ປະທານາທະບໍດີ ເມັກຊິໂກ ທ່ານ Enrique Pena Nieto
ແລະ ບັນດາພັນທະມິດຂອງທ່ານ ຍັງຄົງມີສຽງສ່ວນຫຼາຍ
ພຽງເລັກນ້ອຍ ຢູ່ໃນສະພາຕ່ຳຂອງລັດຖະສະພາເມັກຊິໂກ
ໃນວັນຈັນມື້ນີ້ ຫຼັງຈາກທີ່ມີການເລືອກຕັ້ງກາງສະໄໝ.
ກ່ອນໜ້າການເລືອກຕັ້ງຂອງວັນອາທິດວານນີ້ ໄດ້ມີຮ່ອງຮອຍ
ຂອງຄວາມຮຸນແຮງ ຈາກພວກແກ່ງຄ້າຢາ ທີ່ຖືກກ່າວຫາຍ້ອນ
ການເສຍຊີວິດ ຂອງຜູ້ສະໝັກເລືອກຕັ້ງຫຼາຍທ່ານ.
ການເລືອກຕັ້ງກາງສະໄໝ ປົກກະຕິແລ້ວແມ່ນດຶງດູດເອົາຜູ້ຄົນ
ອອກມາປ່ອນບັດພຽງບໍ່ເທົ່າໃດຄົນ ແຕ່ຄວາມສົນໃຈແມ່ນສູງຜິດປົກກະຕິໃນຄັ້ງນີ້ ໃນຂະນະ ທີ່ແນວໂຮມຂອງ ພວກກຳມະບານນາຍຄູຫົວຮຸນແຮງ ແລະ ບັນດານັກເຄື່ອນໄຫວ ໄດ້ປະຕິຍານວ່າ ຈະກີດກັນການປ່ອນບັດດັ່ງກ່າວ. ຫີບປ່ອນບັດອອກສຽງຫຼາຍໜ່ວຍ ຖືກເຜົາຖິ້ມ ຫຼື ຖືກລັກເອົາໄປ ໃນວັນອາທິດວານນີ້ ຢູ່ທີ່ລັດ Chiapas Guerrero ແລະ Oaxaca ບ່ອນທີ່ງຽບສະຫງົບນັ້ນ.
ຄຳຮຽກຮ້ອງຕ່າງໆຂອງພວກນາຍຄູ ລວມທັງ ການຂຶ້ນເງິນເດືອນຈຳນວນຫຼາຍພໍສົມຄວນ ຍຸດຕິການສອບເສັງນາຍຄູ ແລະ ນຳເອົາ ພວກນັກສຶກສາ 42 ຄົນທີ່ຫາຍສາບສູນໄປ ຈາກວິທະຍາໄລຂອງນາຍຄູຫົວຮຸນແຮງ ກັບຄືນມາຢ່າງປອດໄພ. ພວກນັກສຶກສາເຫຼົ່ານັ້ນ ໄດ້ຫາຍໄປເມື່ອເດືອນກັນຍາປີກາຍນີ້ ແລະ ບັນດາໄອຍະການກ່າວວ່າ ພວກເຂົາເຈົ້າຖືກຂ້າຕາຍ ແລະ ຖືກເຜົາສົບ ໂດຍພວກແກ່ງຄ້າຢາ. ຊາກສົບຂອງນັກສຶກສາພຽງຄົນດຽວ ສາມາດລະບຸໂຕໄດ້ ດ້ວຍການກວດສອບ DNA.
