ພວກກະບົດທີ່ນິຍົມຣັດເຊຍ ແລະກອງກຳລັງຂອງຢູເຄຣນ ຕ່າງກໍ
ບໍ່ຍອມທີ່ຈະຖອນອາວຸດຂອງຕົນ ອອກຈາກຫົວເມືອງຍຸດທະສາດ
ແຫ່ງນຶ່ງໃນພາກຕາເວັນອອກຂອງປະເທດ ບ່ອນທີ່ການສູ້ລົບກັນ
ຍັງດຳເນີນຢູ່ຕໍ່ມາ ເຖິງແມ່ນວ່າໄດ້ມີການຢຸດຍິງທີ່ໄກ່ເກ່ຍໂດຍ
ນາໆຊາດແລ້ວກໍຕາມ.
ເຖິງແມ່ນວ່າ ການຕົກລົງຢຸດຍິງ ທີ່ເລີ້ມມີຜົນບັງຄັບໃຊ້ໃນວັນ
ອາທິດແລ້ວນີ້ ໄດ້ຜ່ອນຄາຍຄວາມເຄັ່ງຕຶງລົງຢູ່ໃນເຂດອື່ນໆ
ກໍຕາມ ການສູ້ລົບກັນຍັງດຳເນີນຕໍ່ມາທີ່ເມືອງ Debaltseve
ທີ່ຄວບຄຸມໂດຍທະຫານລັດຖະບານ Kyiv ແຕ່ຫ້ອມລ້ອມໂດຍພວກຫົວແບ່ງແຍກດິນແດນ.
ຢູເຄຣນ ແລະ ພວກກະບົດ ຍັງສູ້ລົບກັນ ທີ່ ມ. Debaltseve
ພາຍໃຕ້ເງື່ອນໄຂຂອງການຢຸດຍິງນັ້ນ ທັງສອງຝ່າຍຈະຕ້ອງເລີ້ມຖອນອາວຸດໜັກ ອອກຈາກຫົວເມືອງດັ່ງກ່າວ ໃນວັນອັງຄານມື້ນີ້ ແຕ່ໃນຂະນະທີ່ເສັ້ນຕາຍໄດ້ຜ່ານພົ້ນໄປແລ້ວ ຕ່າງ ຝ່າຍກໍຍັງຢືນຢັດວ່າ ພວກເຂົ້າເຈົ້າຈະບໍ່ເປັນຜູ້ທຳອິດທີ່ຈະເອົາບາດກ້າວ ທີ່ວ່ານີ້.
ໂຄສົກຂອງກອງທັບຢູເຄຣນ ທ່ານ Anatoliy Stelmakh ໄດ້ສະແດງຄວາມເຫັນຂອງທ່ານ ຜ່ານທາງໂທລະພາບວ່າ “ເວລາໃດທີ່ພວກຫົວຮຸນແຮງເລີ້ມຢຸດຍິງແລ້ວ ກອງກຳລັງຂອງຢູເຄຣນ ຈຶ່ງຈະເລີ້ມຖອນອາວຸດໜັກຂອງຕົນ ອອກຈາກເຂດແນວໜ້າ.”
ໂຄສົກຂອງພວກກະບົດ ທ່ານ Denis Pushilin ໄດ້ບອກກັບອົງການຂ່າວ Reuters ວ່າ
ພວກຕົນມີສິດ ໃນດ້ານສິນທຳ ທີ່ຈະປົກປ້ອງເມືອງດັ່ງກ່າວ ທີ່ທ່ານເອີ້ນວ່າ “ດິນແດນ
ພາຍໃນຂອງປະເທດຊາດ.” ທ່ານຍັງໄດ້ກ່າວອີກວ່າ ພວກຕົນແມ່ນພ້ອມແລ້ວທີ່ຈະຖອນອອກ ແຕ່ “ຈະສືບຕໍ່ໂຕ້ຕອບ ຕໍ່ການຍິງໂຈມຕີໃດໆ.”
ການເຈລະຈາສັນຕິພາບແລະການຖອນອາວຸດ ຄາດວ່າ ຈະເປັນຈຸດເພັ່ງເລັງໃນການໂອ້ລົມສົນທະນາທາງໂທລະສັບ ໃນແລງວັນອັງຄານມື້ນີ້ ລະຫວ່າງ ຜູ້ຕາງໜ້າຂອງພວກກະບົດ
ຢູເຄຣນ ຣັດເຊຍ ແລະອົງການເພື່ອຄວາມປອດໄພແລະການຮ່ວມມືໃນຢູໂຣບ ຫຼື OSCE.
ອົງການ OSCE ແມ່ນໄດ້ຮັບໜ້າທີ່ເປັນຜູ້ສັງເກດການເບິ່ງການຢຸດຍິງ ແຕ່ວ່າ ມາຈົນເທົ່າເຖິງປະຈຸບັນນີ້ ແມ່ນໄດ້ຖືກຂັດຂວາງໂດຍພວກກະບົດ ບໍ່ໃຫ້ເຂົ້າເຖິງເມືອງ Debalt
-seve. ໃນວັນອັງຄານມື້ນີ້ ເຢຍຣະມັນ ກ່າວວ່າ ຕົນໄດ້ຕົກລົງ ກັບບັນດາຜູ້ນຳຂອງຢູເຄຣນ ແລະຣັດເຊຍ ທີ່ຈະອະນຸຍາດໃຫ້ຄະນະສັງເກດການເຂົ້າໄປເບິ່ງສະພາບຂອງຫົວເມືອງທີ່ຖືກປິດ ລ້ອມດັ່ງກ່າວນີ້.
ໂຄສົກກອງທັບຢູເຄຣນຄົນນຶ່ງ ກ່າວໃນວັນອັງຄານມື້ນີ້ວ່າ ມີທະຫານຢູເຄຣນຢ່າງໜ້ອຍ
5 ຄົນຖືກສັງຫານ ແລະ 9 ຄົນບາດເຈັບ ໃນການສູ້ລົບກັນຊຶ່ງສ່ວນໃຫຍ່ແລ້ວແມ່ນມີຂຶ້ນໃກ້ໆ ເມືອງ Debaltseve ໃນໄລຍະ 24 ຊົ່ວໂມງຜ່ານມາ.