົ້າ
ໄດ້ຖືກ​ຂ້າຕາຍແລ້ວ ​ແລະຮຽກຮ້ອງ​ລັດຖະບານ ຊອກ​ຫາ​ພວກ​ເຂົາ​ເຈົ້າ ​ທີ່​ເຊື່ອ​ວ່າ ​ຍັງ​ມີ​
ຊີວິດ​ຢູ່ນັ້ນ.

ຫຼາຍສິບ​ຄົນ ​ໄດ້​ຖືກ​ຈັບ​ກຸມ ຍ້ອນມີ​ສ່ວນ​ກ່ຽວຂ້ອງ​ກັບ​ການ​ລັກ​ພາ​ໂຕ​ພວກ​ນັກ​ສຶກສາ ທີ່ລວມທັງ ບັນດາສະມາຊິກຂອງ​ແກ້ງຄ້າ​ຢາ​ເສບ​ຕິດ Guerreros Unidos ​ແລະ ​ຕຳຫລວດ ອີກຫຼາຍກວ່າ 20 ຄົນ ​ແລະ ຜູ້​ປົກຄອງເມືອງ Iguala ທີ່​ຖືກ​ປົດ ພ້ອມ​ດ້ວຍ​ພັນ​ລະ​ຍາ ຂອງຜູ້ກ່ຽວ ກໍຖືກ​ຈັບ​ເຊັ່ນ​ກັນ.

ບັນດາ​ເຈົ້າໜ້າ​ທີ່ ກ່າວ​ວ່າ ຜູ້​ປົກຄອງ​ເມືອງດັ່ງກ່າວ ຄື ທ່ານ Jose Luis Abarca ​ໄດ້​ສັ່ງ​
ໃຫ້​ເຈົ້າໜ້າ​ທີ່ ​ໄປຈັບພວກ​ນັກ​ສຶກສາ​ຍ້ອນຢ້ານ ​ວ່າ​ພວກ​ເຂົາ​ເຈົ້າ ຈະ​ໄປ​ລົບ​ກວນ​ການ​
ຖະ​ແຫລ​ງການ ຂອງ​ພັນ​ລະ​ຍາທ່ານ ຜູ້​ທີ່​ເປັນ​ຫົວໜ້າ​ອົງການ​ປົກ​ປ້ອງ​ສິດທິເດັກ ​ໃນ
​ທ້ອງຖິ່ນນັ້ນ.

ການ​ຄາດຕະກຳ​ພວກ​ນັກ​ສຶກສາ ​ໄດ້​ສ້າງ​ຄວາມ​ໂກດ​ແຄ້ນຢ່າງ​ໜັກໃຫ້ ​ແກ່​ຊາວ​ເມັກ​ຊິໂກ
ຜູ້​ທີ່​ເບື່ອ​ໜ່າຍ ກັບ​ການ​ສໍ້​ລາດ​ບັງ​ຫລວງ ການ​ບໍ່ ຖືກລົງ​ໂທດ ​ແລະ ສົງຄາມ​ຄ້າ​ຢາ​ເສບ​ຕິດ ທີ່ໄດ້​ເຮັດ​ໃຫ້ຫຼາຍໝື່ນ​ຄົນ ​ເສຍ​ຊີວິດ ຫຼືຫາຍ​ສາບ​ສູນ​ໄປນັ້ນ.

MEXICO UNREST VO
please wait
Embed

No media source currently available

0:00 0:00:44 0:00

XS
SM
MD
LG