ຜູ້ຊາຍສາມຄົນໄດ້ປາກົດຕົວຢູ່ໃນສານຂອງນະຄອນຫຼວງ ລອນດອນ ໃນວັນຈັນວານນີ້ ຫຼັງຈາກໄດ້ຖືກກ່າວຫາວ່າ ໃຫ້ການຊ່ວຍເຫຼືອອົງການສືບລັບຂອງຮົງກົງ.
ທ້າວ ຊັງ ບິວ ເຢັງ (Chung Biu Yuen), ອາຍຸ 63 ປີ, ທ້າວ ປີເຕີ້ ຫວາຍ (Peter Wai), ອາຍຸ 38 ປີ, ແລະ ທ້າວ ແມັທທິວ ທຣິກເກັທ (Matthew Trickett), ອາຍຸ 37 ປີ, ໄດ້ຖືກປ່ອຍຕົວດ້ວຍການປະກັນຕົວຫລັງຈາກການໄຕ່ສວນໄລຍະສັ້ນໆ ຢູ່ທີ່ສານ Westminster Magistrates.
ຕຳຫຼວດກ່າວໃນວັນຈັນວານນີ້ວ່າ ຜູ້ຕ້ອງສົງໄສທັງໝົດ 3 ຄົນ ແມ່ນມາຈາກພາກຕາເວັນອອກສຽງໃຕ້ຂອງອັງກິດ ໄດ້ຖືກຈັບກຸມໃນຕົ້ນເດືອນນີ້ ແລະຖືກກ່າວຫາ ໃນຂໍ້ຫາ ແຊກແຊງຈາກຕ່າງປະເທດ ແລະ ຊ່ວຍເຫຼືອອົງການສືບລັບຕ່າງປະເທດ, ເຊິ່ງເປັນການລະເມີດກົດໝາຍວ່າດ້ວຍຄວາມໝັ້ນຄົງແຫ່ງຊາດຂອງອັງກິດ.
ກົດໝາຍວ່າດ້ວຍຄວາມໝັ້ນຄົງ ທີ່ໄດ້ຮັບຜ່ານໃນປີກາຍນີ້ ໄດ້ອະນຸຍາດໃຫ້ຕໍາຫຼວດກັກຕົວຜູ້ຕ້ອງສົງໄສໃນຄະດີ ຄວາມໝັ້ນຄົງແຫ່ງຊາດ ແລະການສອດແນມ ໄດ້ ໂດຍບໍ່ຕ້ອງມີໝາຍຈັບ. ລັດຖະບານອັງກິດກ່າວວ່າ ການດຳເນີນການດັ່ງກ່າວ ປົກປ້ອງປະເທດຊາດຈາກ “ໄພຄຸກຄາມຂອງການເຄື່ອນໄຫວທີ່ບໍ່ເປັນມິດຈາກບັນດາລັດ ທີ່ແນເປົ້າໝາຍໃສ່ປະຊາທິປະໄຕ, ເສດຖະກິດ, ຄຸນນະທຳຂອງອັງກິດ.”
ທ້າວ ເຢັງ (Yuen), ທ້າວ ຫວາຍ (Wai) ແລະ ທ້າວ ທຣິກເກັທ (Trickett) ໄດ້ເຂົ້າຮ່ວມໃນ "ການເກັບກຳຮວບຮວມຂໍ້ມູນ, ການສອດແນມ ແລະການຫຼອກລວງ" ໃນລະຫວ່າງເດືອນທັນວາ ຫາເດືອນພຶດສະພາ, ໂດຍຊ່ວຍເຫຼືອອົງການສືບລັບຂອງຮົງກົງ, ອີງຕາມຂໍ້ກ່າວຫາ.
ຜູ້ຊາຍຄົນອື່ນໆອີກ 8 ຄົນ ຍັງຖືກຈັບກຸມໂດຍຕຳຫຼວດຕໍ່ຕ້ານການກໍ່ການຮ້າຍໃນເດືອນນີ້ ພາຍໃຕ້ກົດໝາຍດັ່ງກ່າວ, ແຕ່ພວກເຂົາເຈົ້າໄດ້ຖືກປ່ອຍຕົວໂດຍບໍ່ໄດ້ຖືກຕັ້ງຂໍ້ຫາໃດໆ.
ຟໍຣັມສະແດງຄວາມຄິດເຫັນ