ນາຍົກລັດຖະມົນຕີເຢຍຣະມັນ ທ່ານນາງ Angela Merkel
ກ່າວວ່າ ຍັງ “ບໍ່ສາມາດຈິນຕະນາການອອກມາໄດ້” ທີ່
ຣັດເຊຍ ຈະຮ່ວມໃນ ກອງປະຊຸມບັນດາປະເທດ ທີ່ຈະເລີນທາງ
ດ້ານອຸດສາຫະກຳຂອງໂລກ ຕາບໃດ ທີ່ຣັດເຊຍ ຍັງກ່ຽວພັນ
ໃນຂໍ້ຂັດແຍ້ງຢູ່ໃນຢູເຄຣນ.
ທ່ານນາງ Merkel ກ່າວຖະແຫລງຕໍ່ລັດຖະສະພາ ຢູ່ນະຄອນ
ຫຼວງ Berlin ໃນວັນພະຫັດມື້ນີ້ວ່າ ກອງປະຊຸມ ຂອງກຸ່ມ 7
ປະເທດ ທີ່ຈະເລີນດ້ານອຸດສາຫະກຳ ໃນເດືອນໜ້ານີ້ ຢູ່ທີ່ລັດ
Bavaria ຂອງເຢຍຣະມັນ ຈະບໍ່ຮວມທັງຣັດເຊຍ ທີ່ຖືກກ່າວຫາ
ວ່າ ໃຫ້ການໜຸນຫຼັງພວກແບ່ງແຍກດິນແດນນິຍົມຣັດເຊຍ ຕໍ່ສູ້
ກັບ ລັດຖະບານ Kyiv.
ທ່ານນາງ ໄດ້ໃຫ້ຂໍ້ສັງເກດ ວ່າ ຜ່ານມາຣັດເຊຍໄດ້ມີສ່ວນຮ່ວມ ໃນກອງປະຊຸມສຸດຍອດ
ບັນດາປະເທດ ທີ່ຈະເລີນດ້ານອຸດສາຫະກຳ ຢູ່ທີ່ ນະຄອນຫຼວງ Vilnius ຂອງລີທົວເນຍ
ໃນປີ 2013 ແຕ່ຕອນນັ້ນ ແມ່ນກ່ອນໜ້າການຍຶດເອົາແຫຼມ Crimea ເຂົ້າມາເປັນຂອງ
ມົສກູ ຊຶ່ງເປັນການລະເມີດ ຕໍ່ກົດໝາຍສາກົນນັ້ນ. ທ່ານນາງກ່າວວ່າ “ການກັບຄືນເຂົ້າ
ມາຮ່ວມກຸ່ມ G8” ແມ່ນເປັນໄປບໍ່ໄດ້ ຕາບໃດ ຣັດເຊຍຍັງບໍ່ມີຄວາມໝັ້ນໝາຍ ຕໍ່ຫຼັກການພື້ນຖານຕ່າງໆ ຂອງກົດໝາຍສາກົນ.
ທ່ານນາງ Merkel ຈະເດີນໄປ ນະຄອນຫຼວງ Riga ຂອງລັດເວຍ ໃນວັນພະຫັດມື້ນີ້ ເພື່ອເຂົ້າຮ່ວມກອງປະຊຸມ ບັນດາຜູ້ນຳສະຫະພາບຢູໂຣບ ແລະ ບັນດາປະເທດໃນເຂດຢູໂຣບຕາເວັນອອກ ເຊັ່ນ Armenia Azerbaijan Belarus Georgia Moldova ແລະ Ukraine. ປະທານາທິບໍດີຣັດເຊຍ ທ່ານ Vladimir Putin ຈະບໍ່ໄດ້ ໄປຮ່ວມກອງປະຊຸມດັ່ງກ່າວ.
