ລາຊາຄ້າຢາເສບຕິດລາຍໃຫຍ່ ທີ່ມີຊື່ສຽງເໜົ່າເໝັນ ຄືນາຍ Joaquin “El Chapo” Guzman ໄດ້ໂຕນຄຸກທີ່ມີການຮັກສາຄວາມປອດໄພຢ່າງເຄັ່ງຄັດ ເປັນເທື່ອທີສອງໃນຮອບ 14 ປີຜ່ານມາ.
ທ່ານ Monte Alejandro Rubido ປະທານຄະນະກຳມະທິການຄວາມປອດໄພຂອງ ແມັກຊິໂກ ໄດ້ກ່າວ ໃນກອງປະຊຸມຖະແຫຼງ ຂ່າວ ເມື່ອວັນອາທິດວານນີ້ ວ່າ ນາຍ Guzman ຜູ້ເປັນຫົວໜ້ານຳພາແກັ່ງນັກຄ້າຢາເສບຕິດ Sinaloa ທີ່ມີອິດທິພົນ, ໄດ້ຖືກພົບເຫັນຄັ້ງສຸດທ້າຍ ຢູ່ໃນບໍລິເວນບ່ອນອາບນ້ຳຂອງຄຸກ Altiplano.
ທ່ານ Rubido ກ່າວວ່າ ນາຍ Guzma ໄດ້ຫຼົບໜີຜ່ານຂຸມສີ່ຫລ່ຽມ ທີ່ໄດ້ພົບເຫັນຢູ່ໃຕ້ພື້ນຂອງຫ້ອງນ້ຳດັ່ງກ່າວ. ທ່ານກ່າວອີກວ່າ ຂຸມດັ່ງກ່າວນັ້ນ ເຊື່ອມຕໍ່ກັບອຸໂມງ ຍາວ 1.5 ກິໂລແມັດ ທີ່ນຳໄປສູ່ເມືອງໃນທ້ອງຖິ່ນ.
ບັນດາເຈົ້າໜ້າທີ່ກ່າວວ່າ ນາຍ Guzman ໄດ້ລົງໄປໃນຂຸມເລີກ 10 ແມັດ ດ້ວຍຂັ້ນໄດ ທີ່ຕິດຕໍ່ໃສ່ກັບອຸໂມງ ທີ່ມີລະບົບທ່າຍເທອາກາດຄົບຖ້ວນ ແລະມີແສງສະຫວ່າງດີ. ບັນດາເຈົ້າໜ້າທີ່ ຍັງໄດ້ພົບເຫັນລົດຈັກດັດແປງໃຫ້ແລ່ນຢູ່ເທິງລາງຄູ່ ແລະ ເຄື່ອງມືຈຳນວນໜຶ່ງ ທີ່ພວກເຂົາເຈົ້າເຊື່ອວ່າ ຖືກນຳໃຊ້ໃນການຂົນເອົາດິນອອກໄປຈາກຂຸມ ໃນລະຫວ່າງການກໍ່ສ້າງອຸໂມງນັ້ນ.
ທ່ານ Rubido ກ່າວວ່າ ພະນັກງານປະຈຳຄຸກ 18 ຄົນ ຖືກຄຸມຕົວໄວ້ ເພື່ອສອບປາກຄຳ.
ກອງກຳລັງຮັກສາຄວາມປອດໄພ ໄດ້ຍົກເລີກຖ້ຽວບິນທັງໝົດ ຢູ່ທີ່ສະໜາມບິນ Toluca ຊຶ່ງຢູ່ໃກ້ກັບຄຸກດັ່ງກ່າວ ນອກນະຄອນຫຼວງ Mexico City.
ພວກແກັ່ງນັກຄ້າຢາເສບຕິດ Sinaloa ເປັນທີ່ຮູ້ຈັກກັນດີ ໃນການສ້າງອຸໂມງຢ່າງຮອບຄອບ ຢູ່ໃຕ້ດິນຕາມຊາຍແດນ ລະຫວ່າງ ເມັກຊິໂກ ແລະ ສະຫະລັດ ເພື່ອຂົນສົ່ງຢາໂຄເຄນ ຢາບ້າ ແລະ ກັ່ນຊາ ທີ່ມີລະບົບທ່າຍເທອາກາດ ພ້ອມດ້ວຍໄຟຟ້າ ແລະ ແມ່ນກະທັງ ລົດລາງຄູ່ ທີ່ສາມາດເຄື່ອນຍ້າຍສິ່ງຜິດກົດໝາຍໄດ້ຢ່າງງ່າຍດາຍ.
ການຫຼົບໜີ ຂອງນາຍ Guzma ແມ່ນເປັນຄວາມອັບອາຍຂາຍໜ້າ ໃຫ້ແກ່ລັດຖະບານ ຂອງປະທານາທິບໍດີ Enrique Pena Nieto ຊຶ່ງໄດ້ຮັບການຊົມເຊີຍສັນລະເສີນ ສຳຫລັບ ມາດຕະການແຂງຂັນຕໍ່ ພວກລາຊາຄ້າຢາເສບຕິດ ລະດັບສູງ. ນັບຕັ້ງແຕ່ ລັດຖະບານຂອງທ່ານ Pena Nieto ໄດ້ເລີ້ມທຳງານໃນທ້າຍປີ 2012 ເປັນຕົ້ນມາ ບັນດາເຈົ້າໜ້າທີ່ເມັກຊິໂກ ໄດ້ຈັບ ຫຼື ສັງຫານ ພວກລາຊາຄ້າຢາເສບຕິດ ຈຳນວນ 6 ຄົນ ລົວທັງ ນາຍ Guzma.
ທ່ານ Pena Nieto ຜູ້ທີ່ເດີນທາງໄປເຖິງຝຣັ່ງ ໃນວັນອາທິດວານນີ້ ກ່າວວ່າ ທ່ານຢາກໃຫ້ມີການສືບສວນສອບສວນ ເຂົ້າໃນການຫຼົບໜີ ຢ່າງຄົບຖ້ວນ. ທ່ານຍັງໄດ້ກ່າວອີກວ່າ ທ່ານມີຄວາມໝັ້ນໃຈ ກັບຄວາມສາມາດ ຂອງບັນດາເຈົ້າໜ້າທີ່ຮັກສາກົດໝາຍເມັກຊິໂກ ທີ່ຈະຈັບໂຕນາຍ Guzman ກັບຄືນມາໄດ້.
