ຜູ້ພິພາກສາ ລັດຖະບານກາງເມັກຊິໂກຄົນນຶ່ງ ໄດ້ປະຕິເສດ ຕໍ່ການຂໍອຸທອນ ຂອງຣາຊາຄ້າຢາເສບຕິດ Joaquin “El Chapo” Guzman ໃນການສົ່ງໂຕຂອງລາວມາຍັງສະຫະ ລັດ.
ກະຊວງຕ່າງປະເທດເມັກຊິໂກໄດ້ອະນຸມັດຕໍ່ການຮ້ອງຂໍໃນໃນການສົ່ງຜູ້ຮ້າຍຂ້າມແດນດັ່ງກ່າວເມື່ອເດືອນພຶດສະພາແຕ່ບັນດາທະນາຍຄວາມຂອງທ້າວ Guzman ໄດ້ຕໍ່ສູ້ຂັດ ຂວາງການຕັດສິນທີ່ວ່ານີ້ ຢູ່ໃນສານປະຈຳເຂດ.
ນຶ່ງໃນຈຳນວນບັນດາທະນາຍຄວາມຂອງທ້າວ Guzman ທ່ານ Andres Granados ໄດ້ໃຫ້ຄຳໜັ້ນສັນຍາ ທີ່ຈະຂໍຮ້ອງໃຫ້ສານສູງສຸດເປີດຮັບຟັງການພິຈາລະນາ.
ທ່ານ Granados ກ່າວເພີ້ມອີກວ່າ “ພວກເຮົາຍັງບໍ່ໄດ້ປະລາໄຊເທື່ອ” ແລະກ່າວຕື່ມວ່າ ທ່ານຍັງສາມາດທີ່ຈະສົ່ງຄະດີນີ້ ໄປໃຫ້ຄະນະກຳມາທິການສິດທິມະນຸດ ຂອງບັນດາປະເທດໃນທະວີບອາເມຣິກາ.
ຫົວໜ້າກຸ່ມຄ້າຢາເສບຕິດ Sinaloa ໄດ້ຖືກຈັບໃນເດືອນມັງກອນທີ່ຜ່ານມາຫລັງຈາກໄດ້ຫລົບໜີເທື່ອທີສອງຈາກບ່ອນຄຸມຂັງທີ່ມີການຮັກສາຄວາມປອດໄພຢ່າງ ໜາແໜ້ນ. ປັດ ຈຸບັນນີ້ລາວຕິດຄຸກຢູ່ທີ່ລັດ Chihuahua ໃນບໍລິເວນຊາຍແດນ ທາງດ້ານເໜືອຂອງປະເທດ.
ເມັກຊິໂກໄດ້ກ່າວວ່າ ຕົນຈະສົ່ງທ້າວ Guzman ໃຫ້ສະຫະລັດໃນເດືອນກຸມພາຈະມາເຖິງນີ້.
ທ້າວ Guzman ກຳລັງປະເຊີນໜ້າກັບການທີ່ຈະຖືກສົ່ງໂຕໄປສອງບ່ອນ ບ່ອນນຶ່ງຢູ່ລັດ California ໃນຖານຈຳໜ່າຍຢາເສບຕິດຢູ່ທີ່ນັ້ນ ແລະອີກບ່ອນນຶ່ງຢູ່ລັັດ Texas ໃນຂໍ້ຫາຕ່າງໆ ທີ່ຮວມທັງຄາດຕະກຳ ແລະຟອກເງິນ.
ການສົ່ງໂຕຜູ້ຮ້າຍຂ້າມແດນດັ່ງກ່າວນີ້ຈະພາໃຫ້ມີການດຳເນີນຄະດີທີ່ສຳຄັນຢູ່ໃນສະຫະ ລັດ ຕໍ່ຫົວໜ້າຄ້າຢາເສບຕິດ ທີ່ຖືກກ່າວຫາວ່າ ສະໜອງຢາເສບຕິດຫລາຍໆໂຕນໃຫ້ແກ່ບັນດາຜູ້ຕິດຢາຢູ່ໃນສະຫະລັດ ໃນຂະນະທີ່ຜັກດັນໃຫ້ເກີດຄວາມຮຸນແຮງຢູ່ໃນເມັກຊິໂກ.
