ລິ້ງ ສຳຫລັບເຂົ້າຫາ

​ພົບ​ສົບ​ທີ່ຖືກ​ຕັດ​ເປັນ​ຊິ້ນ​ສ່ວນ​​ ຈໍານວນ 49 ຊຸດ​ ຍັດ​ໃສ່​ໃນ​ຖົງ​ ທີ່ເມັກ​ຊິ​ໂກ

  • ສິງ ບຸຣົມມະ​ວົງ

ຖົງໃສ່ສົບຄົນຕາຍ ທີ່ພົບເຫັນ ໃນເມັກຊິໂກ.

ທາງ​ການ​ເມັກ​ຊິ​ໂກ ​ໄດ້​ພົບ​ເຫັນ​ສົບ​ທີ່ຖືກ​ຕັດ​ເປັນ​ຊິ້ນ​ສ່ວນ​ຕ່າງໆ​ຈໍານວນ 49 ຊຸດ​
ຍັດ​ໄວ້ໃນ​ຖົງ​ຫຼາຍ​ຖົງ ຢູ່​ໃກ້ໆ​ກັບ​ເມືອງ Monterrey ໃນ​ພາກ​ເໜືອ​ຂອງ​ປະ​ເທດ​ ໃນ​ອັນ
​ທີ່​ພວກ​ເຈົ້າ​ໜ້າ​ທີ່​ເຊື່ອ​ວ່າ ​ເປັນຄັ້ງ​ຫຼ້າ​ສຸດໃນການກະທໍາຄວາມ​ຮຸນ​ແຮງ ໃນ​ສົງຄາມ​ຄ້າ
​ຢາ​ເສບ​ຕິດ​ຢ່າງ​ໂຫດ​ຫ້ຽມຂອງ​ປະ​ເທດ.

ຕໍາຫຼວດ​ກ່າວ​ວ່າ ພວກ​ເຂົາ​ເຈົ້າ​ໄດ້​ພົບ​ເຫັນ​ສົບ​ເຫຼົ່າ​ນີ້​ໃນ​ຕອນ​ເຊົ້າ​ວັນອາທິດ​ວານ​ນີ້​ຢູ່
​ເລາະ​ຕາມ​ແຄມ​ຖະໜົນຫຼວງ​ສາຍ​ນຶ່ງ ​ຢູ່ໃຕ້ຊາຍ​ແດນ​ຂອງ​ສະຫະລັດລົງ​ໄປ​.

ມາ​ຮອດ​ປັດຈຸບັນ​ນີ້ ຍັງ​ບໍ່​ທັນ​ມີ​ຜູ້​ໃດ​ອ້າງ​ເອົາ​ຄວາມ​ຮັບຜິດຊອບສໍາລັບ​ຄວາມ​ຮຸນ​ແຮງ​
ນີ້​ເທື່ອ ​ແຕ່​ມັນ​ໄດ້​ສະທ້ອນ​ເຖິງ​ກໍລະນີ​ອື່ນໆອິກທີ່​ເກີດ​ຂຶ້ນ​ຫວ່າງ​ໄວໆ​ຜ່ານ​ມາ​ນີ້ ທີ່
​ພວກ​ແກ໊ງຄ້າ​ຢາ​ເສບ​ຕິດ​ໄດ້ປະ ​ສົບ​ໄວ້​ໃນ​ ທີ່​ສາທາລະນະ​ແຫ່ງ​ຕ່າງໆ ​ເພື່ອ​ໃຫ້​ເປັນ
​ການ​ຕັກ​ເຕືອນຕໍ່​ພວກ​ຄູ່​ປໍ​ລະ​ປັກ​ຂອງ​ພວກ​ເຂົາ. ​ໃນ​ຫວ່າງ​ບໍ່​ເທົ່າ​ມື້ກ່ອນ​ໜ້າ​ນີ້ ທາງ​
ການ​ໄດ້​ພົບ​ເຫັນ​ສົບ​ທີ່​ຕັດ​ເປັນ​ຊິ້ນ​ສ່ວນ 18 ຊຸດ​ໃນ​ພາກ​ຕາ​ເວັນ​ຕົກ​ຂອງ​ເມັກ​ຊິ​ໂກ.

ແລະ​ໃນ​ພາກ​ເໜືອ​ຂອງ​ປະ​ເທດນັ້ນ ພວກ​ເຈົ້າໜ້າ​ທີ່​ໄດ້​ພົບ​ເຫັນ 23 ສົບ​ປະ​ຖິ້ມ​ໄວ້
ຫຼື​ບໍ​ກໍ​ແຂວນ​ໄວ້ ຢູ່​ໃນ​ເມືອງ Nuevo Laredo.

​ໃນ​ປີ 2006 ປະທານາທິບໍດີ Felipe Calderon ​ໄດ້​ອອກ​ຄໍາ​ສັ່ງໃຫ້​ກອງທັບ​ເມັກ​ຊິ​ໂກ
​ ທໍາ​ການ​ທັບ​ມ້າງພວກ​ກຸ່ມ​ຄ້າ​ຢາ​ເສບ​ຕິດທີ່​ຮຸນ​ແຮງ​ໃນ​ປະ​ເທດ. ນັບ​ແຕ່​ນັ້ນ​ມາບັນດາ
​ເຈົ້າ​ໜ້າ​ທີ່​ກະ​ປະມານ​ວ່າ ປະຊາຊົນ​ໃນ​ຈໍານວນ​ຫຼາຍ​ກວ່າ 50 ພັນ​ຄົນ​ໄດ້​ຖືກ​ສັງຫານ​
ໃນການ​ກໍ່​ຄວາມ​ຮຸນ​ແຮງ​ຂອງ​ແກ໊ງຄ້າ​ຢາ​ເສບ​ຕິດ ​ແລະ​ການ​ປະ​ທະກັນ​ກັບ​ພວກ​ກໍາລັງ
​ຮັກສາ​ຄວາມ​ປອດ​ໄພ.

XS
SM
MD
LG