ເຂື່ອນໄຊຍະບູລີມູນຄ່າ 3,500 ລ້ານໂດລາຢູ່ລາວແມ່ນນຶ່ງໃນຈຳນວນທັງໝົດ 11 ເຂື່ອນ ທີ່ຈະສ້າງໃສ່ເຂດລຸ່ມແມ່ນໍ້າຂອງຊຶ່ງໄຫຼຜ່ານປະເທດໄທ ກຳປູເຈຍແລະຫວຽດນາມນຳດ້ວຍ
ນັ້ນ.
ແຕ່ພວກພວກອະນຸລັກສະພາບແວດລ້ອມກ່າວວ່າ ເຂື່ອນໄຊຍະບູລີ ທີ່ສາມາດຜະລິດໄຟ
ຟ້າໄດ້ 1,280 ເມກາວັດນັ້ນ ຈະສົ່ງຜົນກະທົບ ໃນຂອບເຂດທີ່ກວ້າງໄກ ໂດຍສະເພາະ
ແມ່ນຢູ່ໃນເຂດຕ່າງໆ ເຊັ່ນເຂດສາມຫຼ່ຽມປາກແມ່ນໍ້າຂອງໃນຫວຽດນາມ ຊຶ່ງເປັນແຫຼ່ງປູກ ເຂົ້າທີ່ສຳຄັນສຸດຂອງປະເທດນັ້ນ.
ອົງການແມ່ນໍ້າສາກົນ ຊຶ່ງເປັນກຸ່ມປົກປ້ອງສະພາບແວດລ້ອມ ທີ່ມີສຳນັກງານຢູ່ສະຫະລັດ
ກ່າວວ່າ ມີ 22,580 ຄົນຈາກ 100 ກວ່າປະເທດໄດ້ລົງນາມໃນໜັງສືຮ້ອງຮຽນ ຮຽກຮ້ອງ ໃຫ້ຍົກເລີກໂຄງການສ້າງເຂື່ອນໄຊຍະບູລີຍ້ອນມີຄວາມວິຕົກກັງວົນເປັນທີ່ສຸດກ່ຽວກັບອະ
ນາຄົດຂອງເຂດອ່າງແມ່ນໍ້າຂອງຕອນລຸ່ມ.
ໜັງສືຮ້ອງຮຽນດັ່ງກ່າວນີ້ ໄດ້ມີການນຳສະເໜີພຽງນຶ່ງອາທິດ ກ່ອນທີ່ພວກລັດຖະມົນຕີ
ຂອງບັນດາປະເທດສະມາຊິກ ໃນຄະນະກຳມາທິການແມ່ນໍ້າຂອງສາກົນ ທີ່ປະກອບດ້ວຍ
ສປປ ລາວ ກຳປູເຈຍ ໄທແລະຫວຽດນາມນັ້ນ ມີກຳນົດທີ່ຈະປະຊຸມກັນ ເພື່ອທຳການຕັດ ສິນໃຈຂັ້ນສຸດທ້າຍກ່ຽວກັບໂຄງການດັ່ງກ່າວ.
ຜູ້ປະສານງານ ໃນການປຸກລະດົມຢູ່ໄທ ຂອງອົງການແມ່ນໍ້າສາກົນ ທ່ານນາງພຽນພອນ
ດີຖີກ່າວວ່າ ໜັງສືຮ້ອງຮຽນສະບັບນີ້ໄດ້ເນັ້ນໃຫ້ເຫັນເຖິງຄວາມວິຕົກກັງວົນກ່ຽວກັບຜົນ
ກະທົບຈາກເຂື່ອນດັ່ງກ່າວ.
ທ່ານນາງພຽນພອນກ່າວວ່າ “ພວກເຮົາຢາກໃຫ້ລັດຖະບານຂອງບັນດາປະເທດ
ໃນເຂດແມ່ນໍ້າຂອງ ໂດຍສະເພາະແລ້ວປະເທດທີ່ມີບົດບາດສຳຄັນ ກໍຄືລັດຖະ ບານໄທແລະລັດຖະບານລາວນັ້ນ ຮັບຊາບໄວ້ວ່າ ໂລກພວມຈັບຕາເບິ່ງຢູ່ ຄືມີ ຜູ້ຄົນເປັນຈຳນວນຫຼວງຫຼາຍ ທີ່ຢາກປົກປ້ອງຄຸ້ມຄອງແມ່ນໍ້າຂອງ ແລະວິຖີການ
ດຳລົງຊີວິດທໍາມາຫາກິນຂອງປະຊາຊົນຈຳນວນຫຼາຍໆລ້ານຄົນທີ່ກາງຕໍ່ອາໄສ
ແມ່ນໍ້າຂອງ ແລະຢາກໃຫ້ລັດຖະມົນຕີເຫຼົ່ານີ້ທຳການຕັດສິນໃຈທີ່ດີບໍ່ແມ່ນການ
ຕັດສິນໃຈທີ່ອີງໃສ່ການເມືອງ.”
ການສະເໜີສ້າງເຂື່ອນ 11 ແຫ່ງໃສ່ແມ່ນໍ້າຂອງແມ່ນໄດ້ມີຂຶ້ນເລີ່ມແຕ່ປີ 2006 ເປັນຕົ້ນມາ. ພາຍໃຕ້ການຕົກລົງກັນນັ້ນໄທຈະເປັນຜູ້ຊື້ກະແສໄຟຟ້າ 95% ທີ່ຜະລິດໂດຍເຂື່ອນໄຊຍະ
ບູລີຂອງລາວ.
ກະຊວງພະລັງງານຂອງໄທກ່າວວ່າ ຕົນບໍ່ໄດ້ພົບເຫັນຫຼັກຖານໃດໆທີ່ໃຫ້ການສະໜັບສະ
ໜຸນຕໍ່ການກ່າວອ້າງ ຂອງພວກອະນຸລັກສະພາບແວດລ້ອມ ກ່ຽວກັບຄວາມເສຍຫາຍໄລ
ຍະຍາວທີ່ຈະມີຕໍ່ແມ່ນໍ້າຂອງນັ້ນແຕ່ເຈົ້າໜ້າທີ່ຫວຽດນາມແລະກຳປູເຈຍໄດ້ໃຫ້ການສະໜັບ
ສະໜຸນພວກອະນຸລັກສະພາບແວດລ້ອມໂດຍເວົ້າວ່າ ມັນຈະສ້າງຄວາມເສຍຫາຍຢ່າງຮ້າຍ
ແຮງໃຫ້ແກ່ປານາໆພັນ.
ເມື່ອເດືອນເມສາຜ່ານມາ ບັນດາປະເທດໃນເຂດລຸ່ມແມ່ນໍ້າຂອງໄດ້ຕົກລົງກັນທີ່ຈະໂຈະໂຄງ ການສ້າງເຂື່ອນໄຊຍະບູລີໄວ້ເພື່ອລໍຖ້າເບິ່ງການສຶກສາເພີ່ມຕື່ມ. ແຕ່ມີລາຍງານຂ່າງຫລາຍ
ກະແສເມື່ອໄວໆມານີ້ທີ່ເວົ້າວ່າມີການກໍ່ສ້າງທີ່ພວມດຳເນີນໄປຢູ່ໃນບໍລິເວນສ້າງເຂື່ອນໂດຍ
ພວກບໍລິສັດກໍ່ສ້າງຂອງໄທ.
ທ່ານ Carl Thayer ນັກວິຊາການທີ່ມະຫາວິທະຍາໄລ New South Wales ປະເທດ
ອັອສເຕຣເລຍກ່າວວ່າ ການຕັດສິນໃຈຂອງລັດຖະບານລາວ ທີ່ຈະກົດດັນຕໍ່ໄປເພື່ອໃຫ້ມີ
ການສ້າງເຂື່ອນດັ່ງກ່າວນີ້ ຈະກໍ່ໃຫ້ເກີດຄວາມເຄັ່ງຕຶງທາງດ້ານການທູດ.
ທ່ານ Thayer ເວົ້າວ່າ “ທັງຫວຽດນາມແລະກຳປູເຈຍ ເຖິງແມ່ນໄດ້ມີການປຶກສາ
ຫາລືກໍຈິງ ພວກເຂົາເຈົ້າກ່າວວ່າ ເຂົາເຈົ້າຂ້ອນຂ້າງມີຄວາມວິຕົກກັງວົນ ທັງ
ສອງປະເທດແມ່ນມີຄວາມດີໃຈທີ່ສຸດ ທີ່ໄດ້ມີການໂຈະໂຄງການສ້າງເຂື່ອນນີ້.
ສິ່ງທຳອິດ ທີ່ພວກເຮົາບໍ່ໄດ້ກ່າວເຖິງ ກໍຄືຈະມີການຖະແຫຼງການຢ່າງແຂງຂັນ
ທາງດ້ານການທູດຕໍ່ລາວແລະຂ້າພະເຈົ້າຄິດວ່າທ່ານອາດຈະໄດ້ເຫັນການໄປ ຢ້ຽມຢາມລາວໃນລະດັບສູງ ຂອງເຈົ້າໜ້າທີ່ຫວຽດນາມ ເພື່ອຂໍຄໍາຊີ້ແຈງ ຍ້ອນ
ວ່າ ເຂື່ອນດັ່ງກ່າວໄດ້ສ້າງຄວາມວິຕົກກັງວົນຢ່າງໃຫຍ່ໃຫ້ແກ່ຫວຽດນາມ.”
ທ່ານ Thayer ກ່າວວ່າ ນອກນັ້ນແລ້ວ ຫວຽດນາມຍັງຈະຫັນໄປຂໍຄວາມຊ່ວຍເຫລືອຈາກ
ບັນດາປະເທດທີ່ໃຫ້ຄວາມສະໜັບສະໜຸນທາງດ້ານການເງິນແກ່ຄະນະກຳມາທິການແມ່ນໍ້າ
ຂອງສາກົນຮວມທັງສະຫະລັດ ອັອສເຕຣເລຍແລະຍີ່ປຸ່ນເພື່ອໃຫ້ທຳຄວາມກົດດັນທາງດ້ານ
ການທູດຕໍ່ລັດຖະບານລາວແລະໄທ ເພື່ອໃຫ້ເລື່ອນໂຄງການສ້າງເຂື່ອນດັ່ງກ່າວນີ້ ອອກໄປ
ຕື່ມອີກ.
ພວກນັກວິເຄາະຮຽກຮ້ອງໃຫ້ໂຈະໂຄງການສ້າງເຂື່ອນເປັນເວລານຶ່ງທົດສະວັດເພື່ອຊັ່ງຊາ
ຕີລາຄາເພີ່ມຕື່ມ ກ່ຽວກັບຜົນກະທົບຕໍ່ລະບົບນິເວດແລະສະພາບແວດລ້ອມ ຈາກທັງໂຄງ
ການສ້າງເຂື່ອນໄຊຍະບູລີ ຕະຫຼອດທັງການສ້າງເຂື່ອນອື່ນໆໃນເຂດລຸ່ມແມ່ນໍ້າຂອງ.
ກອງປະຊຸມລະດັບລັດຖະມົນຕີຂອງຄະນະກຳມາທິການແມ່ນໍ້າຂອງສາກົນ ມີກຳນົດຈະໄຂ
ຂຶ້ນທີ່ນະຄອນສຽມຣຽບປະເທດກຳປູເຈຍເລີ່ມແຕ່ວັນທີ 7 ທັນວາ ເປັນຕົ້ນໄປ.