ໃນພາກເໜືອຂອງລາວ ລັດຖະບານມີແຜນການ ຈະສ້າງ
ເຂື່ອນໄຟຟ້າ ພະລັງນໍ້າຂະໜາດໃຫຍ່ທີ່ແຂວງໄຊຍະບູລີ
ຊຶ່ງຈະສາມາດຜະລິດກະແສໄຟຟ້າໄດ້ 1,260 ເມກາວັດ
ໃສ່ລຳແມ່ນໍ້າຂອງຕອນລຸ່ມ.
ເຂື່ອນດັ່ງກ່າວແມ່ນເຂື່ອນທຳອິດຂອງຈຳນວນທັງໝົດ 12
ເຂື່ອນທີ່ມີແຜນການຈະສ້າງໃສ່ລຳແມ່ນໍ້າຂອງ. ບັນດາລັດ
ຖະບານຂອງປະເທດຕ່າງໆໃນຂົງເຂດເອເຊຍຕາເວັນອອກ
ສຽງໃຕ້ທີ່ພົວພັນນຳການສ້າງເຂື່ອນເວົ້າວ່າເຂື່ອນເຫຼົ່ານີ້ຈະ
ເປັນແຫຼ່ງພະລັງງານທີ່ສະອາດ ສຳລັບຂົງເຂດພວມມີການ
ພັດທະນາຢ່າງວ່ອງໄວ ແລະຈະຊ່ອຍຫຼຸດຜ່ອນຄວາມທຸກ ຍາກ.
ໂຄງການເຂື່ອນໄຊຍະບູລີທີ່ມີມູນຄ່າ 3,500 ລ້ານໂດລາ
ນັ້ນຈະສ້າງຂຶ້ນດ້ວຍການຮ່ວມມືກັບໄທ ຊຶ່ງຈະເປັນຜູ້ຊື້
ໄຟຟ້າ ເກືອບທັງໝົດ ທີ່ເຂື່ອນດັ່ງກ່າວຈະຜະລິດອອກ.
ນີ້ເປັນໂຄງການອັນທຳອິດ ທີ່ຈຳເປັນຈະຕ້ອງໄດ້ຮັບການອະນຸມັດຈາກລັດຖະບານຂອງ 4
ປະເທດ ທີ່ຕັ້ງຢູ່ເລາະລຽບແຄມແມ່ນໍ້າຂອງຕອນລຸ່ມອັນມີ ສປປ ລາວ, ໄທ, ກຳປູເຈຍແລະ
ຫວຽດນາມ ພາຍໃຕ້ຂັ້ນຕອນຂອງການປຶກສາຫາລືທີ່ກຳກັບເບິ່ງນໍາໂດຍ ຄະນະກຳມາທິ
ການແມ່ນໍ້າຂອງ ຫລື MRC.
ບັນດາລັດຖະບານຂອງປະເທດເຫຼົ່ານີ້ອາດຈະນຳສະເໜີການຕັດສິນໃຈຂອງ ພວກເຂົາເຈົ້າ
ພາຍໃນເດືອນນີ້ກໍເປັນໄດ້.
ພາຍໃຕ້ຂໍ້ຕົກລົງສະບັບນື່ງ ທີ່ເຊັນກັນໃນປີ 1995 ນັ້ນ ປະເທດທັງ 4 ຈະຕ້ອງຮ່ວມມືກັນ ເພື່ອຄໍ້າປະກັນການພັດທະນາແບບຍືນຍົງຢູ່ຕາມລະບົບແມ່ນໍ້າຂອງ ທີມີຄວາມຍາວທັງໝົດ
4,900 ຫຼັກກິໂລແມັດນັ້ນ.
ບັນດາກຸ່ມປົກປ້ອງສະພາບແວດລ້ອມກ່າວວ່າ ຂັ້ນຕອນການປຶກສາຫາລືທີ່ວ່ານີ້ບໍ່ມີຄວາມ
ໂປ່ງໃສ ແລະແຜນການກໍ່ສ້າງເຂື່ອນຕ່າງໆນັ້ນບໍ່ໄດ້ມີການອະພິປາຍຂອງປະຊາຊົນຫຼືການ
ສຶກສາຄົ້ນຄວ້າໃນເຂດທ້ອງຖິ່ນຢ່າງພຽງພໍ.
ນາງ Ame Trandem ຈາກກຸ່ມປົກປ້ອງສະພາບແວດລ້ອມແມ່ນໍ້າສາກົນກ່າວວ່າ ລັດຖະ
ບານຂອງປະເທດຕ່າງໆ ຍັງບໍ່ທັນໄປຮອດຈຸດບ່ອນທີ່ພວກເຂົາເຈົ້າສາມາດທຳການຕັດສິນ
ໃຈແບບຮອບຮູ້ໄດເທື່ອ.
// ສຽງ //
ນາງ Trandem ກ່າວວ່າ “ດ້ວຍເຫດນີ້ ຈຶ່ງມີການສະເໜີແນະໃຫ້ເລື່ອນການຕັດ
ສິນໃຈອອກໄປອີກ 10 ປີ ແລະພວກເຮົາຮູ້ສຶກວ່າຂັ້ນຕອນໃນການປຶກສາຫາລື ກ່ຽວກັບໂຄງການສ້າງເຂື່ອນໄຊຍະບູລີ ໃນເວລານີ້ ຄວນຈະຢຸດຕິລົງ ເພື່ອອຳ
ນວຍ ໃຫ້ປະຊາຊົນເຂົ້າອົກເຂົ້າໃຈດີຂຶ້ນກ່ຽວກັບແມ່ນໍ້າຂອງ ໃນໄລຍະທີ່ມີການ
ເລື່ອນ ເວລາ 10 ປີນັ້ນ.”
ຄະນະກຳມາທິການແມ່ນໍ້າຂອງຫລື MRC ຊຶ່ງໄດ້ຮັບເງິນສະໜັບສະໜຸນຈາກປະເທດຕ່າງໆ
ຮວມທັງອອສເຕຣເລຍ ນິວຊີແລນ ສະຫະພາບຢູໂຣບແລະສະຫະລັດນັ້ນ ກໍໄດ້ແນະນຳໃຫ້
ເລື່ອນເວລາ ໃນການກໍ່ສ້າງເຂື່ອນໄຊຍະບູລີອອກໄປເຊ່ນກັນ ໂດຍທີ່ຄະນະກຳມາທິການດັ່ງ
ກ່າວເວົ້າວ່າ ມີຄວາມຈຳເປັນສຳລັບການດຳເນີນງານເພີ່ມຕື່ມ ເພີ່ອຊັ່ງຊາຕີລາຄາເບິ່ງຜົນກະ
ທົບຈາກການສ້າງ ເຂື່ອນທັງ 12 ແຫ່ງນັ້ນ.
ແຕ່ລັດຖະບານລາວກ່າວວ່າ ຕົນມອງບໍ່ເຫັນເຫດຜົນໃດໆທີ່ຈະຕ້ອງມີການຊັກຊ້າ ແລະເວົ້າ
ວ່າລັດຖະບານລາວໄດ້ດຳເນີນການຢ່າງຖືກຕ້ອງທຸກຢ່າງກ່ຽວກັບຂໍ້ບັງຄັບທາງດ້ານກົດໝາຍ
ສິ່ງແວດລ້ອມ ແລະດ້ານສັງຄົມ.
ທ່ານອະນົນ ສະນິດວົງ ນັກຊ່ຽວຊານກ່ຽວກັບເລື່ອງດິນຟ້າ
ອາກາດ ຂອງມະຫາວິທະຍາໄລຈຸລາລົງກອນທີ່ປະເທດໄທ
ກ່າວວ່າ ຍ້ອນວ່າເຂື່ອນຕ່າງໆຄວບຄຸມການໄຫຼຂອງແມ່ນໍ້າ
ເຂື່ອນເຫຼົ່ານີ້ຈື່ງອາດເປັນໄພອັນຕະລາຍ ຕໍ່ຊີວະນາໆພັນ ແລະເສດຖະກິດໄດ້.
// ສຽງ //
ທ່ານອະນົນເວົ້າວ່າ “ມັນເປັນທີ່ຈະແຈ້ງ ແລະກໍໄດ້ພິສູດ
ໃຫ້ເຫັນມາແລ້ວ. ປາໃນແມ່ນໍ້າຂອງນັ້ນແມ່ນເປັນທັງ ອາຫານການກິນແລະກໍເປັນທັງເສດຖະກິດນຳດ້ວຍ.
ປະມານນຶ່ງສ່ວນສາມຂອງເສດຖະກິດກຳປູເຈຍໃນ
ເວລານີ້ ແມ່ນອາໄສ ແລະ ກາງຕໍ່ນຳການສົ່ງປາເຫຼົ່ານີ້ອອກໄປຂາຍຢູ່ໃນຕ່າງ
ປະເທດ ໂດຍສະເພາະແລ້ວ ກໍແມ່ນໄທ.”
ພວກນັກອານຸລັກສະພາບແວດລ້ອມເຊ່ນນາງ Ame Trandem ຈາກອົງການແມ່ນໍ້າສາກົນ
ກ່າວວ່າ ປະຊາຊົນຈຳນວນຫຼາຍໆລ້ານຄົນຈະໄດ້ຮັບຜົນກະທົບຈາກການສ້າງເຂື່ອນໃສ່ແມ່ນໍ້າ
ຂອງ.
// ສຽງ //
ນາງ Trandem ກ່າວວ່າ “ເວລາພວກເຮົາມອງໄປເບິ່ງອະນາຄົດພຸ້ນ ຖ້າຫາກ ເຂື່ອນເຫຼົ່ານີ້ໄດ້ມີການສ້າງຂຶ້ນແທ້ ອະນາຄົດກໍຈະໜ້າເປັນຫ່ວງຫຼາຍ ຄືຜູ້ຄົນ ຈະທຸກຍາກຍ້ອນພວກເຂົາເຈົ້າຈະສູນເສຍແຫຼ່ງທີ່ມາຂອງລາຍໄດ້ອັນສຳຄັນ
ນັ້ນກໍຄື ຈາກການຫາປາ ແລະຜູ້ຄົນກໍຈະບໍ່ມີອາຫານການກິນພຽງພໍນຳອີກ.
ນີ້ແມ່ນໜ້າເປັນຫ່ວງຫຼາຍ.”
ພວກນັກເຄື່ອນໄຫວເພື່ອປົກປ້ອງສະພາບແວດລ້ອມ ພວມທຳການກົດດັນ ໃຫ້ລັດຖະບານ
|ຂອງທັງ 4 ປະເທດ ໃນເຂດລຸ່ມແມ່ນໍ້າຂອງ ຢຸດເຊົາໂຄງການສ້າງເຂື່ອນໄຟຟ້າພະລັງນໍ້າ
ໄຊຍະບູລີ ເພື່ອທຳການຊັ່ງຊາຕີລາຄາເພີ່ມຕື່ມກ່ຽວກັບຜົນກະທົບໃນໄລຍະຍາວຕໍ່ທັງແມ່ນໍ້າ
ຂອງແລະປະຊາຊົນທີ່ອາໄສຢູ່ເລາະລຽບສອງຟາກຝັ່ງຂອງແມ່ນໍ້າດັ່ງກ່າວນີ້.
